អ្នកលក់មីឆាតាមរទេះសម្រាលកូនក្បែរខ្លោងទ្វារអង្គរសង្ក្រាន្ត
ខេត្តសៀមរាប ៖ មិនមែនចៃដន្យទេប្រៀបដូចជាពេលវេលាដ៏អស្ចារ្យមួយ គឺចំពេលសម្តេចនាយករដ្ឋមន្ត្រី កំពុងថ្លែងបើកព្រឹត្តិការណ៍អង្គរសង្ក្រាន្ត ឆ្នាំ២០១៧
ខេត្តសៀមរាប ៖ មិនមែនចៃដន្យទេប្រៀបដូចជាពេលវេលាដ៏អស្ចារ្យមួយ គឺចំពេលសម្តេចនាយករដ្ឋមន្ត្រី កំពុងថ្លែងបើកព្រឹត្តិការណ៍អង្គរសង្ក្រាន្ត ឆ្នាំ២០១៧
ខេត្តសៀមរាប ៖ មិនមែនចៃដន្យទេប្រៀបដូចជាពេលវេលាដ៏អស្ចារ្យមួយ គឺចំពេលសម្តេចនាយករដ្ឋមន្ត្រី កំពុងថ្លែងបើកព្រឹត្តិការណ៍អង្គរសង្ក្រាន្ត ឆ្នាំ២០១៧ ពេលនោះស្ត្រីម្នាក់ ដែលកំពុងលក់មីឆា ប្រហិតចៀនតាមរទេះរុញជាមួយប្តីនិងកូនតូចម្នាក់ ក៏បានឈឺពោះគ្រប់ខែឆ្លងទន្លេបង្កើតបានកូនប្រុសម្នាក់ ស្ថិតនៅក្បែរខ្លោងទ្វារចូលនៃព្រឹត្តិការណ៍អង្គរសង្ក្រាន្ត ។
ដោយគ្មានពេទ្យ ត្រូវបានក្រុមការងារសន្តិសុខ សណ្តាប់ធ្នាប់ចរាចរ និងក្រុមការងារប្រតិបត្តិអង្គរសង្ក្រាន្តបានដឹកជញ្ជូនភ្លាមៗ ឆ្ពោះទៅមន្ទីរពេទ្យគន្ធបុប្ផា ខេត្តសៀមរាបផងដែរដើម្បីជួយសង្គ្រោះ ។
បុរសជាប្តីឈ្មោះ ហេង សំណាង អាយុ៣៥ឆ្នាំ រស់នៅភូមិតាព្រួច ឃុំក្តុល ក្រុងបាត់ដំបង ខេត្តបាត់ដំបង បានរៀបរាប់ប្រាប់កោះសន្តិភាព នៅរសៀលថ្ងៃទី១៥ ខែមេសា ឆ្នាំ២០១៧នេះថា ខ្ញុំមានប្រពន្ធឈ្មោះ ឆាយ ស្រី អាយុ២៥ឆ្នាំ មានកូនប្រុសម្នាក់ ឈ្មោះ ណាង សុផានិត អាយុ៣ឆ្នាំ និងទើបបង្កើតបានកូនប្រុសម្នាក់ទៀតចំថ្ងៃចូលឆ្នាំ មិនទាន់បានដាក់ឈ្មោះឱ្យនៅឡើយ ។
បុរសជាប្តីបានរៀបរាប់បន្តថា នៅព្រឹកថ្ងៃទី១៤ ខែមេសា ឆ្នាំ២០១៧នេះ ប្រពន្ធរបស់ខ្ញុំមានផ្ទៃពោះបានគ្រប់៩ខែ១០ថ្ងៃតែម្តង ។ បុរសជាប្តីបានបញ្ជាក់បន្ថែមថា ប្រពន្ធរបស់ខ្ញុំបានសម្រាលកូននៅនឹងដីក្រាលកន្ទេល វេលាម៉ោង៨និង២៥នាទី អំឡុងពេលកំពុងលក់មីឆាប្រហិតចៀន