រាជធានីភ្នំពេញ ៖ បុរសជាជនសង្ស័យពីបទ.ឆបោកម្នាក់ត្រូវបានបុរសជាជនរងគ្រោះចាប់ខ្លួនយកប្រគល់ឱ្យកម្លាំងនគរបាលប៉ុស្តិ៍ទន្លេបាសាក់ក្រោយពីរូបគេបានខ្ចីម៉ូតូម៉ាកហុងដាC125មួយគ្រឿង របស់ដោយប្រាប់ថា «ជិះទៅឌុបមិត្តភក្តិដើរលេង» បែរជាយកទៅបញ្ចាំបានលុយចំនួន៥០០ដុល្លាររួចចូលកាស៊ីណូណាហ្គា លេងល្បែងចាញ់អស់គ្មានសល់ ។ ការឃាត់ខ្លូននេះដែរបានធ្វើឡើងកាលពីវេលាម៉ោង៩ព្រឹក ថ្ងៃទី១៨ ខែ មេសា ឆ្នាំ២០១៧ នៅក្នុងផ្ទះសំណាក់យីហោ តាយ ហេង ដែលមានទីតាំងស្ថិតនៅតាមបណ្តោយផ្លូវសុធារស ភូមិ១ ក្នុងសង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មានពីនគរបាលប្រាប់ឱ្យដឹងថា បុរសជាជនសង្ស័យមានឈ្មោះ ឡាយ ធីម អាយុ២៨ឆ្នាំ ជាអ្នកបើកឡានដឹកសិស្ស បច្ចុប្បន្នស្នាក់នៅក្នុងសង្កាត់ភ្នំពេញថ្មី ខណ្ឌសែនសុខ មានស្រុកកំណើតនៅភូមិត្បែង ឃុំគោកព្រីង ស្រុកស្វាយជ្រុំ ខេត្តស្វាយរៀង ។ រីឯជនរងគ្រោះឈ្មោះ ញឹប អុល ភេទប្រុស អាយុ ២៧ឆ្នាំ ជានិស្សិត ស្នាក់នៅផ្ទះជួល ក្នុងសង្កាត់ទឹកថ្លា ខណ្ឌសែនសុខ មានស្រុកកំណើតនៅភូមិឃុំខាងលើជាមួយគ្នា ។ មុនពេលកើតហេតុកាលពីវេលាម៉ោង១០យប់ ថ្ងៃទី១៧ ខែមេសា ឆ្នាំ២០១៧ កន្លងមកនេះ ក្រោយពីចប់ចូលឆ្នាំនោះបុរសជាជនរងគ្រោះបានឌុបបុរសជាជនសង្ស័យតាមម៉ូតូម៉ាកហុងដាC125 ពណ៌ខ្មៅ ស៊េរីឆ្នាំ២០១៣ ពាក់ស្លាកលេខ កំពត1G-6750 ពីស្រុកកំណើតមកកាន់ភ្នំពេញដើម្បីបំពេញការងារវិញ ។
តាមប្រភពដដែលបានបន្តទៀតថា ដោយពួកគេមកដល់ភ្នំពេញវិញយប់ជ្រៅទៅហើយនោះពួកគេក៏ចូលមកស្នាក់នៅក្នុងផ្ទះសំណាក់ដែលមានយីហោ តាយ ហេង ដើម្បីស្នាក់នៅមួយយប់សិនមកដល់ភ្លាមបុរសរូបនោះក៏បានខ្ចីម៉ូតូដោយប្រាប់ថា «ខ្ចីជិះទៅឌុបមិត្តភក្តិដើរលេង» ។ លុះព្រឹកឡើងទើបបានឃើញរូបគេត្រឡប់មកដល់បន្ទប់ផ្ទះសំណាក់វិញហើយបានលូកហោប៉ៅខោអាវរបស់បុរសជាជនរងគ្រោះដើម្បីលួចយកកាតគ្រីម៉ូតូបន្ថែមទៀត ក៏ត្រូវបានបុរសជាជនរងគ្រោះចាប់សួរនាំរកម៉ូតូទើបត្រូវគេប្រាប់ថា «ម៉ូតូនោះត្រូវបានរូបគេយកទៅបញ្ចាំបានលុយចំនួន៥០០ដុល្លារ និងយកទៅលេងល្បែងស៊ីសងចាញ់អស់រលីងហើយ»បន្ទាប់មកជនរងគ្រោះក៏ចាប់ខ្លួនយកទៅប្រគល់ឱ្យនគរបាលប៉ុស្តិ៍ទន្លេបាសាក់ចាត់ការទៅតាមផ្លូវច្បាប់តែម្តង ៕
ចែករំលែកព័តមាននេះ