ខេត្តមណ្ឌលគិរី ៖ ប្រជាពលរដ្ឋជនជាតិភាគតិចព្នងនៅភូមិពូរាំងបានសម្រេចដាក់ពាក្យប្តឹងជំទាស់នឹងការចេញសេចក្តីជូនដំណឹង ស្តីពីការបិទផ្សាយជាសាធារណៈ នូវឯកសារនៃការវិនិច្ឆ័យដីទំហំ២៥៥ហិកតា នៅភូមិពូរាំង ឃុំសែនមនោរម្យ ស្រុកអូររាំង លក់ទៅឱ្យអ្នកមានម្នាក់នៅរាជធានីភ្នំពេញ ដោយពួកគាត់អះអាងថាបានប៉ះពាល់ដល់ដីអាស្រ័យផលរបស់ខ្លួន ។
យោងតាមលិខិតចុះថ្ងៃទី២៨ ខែតុលា ឆ្នាំ២០២២ របស់អ្នកភូមិ បានប្រកាសប្តឹងជំទាស់មិនឲ្យចេញប្លង់កម្មសិទ្ធិលេខ២០៨ ស.ជ.ណ ចុះថ្ងៃទី២៤ ខែមីនា ឆ្នាំ២០២២ របស់ទីស្តីការគណៈរដ្ឋមន្ត្រី និងជំទាស់សេចក្តីជូនដំណឹងលេខ ២២០ លេខ២២៩ និងលេខ២៣០ ចុះថ្ងៃទី១៩ ខែតុលា ឆ្នាំ២០២២ របស់រដ្ឋបាលស្រុកអូររាំង មូលហេតុគឺប៉ះពាល់លើដីរបស់ពួកគាត់ ។
ជុំវិញករណីនេះ អាជ្ញាធរស្រុកអួររាំង នៅថ្ងៃទី៣១ ខែតុលា ឆ្នាំ២០២២ បានឲ្យដឹងថា «ក្នុងករណីមានការប្តឹងជំទាស់ពីប្រជាពលរដ្ឋ ហើយពួកគាត់មានឯកសារដាក់មក រដ្ឋបាលស្រុកនឹងចាត់ក្រុមការងារទៅត្រួតពិនិត្យទីតាំងដែលពួកគាត់ស្នើសុំ ឬពួកគាត់អះអាងថា មានការប៉ះពាល់ដីរបស់គាត់» ។
ការផ្ទុះបាតុភាពប្រឆាំងតវ៉ាមិនឲ្យចេញប័ណ្ណកម្មសិទ្ធិទៅអ្នកស្នើសុំ តាមរយៈការជូនដំណឹងស្តីពីការបិទផ្សាយជាសាធារណៈនូវឯកសារនៃការវិនិច្ឆ័យដីទំហំ ២៥៥ហិកតា នៅស្រុកអូររាំង នេះតាមប្រភពក្រៅផ្លូវការ និងអ្នកគួកជេដីនិយាយថា ដីម្តុំនោះមិនខុសពីសាច់ជ្រូកបីជាន់ទេ ពោលគឺដីមានតម្លៃមហាសាល កន្លែងខ្លះថ្លៃ២ម៉ឺនទៅ៥ម៉ឺនដុល្លារក្នុងមួយហិកតាឯណោះ ទើបបណ្តាលឲ្យកើតមានវិវាទមិនអស់មិនហើយ ជាពិសេសអ្នកមានប្រាក់មានទាំងអំណាចរស់នៅរាជធានីភ្នំពេញដែលចង់ត្របាក់យក ។
សូមបញ្ជាក់ថា យោងតាមលិខិតរបស់ទីស្ដីការគណៈរដ្ឋមន្ត្រី លេខ២០៨ ស.ជ.ណ ដែលមានកម្មវត្ថុ សុំទិញផ្ដាច់ដីចំនួន២ទីតាំង ទំហំសរុប ៣៣៤ហិកតា ៥អា ស្ថិតនៅភូមិពូតាំង សង្កាត់រមនា ក្រុងសែនមនោរម្យ និងភូមិពូរាំង ឃុំសែនមនោរម្យ ស្រុកអូររាំង ខេត្តមណ្ឌលគិរី សម្រាប់ធ្វើការវិនិយោគ អភិវឌ្ឍន៍ជាតំបន់ទេសចរណ៍ធម្មជាតិ ។ ចំណែកអ្នកភូមិពូរាំងនិយាយថា មិនមែនតំបន់ទេសចរធម្មជាតិខ្មោចសេះអីទេ…ចេះតែថា…ចេះតែអួត ។
