ខេត្តបន្ទាយមានជ័យ ៖ សាច់មាន់ចម្រុះខូចគុណភាពជិតកន្លះតោន ត្រូវបានមន្ត្រីជំនាញសាខាកាំកុងត្រូលខេត្ត សហការជាមួយសមត្ថកិច្ចនិងស្ថាប័នពាក់ព័ន្ធក្របួចជាប់នៅច្រកទ្វារអន្តរជាតិប៉ោយប៉ែត បន្ទាប់ពីរទេះដឹកសាច់មាន់ខូចគុណភាពនោះអូសចេញពីទឹកដីថៃ ប្រុងដឹកយកទៅលក់តាមទីផ្សារ ។
រទេះដឹកសាច់មាន់បង្កប់ក្រោមទំនិញខាងលើ ត្រូវបានមន្ត្រីជំនាញឃាត់នៅព្រឹកថ្ងៃទី១៩ មេសានៅច្រកទ្វារអន្តរជាតិប៉ោយបែត ។ យ៉ាងណាក៏ដោយគេមិនស្គាល់អត្តសញ្ញាណម្ចាស់សាច់មាន់ចម្រុះខូចគុណភាពនោះទេ ព្រោះបានគេចខ្លួនបាត់ ។
លោក ស៊ាន ស៊ីណាត ប្រធានសាខាកាំកុងត្រូលខេត្តប្រាប់កោះសន្តិភាពថា សាច់មាន់ចម្រុះទាំងនេះជារបស់ខូចគុណភាពនិងមានចំនួនជិតកន្លះតោន ។ ប្រធានសាខាខេត្តរូបនេះបន្តថា លោកនឹងសហការជាមួយស្ថាប័នជំនាញពាក់ព័ន្ធដែលឈរជើងនៅមាត់ច្រកទ្វារអន្តរជាតិប៉ោយប៉ែត យកសាច់មាន់ទាំងនោះទៅដុតកម្ទេចចោលក្រោយធ្វេីកំណត់ហេតុរួច ៕
ចែករំលែកព័តមាននេះ