ប្រទេសចិន ៖ ការផលិតឧស្ម័នថ្មសែលរបស់ចិនបានកើនឡើងនៅក្នុងខែមីនា ខណៈផលិតកម្មឧស្ម័នធម្មជាតិក៏បានកើនឡើងផងដែរ ដោយបង្ហាញពីភាពប្រសើរឡើងនៃរចនាសម្ព័ន្ធថាមពល ខណៈប្រទេសនេះបាននិងកំពុងផ្លាស់ប្តូរពីការពឹងផ្អែកលើប្រភពថាមពលប្រពៃណី ។
ទិន្នផលឧស្ម័នថ្មសែលបានកើនឡើង៥០,៤%ពីមួយឆ្នាំទៅមួយឆ្នាំ ស្មើនឹង១,១៥ប៊ីលានម៉ែត្រគូបក្នុងខែមីនា ។ នេះបើយោងតាមទិន្នន័យការិយាល័យស្ថិតិជាតិ ចេញផ្សាយកាលពីថ្ងៃចន្ទ ។
នៅក្នុងត្រីមាសទី១នេះ ទិន្នផលឧស្ម័នថ្មសែលស្មើ២,៦៧ប៊ីលានម៉ែត្រគូប កើនឡើង១៧,៤% ពីមួយឆ្នាំទៅមួយឆ្នាំ ។
កំណើនយ៉ាងឆាប់រហ័សនេះ ដោយសារផលិតកម្មកើនឡើងនៅតំបន់សាកល្បងឧស្ម័នថ្មសែលថ្នាក់ជាតិ Changning-Weiyuan ក្នុងខេត្ត Sichuan ភាគនិរតីនៃប្រទេសចិន ដែលគ្រប់គ្រងដោយក្រុមហ៊ុនប្រេង និងឧស្ម័នយក្ស សាជីវកម្មប្រេងជាតិ ។
ប្រទេសចិនបានខិតខំប្រឹងប្រែងកែលម្អរចនាសម្ព័ន្ធថាមពលរបស់ខ្លួន ដោយផ្លាស់ប្តូរឲ្យឆ្ងាយពីការប្រើប្រាស់ប្រភពថាមពលបែបប្រពៃណី ដូចជា ធ្យូងថ្ម ។ ចិនកំពុងតែរុករកឧស្ម័នថ្មសែលទាំងក្នុងបរិមាណ និងបច្ចេកទេសខួង ដែលធ្វើឱ្យចិនក្លាយជាអ្នកផ្គត់ផ្គង់ឧស្ម័នថ្មសែលលំដាប់កំពូលលើពិភពលោក ។
គិតត្រឹមឆ្នាំ២០២០ ឧស្ម័នថ្មសែលបម្រុងទុកនឹងកើនឡើងលើស១,៥ទ្រីលានម៉ែត្រគូប ។ នេះបើយោងតាមផែនការចេញផ្សាយដោយអាជ្ញាធរនៅដើមឆ្នាំនេះ ៕
ចែករំលែកព័តមាននេះ