រាជរដ្ឋាភិបាលអំពាវនាវដល់ពលករខ្មែរនៅប្រទេសកូរ៉េសូមរក្សាភាពនឹងនរ ខណៈឧបទ្វីបកូរ៉េតានតឹង
រាជធានីភ្នំពេញ ៖ ប្រជាពលរដ្ឋខ្មែរ រួមមានពលករ ស្ត្រីរៀបការស្វាមីកូរ៉េ និស្សិត និងកម្មសិក្សាការី ដែលបានរស់នៅប្រទេសកូរ៉េ
រាជធានីភ្នំពេញ ៖ ប្រជាពលរដ្ឋខ្មែរ រួមមានពលករ ស្ត្រីរៀបការស្វាមីកូរ៉េ និស្សិត និងកម្មសិក្សាការី ដែលបានរស់នៅប្រទេសកូរ៉េ ប្រមាណជិត២ម៉ឺននាក់ប្រកបដោយភាពសប្បាយរីករាយ បានចូលរួមព្រឹត្តិការណ៍ «មហាសង្ក្រាន្ដខ្មែរ» នៅឧទ្យាន Manseok ទីក្រុងស៊ូវ៉ុន ប្រទេសកូរ៉េ ក្រោមអធិបតីភាព លោក អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោក ឡុង ឌីម៉ង់ ឯកអគ្គរាជទូតកម្ពុជាប្រចាំប្រទេសកូរ៉េខាងត្បូង ។
ថ្លែងទៅកាន់អ្នកចូលរួម «មហាសង្ក្រាន្ដខ្មែរ» នៅកូរ៉េប្រមាណ២ម៉ឺននាក់ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានពាំនាំនូវការផ្តាំផ្ញើសាកសួរសុខទុក្ខ និងជូនពរឆ្នាំថ្មី របស់សម្តេចតេជោនាយករដ្ឋមន្ត្រី ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដល់បងប្អូនប្រជាពលរដ្ឋខ្មែរទាំងអស់ ដែលកំពុងស្នាក់នៅសាធារណរដ្ឋកូរ៉េ ។
លោករដ្ឋមន្ត្រីមានប្រសាសន៍ថា រាជរដ្ឋាភិបាលបានតាមដានយ៉ាងយកចិត្តទុកដាក់អំពីការវិវត្តនៅក្នុងឧបទ្វីបកូរ៉េ និងបានត្រៀមនូវវិធីសាស្ត្រចាំបាច់សម្រាប់គ្រប់គ្រងសុវត្ថិភាពរបស់ប្រជាពលរដ្ឋកម្ពុជានៅទីនោះ ។ ហេតុដូច្នេះសូមសាធារណជនជាពិសេសឪពុក ម្តាយ និងក្រុមគ្រួសារពលករ និងស្ត្រីរៀបការស្វាមីកូរ៉េ ក៏ដូចជានិស្សិត សូមរក្សាភាពនឹងនរ បន្តនិរន្តរភាពការងារជាធម្មតា។ ចំណែកស្ថានឯកអគ្គរាជទូតកម្ពុជាយើងនៅកូរ៉េ នឹងបន្តតាមដានសភាពការណ៍ និងទំនាក់ទំនងជាមួយប្រជាពលរដ្ឋខ្មែរបន្តទៀត ។ សូមបងប្អូនប្រជាពលរដ្ឋខ្មែរជឿជាក់លើចំណាត់ការរបស់រដ្ឋាភិបាលសាធារណរដ្ឋកូរ៉េ និងបន្តរួមរស់ដោយសុខសាន្តជាមួយប្រជាពលរដ្ឋកូរ៉េ ។
លោករដ្ឋមន្ត្រី អ៊ិត សំហេង បានឲ្យដឹងទៀតថា ការរៀបចំមហាសង្ក្រាន្តខែ្មរនាពេលនេះ គឺដើម្បីអបអរសាទរបុណ្យចូលឆ្នាំថ្មីប្រពៃណីខ្មែរ ដែលជាបុណ្យប្រពៃណីដ៏ធំរបស់ប្រជាជនខ្មែរយើង ដើម្បីជួបជុំមហាគ្រួសារខ្មែរ ធ្វើបុណ្យទានឧទ្ទិសកុសលជូនដល់វិញ្ញាណក្ខន្ធលោកអ្នកមានគុណទាំងឡាយដែលបានចែកឋានទៅកាន់បរលោក ទុកជាការតបស្នងសងគុណដល់បុព្វការីជនជាទីគោរពស្រឡាញ់នៃយើង ។