ខ្លឹមសារក្នុងលិខិតនេះបានបញ្ជាក់ថា ៖
១-ធ្វើអនុបយោគជាសម្បត្តិឯកជនរបស់រដ្ឋនូវផ្ទៃដីចម្ការស្រល់ទំហំ ៧៩ហិកតា ៥អា នៅភូមិពូតាំង សង្កាត់រមនា ក្រុងសែនមនោរម្យ ខេត្តមណ្ឌលគិរី ដូចមានផែនទីនិងតារាងនិយាមកាភ្ជាប់មកជាមួយ និងលក់ផ្ដាច់ទីតាំងដីនេះជូនឈ្មោះ ជិង ធានសេង ក្នុងតម្លៃ ២.០០០ដុល្លារក្នុងមួយហិកតា សរុបស្មើនឹង១៥៨.១០០ដុល្លារ។ ចំណែកអ្នកគួកជេដីនៅតំបន់នោះនិយាយថា ដីនេះមានតម្លៃពី២ម៉ឺនទៅ៥ម៉ឺនដុល្លារ ក្នុង១ហិកតា ។
២-ធ្វើអនុបយោគជាសម្បត្តិឯកជនរបស់រដ្ឋនូវផ្ទៃដីទំហំ ២៥៥ហិកតា ស្ថិតនៅភូមិពូរាំង ឃុំសែនមនោរម្យ ស្រុកអូររាំង ខេត្តមណ្ឌលគិរី ដូចមានផែនទីនិងតារាងនិយាមកាភ្ជាប់មកជាមួយ និងលក់ផ្ដាច់ទីតាំងដីនេះជូនឈ្មោះ ជឹង ធាងសេង ក្នុងតម្លៃ ១.៥០០ដុល្លារក្នុងមួយហិកតា ស្មើនឹង ៣៨២.៥០០ដុល្លារ ។ អ្នកគួកជេដីក៏បាននិយាយដែរថា ដីនេះមានតម្លៃរាប់ម៉ឺនដុល្លារ ក្នុង១ហិកតាដែរ មិនមែន១.៥០០ដុល្លារ មួយហិកតាទេ ។
ដោយឡែក ក្រុមអ្នកតាមដានសង្គមបានលើកឡើងថា បាតុភាពដែលបានកើតឡើងរវាងអ្នកភូមិនិងអាជ្ញាធរខាងលើ អាចបណ្តាលមកពីកំហុសរបស់អាជ្ញាធរមូលដ្ឋាន កង្វះព័ត៌មានរាយការណ៍ជូនថ្នាក់ដឹកនាំ ខណៈអ្នកភូមិបានអាស្រ័យផលលើទីតាំងជាក់ស្តែងជាច្រើនតំណមកហើយ។ ផ្ទៃដីកណ្តាលភូមិដែលមានទំហំរហូតដល់២៥៥ហិកតា ហើយមានអ្នកភូមិរស់នៅជិត២០០គ្រួសារបែបនេះ តើពួកគាត់ទៅប្រកបរបរចិញ្ចឹមជីវិតនៅឯណា បើមិនធ្វើស្រែចម្ការលើដីនេះ ។ បើអ្នកមានអំណាច និងអ្នកពាក់ព័ន្ធឃុបឃិតគ្នាប្រមូលគ្រប់គ្រងដីទាំងនោះអស់ តើយុត្តិធម៌សង្គមនិងសិទ្ធិរស់រានមានជីវិតរបស់អ្នកភូមិ អាចទទួលបានសមធម៌ដោយរបៀបណា ?
ចែករំលែកព័តមាននេះ