រាជធានីភ្នំពេញ ៖ ថ្នាក់ដឹកនាំក្រុមហ៊ុនទេសចរណ៍នានានិយាយថា ការធ្វើដំណើរតាមផ្លូវអាកាសរបស់ប្រជាពលរដ្ឋក្នុងស្រុកកំពុងកើនឡើង ទន្ទឹមនឹងការកើនឡើងនូវក្រុមហ៊ុនអាកាសចរណ៍ ដែលធ្វើឲ្យតម្លៃកាន់តែប្រកួតប្រជែង ។
រាជធានីភ្នំពេញ ៖ ថ្នាក់ដឹកនាំក្រុមហ៊ុនទេសចរណ៍នានានិយាយថា ការធ្វើដំណើរតាមផ្លូវអាកាសរបស់ប្រជាពលរដ្ឋក្នុងស្រុកកំពុងកើនឡើង ទន្ទឹមនឹងការកើនឡើងនូវក្រុមហ៊ុនអាកាសចរណ៍ ដែលធ្វើឲ្យតម្លៃកាន់តែប្រកួតប្រជែង ។
លោក ហូ វណ្ឌី អគ្គលេខាធិការសមាគមសម្ព័ន្ធទេសចរណ៍ជាតិកម្ពុជា បានថ្លែងតាមទូរស័ព្ទនៅព្រឹកថ្ងៃទី១០ មេសា កន្លងមកថា ប្រជាពលរដ្ឋធ្វើដំណើរតាមអាកាសចរណ៍កំពុងកើនឡើង ដោយភ្ញៀវធ្វើដំណើរតាមអាកាសចរណ៍ក្នុងស្រុកស្ថិតក្នុងចន្លោះពី៧០ ទៅ៨០%ជាប្រជាពលរដ្ឋខ្មែរ ដែលពួកគេធ្វើដំណើរពីរាជធានីភ្នំពេញទៅកាន់ខេត្តសៀមរាប, ពីខេត្តសៀមរាបមកកាន់រាជធានីភ្នំពេញ, ពីរាជធានីភ្នំពេញទៅកាន់ខេត្តព្រះសីហនុ និងពីខេត្តព្រះសីហនុទៅកាន់ខេត្តសៀមរាបជាដើម ។
លោកបន្តថា ៖ « តម្លៃសំបុត្រមានចន្លោះពី២០ ដល់ជាង១០០ដុល្លារអាមេរិក អាស្រ័យលើក្រុមហ៊ុននីមួយៗ ។ បច្ចុប្បន្ន មានក្រុមហ៊ុនអាកាសចរណ៍ចំនួន៦ កំពុងប្រតិបត្តិការហោះហើរក្នុងស្រុកជាទៀងទាត់ ប៉ុន្តែទោះជាយ៉ាងណា ការហោះហើររបស់ក្រុមហ៊ុនអាកាសចរណ៍ទាំងនោះមិនទាន់មមាញឹកខ្លាំងនៅឡើយទេ » ។
ក្រុមហ៊ុនអាកាសចរណ៍ដែលកំពុងធ្វើប្រតិបត្តិការហោះហើរក្នុងស្រុកមានដូចជា ក្រុមហ៊ុនអាកាសចរណ៍បាយ័នអ៊ែរ, កម្ពុជា អង្គរអ៊ែរ, បាសាកាអ៊ែរ, អាកាសចរណ៍ JC, អាកាសចរណ៍ Spring និងអាកាសចរណ៍ស្កាយវីង ។
លោក ស សារិន នាយកគ្រប់គ្រងទូទៅនៃក្រុមហ៊ុនទេសចរណ៍ PTM ដែលមានសិទ្ធិចេញសំបុត្រយន្តហោះឲ្យក្រុមហ៊ុនអាកាសចរណ៍ជាង១០០ប្រទេស បានថ្លែងស្រដៀងគ្នាថា ការធ្វើដំណើរតាមផ្លូវអាកាសពីសំណាក់ប្រជាពលរដ្ឋក្នុងស្រុកពិតជាកើនឡើង ដោយសារប្រាក់ចំណូលរបស់ពួកគាត់កាន់តែល្អប្រសើរ និងតម្លៃសំបុត្រមានភាពប្រកួតប្រជែង ព្រោះក្រុមហ៊ុនអាកាសចរណ៍បានកើនឡើងច្រើននាពេលសព្វថ្ងៃនេះ ។
ទោះជាយ៉ាងណា លោកមិនបញ្ជាក់ឲ្យដឹងពីតួលេខនៃកំណើនទេ គ្រាន់តែបញ្ជាក់ថា ការកក់សំបុត្រយន្តហោះបានកើនឡើងច្រើនពីមួយឆ្នាំទៅមួយឆ្នាំ ។
លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល ថ្លែងថា ការហោះហើរក្នុងស្រុកពិតជាកើនឡើងច្រើនក្នុងប៉ុន្មានឆ្នាំចុងក្រោយនេះ ដោយសារមានការធ្វើដំណើរច្រើនពីប្រជាពលរដ្ឋក្នុងស្រុក និងការកើនឡើងនូវចំនួនភ្ញៀវទេសចរ ។ ជាក់ស្តែង ក្រុមហ៊ុនអាកាសចរណ៍ JC ដែលមានយន្តហោះថ្មី បានបើកជើងហោះហើរយ៉ាងសកម្ម ដោយមួយថ្ងៃមានជើងហោះហើរពី២ទៅ៣លើក រវាងភ្នំពេញ-សៀមរាប សៀមរាប-ភ្នំពេញ និងសៀមរាប-ព្រះសីហនុ ។
លោកបន្តថា ៖ « ការធ្វើដំណើរតាមអាកាសចរណ៍បច្ចុប្បន្នមានតម្លៃសមរម្យ ដោយសារមានការប្រកួតប្រជែងគ្នា ដែលជាទូទៅមានតម្លៃចន្លោះពី៦០ទៅ៨០ដុល្លារអាមេរិកសម្រាប់សំបុត្រទៅមក» ។ លោកបន្តថា ៖ «ការធ្វើដំណើរតាមផ្លូវអាកាស ក៏ធ្វើឲ្យអ្នកដំណើរមានភាពងាយស្រួល ចំណេញពេលវេលា និងការហោះហើរមានភាពបត់បែនផងដែរ » ។
លោក ស៊ិន ចាន់សេរីវុត្ថា បន្ថែមថា បច្ចុប្បន្ននេះ ព្រលានយន្តហោះកងកេង ខេត្តព្រះសីហនុ មានក្រុមហ៊ុនអាកាសចរណ៍ក្នុងស្រុក និងមកពីប្រទេសចិនចុះចតយ៉ាងសកម្ម ។ កាលពីឆ្នាំ២០១៥ ព្រលាននេះទទួលបានអ្នកដំណើរ១៥ម៉ឺននាក់, ឆ្នាំ២០១៦ មានអ្នកដំណើរឆ្លងកាត់កន្លះលាននាក់ និងរំពឹងកើនឡើងដល់១លាននាក់នៅឆ្នាំនេះ ៕
ចែករំលែកព័តមាននេះ