ខេត្តកំពង់ស្ពឺ ៖ បើទោះជាមានការបង្ក្រាបពីសំណាក់សមត្ថកិច្ចទៅលើក្រុមឈ្មួញរកស៊ីដឹកឈើដទៃជាបន្តបន្ទាប់ក្តី ប៉ុន្តែឈ្មួញឈើដែលកំពុងតែធ្វើសកម្មភាពនេះបន្តដឹកឈើយ៉ាងគគ្លើន ហើយមានសំណាងគេចពីសមត្ថកិច្ចគ្រប់ពេលវេលា ការដឹកជញ្ជូនឈើនេះទំនងជាមានការបើកដៃពីមន្ត្រីជំនាញបរិស្ថានដែនជម្រកសត្វព្រៃភ្នំឱរ៉ាល់ នេះបើតាមការបញ្ជាក់ពីមន្ត្រីនគរបាលស្រុកមួយរូប។ តាមប្រភពពីមន្ត្រីនគរបាលស្រុកឱរ៉ាល់ម្នាក់និយាយក្នុងលក្ខខណ្ឌមិនបញ្ចេញឈ្មោះថា ឈ្មួញឈើដែលកំពុងធ្វើសកម្មភាពស្ទូចដាក់រថយន្តនេះមានឈ្មោះ ណុប ឌី និងឈ្មោះ ធី រស់នៅក្នុងភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។
មន្ត្រីដដែលបានបន្តថាបុណ្យសក្តិតូចតាចដូចរូបគាត់មិនហ៊ានទៅក្បែរនោះទេ បើទោះជាដឹងថាក្រុមឈ្មួញកំពុងតែធ្វើសកម្មភាពស្ទូចឈើក៏ដោយ ហើយឈើនេះត្រូវបានដឹងថាគេដឹកចេញពីដែនជម្រកសត្វព្រៃភ្នំឱរ៉ាល់ យកមកដាក់ពង្រាយតាមផ្ទះរបស់ប្រជាលរដ្ឋនៅទល់មុខផ្ទះរបស់ឈ្មោះ ណុប ឌី មេឈ្មួញល្បីឈ្មោះមួយរូបដែលមិនចាញ់ ជឿង ថេង និង ឆេង ឡុង ឡើយ នៅក្នុងភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។
លុះមានឱកាសពួកឈ្មួញដឹកទៅលក់នៅច្រកព្រំដែនប្រទេសវៀតណាម តាមច្រកបាក់ដៃខេត្តតាកែវ ដែលមានបងធម៌ជាមេបញ្ជាការអាវុធហត្ថស្រុកម្នាក់អ្នកកាង និងរត់ការសម្រួលផ្លូវឲ្យចេញដោយរលូន។ រាល់ថ្ងៃក្រុមឈ្មួញនៅតែបន្តសកម្មភាពដឹកជញ្ជូនឈើយ៉ាងគគ្រឹកគគ្រេង បើនិយាយពីកាលថ្ងៃចូលឆ្នាំទាំង៣ថ្ងៃវិញ មេឈ្មួញឈ្មោះ ណុប ឌី នេះដឹកឈើតាមរថយន្តដូចជាហែរកឋិន តើឲ្យសមត្ថកិច្ចតូចតាចបង្ក្រាបម៉េចកើតបើជំនាញបរិស្ថាន លោក ខន សុខខុន ជានាយកដែនជម្រកសត្វព្រៃភ្នំឱរ៉ាល់ហាក់បីដូចជាព្រងើយកន្តើយមិនមានចំណាត់ការបង្ក្រាបទាល់តែសោះបើទោះបីជាដឹងថាឈើរបស់ក្រុមឈ្មួញលាក់ទុកក្នុងដែនគ្រប់គ្រងរបស់ខ្លួនក៏ដោយនោះ មិនឲ្យគេសង្ស័យយ៉ាងម៉េចកើត បើប្រជាពលរដ្ឋរកស៊ីដឹកអនុផលព្រៃឈើកាត់មុខទីស្នាក់ការដែនជម្រកសត្វព្រៃត្រូវបង់លុយមិនរំលងមួយគោយន្តផងនោះ ចាប់ពី៣ម៉ឺនរៀលរហូតដល់១០ម៉ឺនរៀល។
ជាងនេះទៅទៀតក្រុម (ក្រុមបង្ក្រាប) របស់លោក ឈៀង តុលា ប្រធានមន្ទីរកសិកម្មខេត្តកំពង់ស្ពឺ មិនដែលឃើញបង្ក្រាបបានក្រុមឈ្មួញម្តងណាឡើយ មួយដុំឈើក៏គ្មានផង។ ចាប់តាំងពីលោក ឈៀង តុលា ប្រធានមន្ទីរកសិកម្មឡើងកាន់តំណែងជិតមួយឆ្នាំហើយមិនដែលឃើញបញ្ចេញស្នាដៃដឹកនាំបង្ក្រាបបទល្មើសនោះទេ ឃើញតែអង្គុយក្នុងប៊ុយរ៉ូ(ក្នុងម៉ាស៊ីនត្រជាក់) ចាំតែបើកប្រាក់ខែពីរដ្ឋ និងអង្គុយចាំប្រមូលលុយពីកូនចៅដែលចេញប្រត្តិបត្តិការ(រកក្រៅ)ប្រចាំខែតែប៉ុណ្ណោះ៕
ចែករំលែកព័តមាននេះ