មិនទាន់ចាប់បានអ្នកបង្ហូរឈាម
ខេត្តបន្ទាយមានជ័យ ៖ រហូតមកដល់ថ្ងៃទី១៨ ខែមេសា ជនដៃដល់ដែលបានបា.ញ់ប្រហារមិនញញើតដៃនាវេលាទៀបភ្លឺថ្ងៃចូលឆ្នាំថ្មី
ខេត្តបន្ទាយមានជ័យ ៖ រហូតមកដល់ថ្ងៃទី១៨ ខែមេសា ជនដៃដល់ដែលបានបាញ់ប្រហារមិនញញើតដៃនាវេលាទៀបភ្លឺថ្ងៃចូលឆ្នាំថ្មី មិនទាន់ត្រូវសមត្ថកិច្ចចាប់ខ្លួនបាននៅឡើយទេ។ ការបាញ់ប្រហារនេះ បង្កឡើងដោយទាហានតំបន់អភិវឌ្ឍន៍ភូមិភាគ៥ម្នាក់ដែលតូចចិត្តដណ្តឹងកូនស្រីគេមិនបាន ក៏ក្លាយខ្លួនជាបិសាចដ៏សាហាវបាញ់ប្រល័យជីវិតគ្រួសាររងគ្រោះនៅយប់ថ្ងៃបុណ្យចូលឆ្នាំថ្មី គឺបាញ់រះចូលក្នុងផ្ទះបណ្តាលស្លាប់៣នាក់ របួសម្នាក់ធ្ងន់ នៅវេលាម៉ោង៣និង១៥នាទីទៀបភ្លឺថ្ងៃទី១៤ ខែមេសា នៅភូមិថ្មី ឃុំថ្មី ស្រុកម៉ាឡៃ ។
លោកវរសេនីយ៍ត្រី តាំង សុហេង មេបញ្ជាការកងរាជអាវុធហត្ថស្រុកម៉ាឡៃ បានឲ្យដឹងថាជនរងគ្រោះដែលស្លាប់៣នាក់មាន ៖
១-ឈ្មោះ ជួប សាំងលីន ភេទប្រុស អាយុ៣០ឆ្នាំ ស្លាប់ក្នុងផ្ទះ ។
២-ឈ្មោះ ម៉ែ សុវណ្ណរ៉ាឌី ភេទស្រី អាយុ៣២ឆ្នាំ ស្លាប់នៅមន្ទីរពេទ្យ និង
៣-ឈ្មោះ សុខ ខាត់ណា ភេទស្រី អាយុ៥៥ឆ្នាំ ស្លាប់នៅមន្ទីរពេទ្យ ។
ចំណែកអ្នករបួសធ្ងន់ឈ្មោះ អឹម សំបុន ភេទប្រុស អាយុ៣៤ឆ្នាំ ។
តាមសាច់ញាតិជនរងគ្រោះនិយាយថា ការលួចបាញ់ប្រហារនេះបានកើតឡើងនៅពេលម្ចាស់ផ្ទះបើកទ្វារចេញមកអុជធូបទទួលទេវតាឆ្នាំថ្មី នាវេលាម៉ោង៣និង១៥នាទីទៀបភ្លឺថ្ងៃទី១៤ ខែមេសា ។ ពេលនោះ ស្រាប់តែស្នូរកាំភ្លើងបាញ់លាន់ដូចរន្ទះជាច្រើនគ្រាប់ចូលក្នុងផ្ទះបណ្តាលឲ្យត្រូវឈ្មោះ ជួប សាំងលីន ជាច្រើនគ្រាប់ដួលស្លាប់នៅនឹងកន្លែង និង៣នាក់ទៀតរងរបួសធ្ងន់ តែពេលបញ្ជូនទៅមន្ទីរពេទ្យក៏ស្លាប់២នាក់ទៀត ។
សាច់ញាតិជនរងគ្រោះនិយាយទៀតថា ករណីលួចបាញ់ប្រហារយ៉ាងសាហាវនេះ ត្រូវបានដាក់ការសង្ស័យនិងស្គាល់មុខសញ្ញាជនដៃដល់ហើយគឺឈ្មោះ រ៉េត រាត្រី ភេទប្រុស អាយុ២៦ឆ្នាំ ជាយោធានៅអង្គភាពតំបន់អភិវឌ្ឍន៍យោធភូមិភាគទី៥ ឈរជើងនៅភ្នំឆត្រ ស្ថិតភូមិក្តឹបថ្ម ឃុំស្លក្រាម ស្រុកស្វាយចេក ។ ការបង្ហូរឈាមយ៉ាងសាហាវនេះ គឺបន្ទាប់ពីជនដៃដល់ស្រឡាញ់កូនស្រីម្ចាស់ផ្ទះហើយចូលដណ្តឹងមិនឱ្យ ទើបកើតជារឿងគំនុំលួចបាញ់ប្រហារតែម្តង ។
លោកវរសេនីយ៍ត្រី តាំង សុហេង ថ្លែងថា ករណីលួចបាញ់ប្រហារនេះ មន្ត្រីជំនាញធ្វើការស្រាវជ្រាវនិងកំណត់មុខសញ្ញាជនល្មើសបានហើយ ដើម្បីចាប់ខ្លួនយកមកផ្តន្ទាទោសទៅតាមច្បាប់ ៕
ចែករំលែកព័តមាននេះ