តាមរទេះរុញចល័តនៅលើចិញ្ចើមផ្លូវ ខ្លោងទ្វារចូលអង្គរសង្ក្រាន្តតាមផ្លូវចូលជិតដល់អង្គរតូច ហួសច្រមុះជ្រូក កូម៉ៃបន្តិចស្រាប់តែប្រពន្ធគខ្ញុំប្រាប់ថា ឈឺពោះខ្លាំងណាស់ ។ គ្រាន់តែប្រាប់បានមួយម៉ាត់ ពេលនោះខ្ញុំជាប្តីក៏បានយកកន្ទេល មកក្រាលលើដីឱ្យប្រពន្ធដេកដើម្បីសម្រួលខ្លួន ស្រាប់តែមួយសន្ទុះ ក៏កើតមកភ្លាមៗតែម្តងទៅ ។ ខណៈពេលនោះ ដោយភ័យពេក ខ្ញុំក៏រត់មកខាងមុខខ្លោងទ្វារឃើញក្រុមយុវជន ស ស យ ក និងសមត្ថកិច្ចកំពុងឈរយាម ដើម្បីសម្រួលចរាចរណ៍ ខ្ញុំក៏ស្រែកឱ្យគាត់ជួយ ។
សូមបញ្ជាក់បន្ថែមថា ភ្លាមៗនោះរហ័សដូចចិត្ត ក្រុមការងារសន្តិសុខ សណ្តាប់ធ្លាប់ ដោយមានលោក ឌី វិជ្ជា និងលោក ស សុខា ជាថ្នាក់ដឹកនាំបានសហការជាមួយសមត្ថកិច្ច អន្តរាគមន៍ភ្លាមៗដើម្បីដឹកជញ្ជូនស្ត្រី ដែលឆ្លងទន្លេរួចទៅហើយនោះ ទៅកាន់មន្ទីរពេទ្យគន្ធបុប្ផា យកទៅសង្គ្រោះបានដោយជោគជ័យ ។
បុរសជាប្តីបានឱ្យដឹងបន្ថែមទៀតថា ខ្ញុំមកលក់ដូរផង មកលេងផង ព្រោះសប្បាយចិត្ត ដោយរកលុយបានច្រើនទៀតផងម្លេ៉ោះហើយភ្លេចគិតរឿងពោះធំគ្រប់ថ្ងៃគ្រប់ខែ ។ គាត់បន្ថែមទៀតថា មិនតែប៉ុណ្ណោះឆ្នាំនេះ បានកូនប្រុសមួយទៀត ជាកាដូនៃថ្ងៃព្រឹត្តិការណ៍អង្គរសង្ក្រាន្ត និងបុណ្យចូលឆ្នាំថ្មី មុខខ្លោងទ្វារធំតែម្តង ។ ដូច្នេះរូបខ្ញុំសប្បាយចិត្តខ្លាំងណាស់ មិនដឹងរកអ្វីមកនិយាយពុំបានទៀតទេ គឺគ្មានវាចានឹងថ្លែងឱ្យអស់ឡើយ ។
គាត់និយាយថា តាមរយៈកាសែតកោះសន្តិភាព សូមផ្តាំផ្ញើជូនចំពោះបងៗជាសមត្ថកិច្ច និងក្រុមការងារយុវជន ដែលបានជួយសង្គ្រោះជីវិតកូន និងប្រពន្ធរបស់ខ្ញុំបានដោយសុវត្ថិភាពដែលខ្ញុំស្មានមិនដល់ ។ ខ្ញុំស្រឡាញ់ និងពេញចិត្តក្នុងការចូលរួមក្នុងព្រឹត្តិការណ៍អង្គរសង្ក្រាន្ត ឆ្នាំរកា នព្វស័ក ពស២៥៦១ ដែលបានផ្តល់ឱ្យប្រពន្ធរបស់ខ្ញុំបានឆ្លងទន្លេដោយសុវត្ថិភាព ៕
ចែករំលែកព័តមាននេះ