លោកបន្តថា បុណ្យចូលឆ្នាំថ្មីប្រពៃណីជាតិខ្មែរយើង ក៏ជាឱកាសដែលប្រជាពលរដ្ឋខ្មែរយើងជួបជុំគ្នាលេងកម្សាន្តសប្បាយនូវល្បែងល្បាំប្រជាប្រិយដោយមិនប្រកាន់អ្វីទាំងអស់ ។ នេះជាប្រពៃណីជាតិខ្មែរយើងដ៏រុងរឿងល្អផូរផង់ ដែលជាមោទនភាពជាតិរបស់ខ្មែរយើង ហើយការរៀបចំកម្មវិធីបុណ្យចូលឆ្នាំថ្មីប្រពៃណីជាតិខ្មែរនៅកូរ៉េ ពិតមែនមិនអាចគ្រប់គ្រាន់ដូចយើងនៅជួបជុំគ្រួសារឯស្រុកកំណើតយើង តែបញ្ជាក់ថា ខ្មែរយើងទោះដល់ទីណាក៏នៅជាខ្មែរ ទោះជាសម្បូរសប្បាយយ៉ាងណាក្ដី ក៏ខ្មែរមិនភ្លេចប្រពៃណីវប្បធម៌ខ្មែរឡើយ ។
លោក អ៊ិត សំហេង បានបញ្ជាក់ថា ក្នុងនាមរាជរដ្ឋាភិបាលកម្ពុជា និងក្រសួងការងារនិងបណ្ដុះបណ្ដាលវិជ្ជាជីវៈ សូមគោរពកោតសរសើរបងប្អូនខ្មែររស់នៅកូរ៉េខាងត្បូងទាំងអស់ ពិតជាកុលបុត្រខ្មែរស្នេហាជាតិជាពូជពង្សខ្មែរអង្គរដ៏រុងរឿង ។ ជាមួយនោះដែរ លោកក៏បានជម្រាបជូនអំពីវឌ្ឍនភាពដែលរាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សមេ្តចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលកំពុងតែមានការរីកចម្រើនប្រកបដោយសន្តិភាព ស្ថិរភាព ការអភិវឌ្ឍ និងកិច្ចសហប្រតិបត្តិការ និងសម្រេចបាននូវសមិទ្ធផលជាច្រើនដែលយើងទាំងអស់គ្នាបានឃើញ និងទទួលបានផលពីសមិទ្ធផលនេះ ស្របតាមកម្មវិធីនយោបាយរបស់រាជរដ្ឋាភិបាល ។
ចំណែកលោក ឡុង ឌីម៉ង់ ឯកអគ្គរាជទូតកម្ពុជាប្រចាំប្រទេសកូរ៉េ បានឲ្យដឹងថា ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងក្រសួងការងារ និងបណ្ដុះបណ្ដាលវិជ្ជាជីវៈ សហការជាមួយសហគមន៍ខ្មែរនៅសាធារណរដ្ឋកូរ៉េ រៀបចំព្រឹត្តិការណ៍មហាសង្ក្រាន្ដខ្មែរនៅកូរ៉េ ដ៏ធំប្រចាំឆ្នាំជាលើកដំបូង ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ក្នុងបំណងបង្កើតភាពសប្បាយរីករាយជូនប្រជាពលរដ្ឋខ្មែរទាំងអស់ដែលរស់នៅ ធ្វើការ និងសិក្សានៅសាធារណរដ្ឋកូរ៉េ ក្នុងស្មារតីខ្មែរតែមួយ អនាគតខ្មែរតែមួយ ។ លោកបញ្ជាក់ថា ព្រឹត្តិការណ៍មហាសង្ក្រាន្ដខ្មែរនៅកូរ៉េប្រព្រឹត្តទៅនៅថ្ងៃអាទិត្យទី១៦ ខែមេសា ឆ្នាំ២០១៧ ចាប់ពីម៉ោង១០ព្រឹក ដល់ម៉ោង៦ល្ងាច នៅសួនកម្សាន្ដ Manseok Park នាទីក្រុងស៊ូវ៉ុនខេត្តខ្យងគី សាធារណរដ្ឋកូរ៉េ ជាមួយនឹងកម្មវិធីប្រពៃណីជាច្រើនដូចជា៖ ពិធីសាសនា ពិធីពូនភ្នំខ្សាច់ ការបង្ហាញក្បាច់គុនបុរាណខ្មែរ កម្មវិធីសម្ដែងសិល្បៈប្រពៃណី ការលេងល្បែងប្រជាប្រិយ ការតាំងបង្ហាញមុខម្ហូប នំបង្អែមខ្មែរ និងការប្រគំតន្ត្រីសម័យខ្នាតធំដែលមានសិល្បករ-សិល្បការិនីមកពីព្រះរាជាណាចក្រកម្ពុជាជាដើម ៕
ចែករំលែកព័តមាននេះ