ខេត្តលណ្ដាល ៖ រយៈពេល៣ថ្ងៃក្នុងពិធីបុណ្យចូលឆ្នាំខ្មែរមានករណីអំពើហិ.ង្សាកើតឡើង៦លើកបណ្ដាលឱ្យរងរបួសធ្ងន់ស្រាលមនុស្សប្រុស-ស្រី៩នាក់ និងឃាត់ខ្លួនជនសង្ស័យបាន៦នាក់ដោយផ្តើមចេញពីការផឹកស្រវឹង រាំធុងបាសឌឺដងដាក់គ្នា និងជិះម៉ូតូប៉ាតម្សៅកៀរគ្នាទៅវិញទៅមកបង្កជាជម្លោះ
ខេត្តលណ្ដាល ៖ រយៈពេល៣ថ្ងៃក្នុងពិធីបុណ្យចូលឆ្នាំខ្មែរមានករណីអំពើហិង្សាកើតឡើង៦លើកបណ្ដាលឱ្យរងរបួសធ្ងន់ស្រាលមនុស្សប្រុស-ស្រី៩នាក់ និងឃាត់ខ្លួនជនសង្ស័យបាន៦នាក់ដោយផ្តើមចេញពីការផឹកស្រវឹង រាំធុងបាសឌឺដងដាក់គ្នា និងជិះម៉ូតូប៉ាតម្សៅកៀរគ្នាទៅវិញទៅមកបង្កជាជម្លោះ ។ នេះបើតាមរបាយការណ៍បូកសារុបរបស់ស្នងការដ្ឋាននគរបាលខេត្តកណ្តាលគិតចាប់ពីថ្ងៃទី១៤ ដល់១៦ ខែមេសា ឆ្នាំ២០១៧ ។
សូមបញ្ជាក់ថា ករណីហិង្សាដោយចេតនាលើកទី១កើតឡើងនៅវេលាម៉ោង៣និង២០នាទីរសៀល ថ្ងៃទី១៤ ខែមេសា ឆ្នាំ២០១៧ នៅចំណុចភូមិធំ ឃុំភូមិធំ ស្រុកកៀនស្វាយ ខេត្តកណ្តាល បណ្តាលឲ្យមានជនរងគ្រោះ៣ នាក់ ទី១-ឈ្មោះ យាន ចាន់សុវណ្ណរស្មី ភេទប្រុស អាយុ១៦ឆ្នាំ ជាសិស្ស ស្នាក់នៅភូមិតាព្រហ្ម សង្កាត់ ព្រែកឯង ខណ្ឌច្បារអំពៅ រងរបួសក្បាលផ្នែកខាងក្រោយ និងដៃខាងស្តាំបញ្ជូនទៅព្យាបាលនៅមន្ទីរពេទ្យបាយ័ន ។ ទី២-ឈ្មោះ ថោង ចិត្ត្រា ភេទស្រី អាយុ១៧ឆ្នាំ ស្នាក់នៅភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្តាល និងទី៣-ឈ្មោះ ម៉ាង ព្រហ្មម៉ាញ ភេទប្រុស អាយុ២០ឆ្នាំ រស់នៅភូមិចុងព្រែកសង្កាត់ ព្រែកឯង ខណ្ឌច្បារអំពៅ ជាកីឡាប្រដាល់រងរបួសស្រាល ។
ចំណែកជនល្មើសមានគ្នា១ក្រុម ឃាត់ខ្លួនបានម្នាក់មានឈ្មោះ ភី រម្យរាជ ភេទប្រុស អាយុ១៨ឆ្នាំ ស្នាក់នៅភូមិទួលត្នោត ឃុំគគីរ ស្រុកកៀនស្វាយ ខេត្តកណ្តាល ជាជាងជួសជុលទូរស័ព្ទ ក្នុងនោះក៏បានបណ្តាលឲ្យខូចខាតសម្ភាររួមមាន ម៉ូតូ២គ្រឿងម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ ភ្នំពេញ
