រាជធានីភ្នំពេញ ៖ កម្លាំងព្រហ្មទណ្ឌកម្រិតស្រាលរបស់ស្នងការរាជធានីភ្នំពេញប្រទះឃើញជនជាតិបរទេសស្រី២នាក់កំពុងតែដើរតាមផ្លូវត្រូវជនសង្ស័យ២នាក់ធ្វើសកម្មភាពឆក់កាបូបស្ពាយបានសម្រេចហើយជិះរត់គេចខ្លួន សមត្ថកិច្ចក៏បានជិះដេញតាមពីក្រោយទៅដល់ចំណុចជិតសួនច្បារក្តាន់ពីរជិះទៅបុកខឿនបណ្តាលឲ្យដួលរងរបួសស្រាលរត់ចោលម៉ូតូបាត់ស្រមោល ហេតុការណ៍នេះបានកើតឡើងកាលពីវេលាម៉ោង១១និង៣០នាទីយប់ថ្ងៃទី១៨ ខែមេសា ឆ្នាំ២០១៧ តាមបណ្តោយផ្លូវសហព័ន្ធរុស្សីកែងផ្លូវR6 ស្ថិតនៅក្នុងសង្កាត់ស្រះចក ខណ្ឌដូនពេញ ។
បើតាមប្រភពព័ត៌មានពីកម្លាំងព្រហ្មទណ្ឌកំរិតស្រាលបានឱ្យដឹងថា មុនពេលកើតហេតុគាត់បានឃើញស្ត្រី២នាក់ជាជនជាតិបរទេសកំពុងតែដើរតាមផ្លូវ៥១មានស្ពាយកាបូបបនៅជាប់ខ្លួន ខណៈពេលដើរមកដល់ជិតដល់ស្នងការចាស់ក៏ស្រាប់តែលេចមុខជនសង្ស័យ២នាក់ជិះម៉ូតូមួយគ្រឿងមិនស្គាល់ម៉ាក ពណ៌ខ្មៅ អត់មានស្លាកលេខធ្វើដំណើរមកតាមបណ្តោយផ្លូវ៥១ ក្នុងទិសដៅពីជើងទៅត្បូង បានជិះទៅជិតហើយធ្វើសកម្មភាពឆក់កាបូបពីស្ត្រីជនជាតិបរទេសបានសម្រេចបំរុងនឹងជិះរត់គេចខ្លួនសំណាងអាក្រក់អីកម្លាំងសមត្ថកិច្ចបានប្រទះឃើញជិះរត់តាមពីក្រោយតាំងពីចំណុចកើតហេតុរហូតដល់មុខសួនច្បារក្តាន់ពីរកែងផ្លូវR6 ធ្វើឲ្យជនសង្ស័យភ័យស្លន់ស្លោពេកជិះបុកខឿនបណ្តាលឱ្យដួលរងរបួសស្រាលម៉ូតូវៀចកង់មុខ និងបាក់ក្បាំង ចំណែកឯជនសង្ស័យវិញបានរត់គេចខ្លួនយកទាំងកាបូបទៅជាមួយទៀតផង ។ ក្រោយពេលកើតហេតុម៉ូតូជនសង្ស័យត្រូវកម្លាំងសមត្ថកិច្ចយកទៅរក្សាទុកនៅស្នងការរាជធានីភ្នំពេញ ៕
ចែករំលែកព័តមាននេះ