រាជធានីភ្នំពេញ ៖ បុរសជាអ្នករត់ម៉ូតូឌុបនៅមុខណាហ្គាវើលត្រូវជនសង្ស័យ២នាក់ហៅឱ្យឌុបទៅម្តុំបឹងកេងកងធ្វើសកម្មភាពភ្ជង់ប្លន់យកម៉ូតូបានសម្រេចជិះរត់គេចខ្លួនបាត់ស្រមោល
រាជធានីភ្នំពេញ ៖ បុរសជាអ្នករត់ម៉ូតូឌុបនៅមុខណាហ្គាវើលត្រូវជនសង្ស័យ២នាក់ហៅឱ្យឌុបទៅម្តុំបឹងកេងកងធ្វើសកម្មភាពភ្ជង់ប្លន់យកម៉ូតូបានសម្រេចជិះរត់គេចខ្លួនបាត់ស្រមោល ហេតុការណ៍នេះបានកើតឡើងកាលពីវេលាម៉ោង១០យប់ ថ្ងៃទី១៨ ខែមេសា ឆ្នាំ២០១៧ តាមបណ្តោយផ្លូវ៣៩២ នៅចំណុចក្រោយសាលាវ័ទ្យាល័យបឹងកេងកង ស្ថិតនៅក្នុងសង្កាត់បឹងកេងកង១ ខណ្ឌចំការមន ។ ជនរងគ្រោះមានឈ្មោះ ខាន់ សុភ័ណ ភេទប្រុស អាយុ៤៩ឆ្នាំ មុខរបរអ្នករត់ម៉ូតូឌុបនៅមុខណាហ្គាវើល ស្នាក់នៅផ្ទះជួល សង្កាត់ចាក់អង្រែលើ ខណ្ឌមានជ័យ ។
តាមប្រភពព័ត៌មានពីជនរងគ្រោះបានឱ្យដឹងថា មុនពេលកើតហេតុគាត់ជាអ្នករត់ម៉ូតូឌុបនៅមុខណាហ្គាវើលជិះម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១១ ពាក់ស្លាកលេខភ្នំពេញ 1AU-9316 ស្រាប់តែមានជនសង្ស័យ២នាក់ដើរចេញមកពីម្តុំសួនច្បារណាហ្គាវើលឱ្យឌុបទៅម្តុំចំណុចកើតហេតុខាងលើក្នុងតំលៃ១ម៉ឺនរៀល លុះពេលទៅដល់ស្រាប់តែជនសង្ស័យ២នាក់ម្នាក់អង្គុយកណ្តាលបានដកកាំភ្លើងខ្លីភ្ជង់ប្លន់យកម៉ូតូហើយគំរាមថា បើហ៊ានស្រែកនឹងបាញ់សម្លាប់ចោល ទើបជនរងគ្រោះប្រគល់ម៉ូតូឱ្យជនសង្ស័យជិះរត់គេចខ្លួនបាត់ស្រមោល ភ្លាមៗនោះជនរងគ្រោះមិនបានទៅដាក់ពាក្យបណ្តឹងទេដោយបានទៅហៅ ប្រពន្ធមកដាក់ពាក្យបណ្តឹងត្រូវចោរប្លន់យកម៉ូតូ លុះពេលសមត្ថកិច្ចសួរដេញដោលចុះឡើងទើបដឹងថា ចោរប្លន់ម៉ូតូរបស់ប្តីទេ ។
ដោយឡែកជុំវិញករណីខាងលើនេះសមត្ថកិច្ចសង្ស័យថា ជនរងគ្រោះលេងល្បែងនៅហ្គា ណាវើលចាញ់អស់ម៉ូតូមួយគ្រឿងខ្លាចប្រពន្ធរករឿងទើបប្រឌិតថា ចោរប្លន់ម៉ូតូទៅវិញ ។ ម្យ៉ាងទៀតនៅកន្លែងកើតហេតុមិនមានសាក្សី និងមិនបានដាក់ពាក្យបណ្តឹងភ្លាមៗទេសុខចិត្តទៅហៅប្រពន្ធឲ្យមកដាក់ពាក្យបណ្តឹងជំនួស ។ ក្រោយពេលកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលបឹងកេងកង១ដើម្បីឱ្យសមត្ថកិច្ចតាមចាប់ជនសង្ស័យមកផ្តន្ទាទោសតាមច្បាប់ ៕
ចែករំលែកព័តមាននេះ