1FT-5914 ចំនួន១គ្រឿង និងម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៧ ពាក់ស្លាកលេខ ភ្នំពេញ1DD-8605 ចំនួន១គ្រឿង ។ ដកហូតបានដាវកែច្នៃ១ដើមប្រវែង០,៦២ម៉ែត្រ ដងរុំកៅស៊ូពោះវៀនកង់ឡាន ពណ៌ខ្មៅ និងដុំថ្មបេតុងចំនួន២ដុំ ។ ដែលករណីនេះបានកើតឡើងដោយសារផ្តើមចេញពីការផឹកស៊ី រួចបង្កជាជម្លោះ ។
ករណីទី២កើតហេតុវេលាម៉ោង៨និង៣០នាទីយប់ ថ្ងៃទី១៤ ខែមេសា ឆ្នាំ២០១៧ នៅចំណុចផ្លូវបំបែកលោកយាយ.ស ភូមិអរិយក្សត្រ ឃុំអរិយក្សត្រ ស្រុកល្វាឯម ខេត្តកណ្តាល បណ្តាលឲ្យមានជនរងគ្រោះ២នាក់ ទី១-ឈ្មោះ ប្រាក់ ណារិន ហៅក្រិន ភេទប្រុស អាយុ៣២ឆ្នាំ ជាមន្ត្រីនគរបាលប៉ុស្តិ៍អរិយក្សត្រ ស្នាក់នៅភូមិអរិយក្សត្រ ឃុំអរិយក្សត្រ ស្រុកល្វាឯម ខេត្តកណ្តាល និងទី២-ឈ្មោះ ស គឹមអ៊ន ភេទប្រុស អាយុ ៥៧ឆ្នាំ ជាអនុប្រធានភូមិ ស្នាក់នៅភូមិអរិយក្សត្រ ឃុំអរិយក្សត្រ ស្រុកល្វាឯម ខេត្តកណ្តាល ។ ឃាត់ខ្លួនបានជនសង្ស័យម្នាក់ឈ្មោះ ញ៉ែម បូរី ហៅក្រក ភេទប្រុស អាយុ៣៩ឆ្នាំ ជាកសិករ ស្នាក់នៅភូមិអរិយក្សត្រ ឃុំអរិយក្សត្រ ស្រុកល្វាឯម ខេត្តកណ្តាល ដកហូតបានកាំបិត១ ។ មូលហេតុគឺផ្តើមចេញពីការផឹកស៊ី រាំកម្សាន្តរហូតផ្តើមជាជម្លោះវាយ និងកាប់ទៅលើសមត្ថកិច្ច និងអនុប្រធានភូមិដែលចូលទៅឃាត់បណ្តាលឲ្យរបួសផងដែរ ។
ករណីទី៣ វេលាម៉ោង៤និង៥៨នាទីរសៀល កើតហេតុនៅថ្ងៃទី១៤ ខែមេសា ឆ្នាំ២០១៧ នៅចំណុចភូមិព្រែកត្រែង ឃុំសិត្បូ ស្រុកស្អាង ខេត្តកណ្ដាល បណ្តាលឲ្យមានជនរងគ្រោះម្នាក់ឈ្មោះ ហ៊ំ ស្រីពៅ ភេទស្រី អាយុ២១ឆ្នាំ ជាកម្មករ ស្នាក់នៅភូមិឃុំកើតហេតុរបួសផ្ទៃមុខ ដោយបានផ្តើមចេញពីជនសង្ស័យ២ក្រុមអ្នកលេងប៉ាតម្សៅជាង១០នាក់ ទី១-ឈ្មោះ ផល រស្មី ហៅឡាយ ភេទប្រស អាយុ២៥ឆ្នាំ ស្នាក់នៅភូមិឃុំកើតហេតុបានរត់គេចខ្លួន ក្រៅពីនេះពុំស្គាល់អត្តសញ្ញាណ និងក្រុមម្ខាងទៀតជាអ្នកជិះម៉ូតូមានគ្នា១០នាក់ ទី១-ឈ្មោះ ម៉ក់ សុខេង ភេទប្រុស អាយុ១៩ឆ្នាំ ស្នាក់នៅភូមិព្រែកថី ឃុំរកាខ្ពស់ស្រុកស្អាងខេត្តកណ្ដាល ក្រៅពីនេះពុំស្គាល់ឈ្មោះនៅភូមិព្រែកថ្មីជាមួយគ្នា ។ មូលហេតុគឺផ្តើមចេញពីការលេងប៉ាតម្ស៉ៅក៏បង្កជាជម្លោះវាយគ្នាត្រូវចំនារីរងគ្រោះកំពុងដើរកាត់តែម្តង ។
ករណីទី៤វេលាម៉ោង១និង៣០នាទីរសៀល កើតហេតុថ្ងៃទី១៥ ខែមេសា ឆ្នាំ២០១៧ នៅចំណុចភូមិក្រូចសើច ឃុំពុកឫស្សី ស្រុកខ្សាច់កណ្តាល ខេត្តកណ្តាល បណ្តាលឲ្យមានជនរងគ្រោះម្នាក់ ឈ្មោះ សំរិទ្ធ ចន្ថា ភេទប្រុស អាយុ៤៣ឆ្នាំ ជាកសិករស្នាក់នៅភូមិ-ឃុំកើតហេតុ បានរងរបួសម្រាមដៃ។ ចំណែកជនសង្ស័យមានឈ្មោះ ថន វុទ្ធី ហៅចាម ភេទប្រុស អាយុ៣៦ឆ្នាំ ជាកសិករ ស្នាក់នៅភូមិ-ឃុំកើតហេតុ ។ ដកហូតបានកណ្តៀវចំនួន១ ។ មូលហេតុគឺផ្តើមចេញពីការផឹកស៊ីស្រវឹងឈ្លោះគ្នា ។
ករណីទី៥ កើតឡើយនៅវេលាម៉ោង៥និង៤០នាទីរសៀល ថ្ងៃទី១៥ ខែមេសា ឆ្នាំ២០១៧ នៅចំណុចមុខផ្ទះឈ្មោះ ពុធ ឃុត ស្ថិតក្នុងភូមិក្អមសំណរលើ ឃុំក្អមសំណរ ស្រុកលើកដែក ខេត្តកណ្តាល បណ្តាលឲ្យមានជនរងគ្រោះម្នាក់ឈ្មោះ រិន ណារ៉េត ភេទប្រុស អាយុ១៨ឆ្នាំ ជាកម្មករ ស្នាក់នៅភូមិក្អមសំណរលើ ឃុំក្អមសំណរ ស្រុកលើកដែក ខេត្តកណ្តាល ។ ចំណែកជនសង្ស័យមានឈ្មោះ ជន ម៉ាយ ភេទប្រុស អាយុ២០ឆ្នាំ ជាកម្មករ ស្នាក់នៅភូមិ-ឃុំកើតហេតុជាមួយគ្នា ។ ដកហូតបានដំបងមែកល្មុតមួយមានប្រវែង០,៨០ម៉ែត្រ ។ មូលហេតុបណ្តាលមកពីការផឹកស៊ីស្រវឹងបង្កជាទំនាស់ពាក្យសម្តីវាយគ្នា ។
ករណីលើកទី៦ កើតឡើយនៅវេលាម៉ោង៩និង៣០នាទីយប់ ថ្ងៃទី១៦ ខែមេសា ឆ្នាំ២០១៧ នៅចំណុចវត្តឱង្ការាម ភូមិគរ ឃុំក្រាំងយ៉ូវ ស្រុកស្អាង ខេត្តកណ្ដាល ។ បណ្តាលឲ្យមានជនរងគ្រោះឈ្មោះ ស៊ូវ សែត ភេទប្រុស អាយុ៣៤ឆ្នាំ ជាកសិករ ស្នាក់នៅភូមិគរ ឃុំក្រាំងយ៉ូវ ស្រុកស្អាង ខេត្តកណ្ដាល បែកក្បាលដេរ១១ថ្នេរ ។ ចំណែកជនសង្ស័យមាន ឈ្មោះ យ៉េន ស្នា ភេទប្រុស អាយុ២៦ឆ្នាំ ជាកសិករ មានទីលំនៅភូមិអម្ពិលលាស់ ឃុំក្រាំងយ៉ូវ ស្រុកស្អាង ខេត្តណ្ដាល ត្រូវបានឃាត់ខ្លួន ។ ដកហូតបានកាំបិតច្នៃធ្វើពីដែកផ្លែរណាយក្សចំនួន១ ។ មូលហេតុ បណ្តាលមកពីការរាំធុងបាសបង្កជាជម្លោះតែម្តង ៕
ចែករំលែកព័តមាននេះ