ខេត្តសៀមរាប ៖ ហេង សៅឌី បានឈ្នះតំណែងស្ដេចអុកអង្គរសង្ក្រាន្តប្រចាំឆ្នាំ២០១៧ដោយទទួលបានប្រាក់រង្វាន់សរុបចំនួន៣២លានរៀលក្នុងនោះបានពីគណៈកម្មាធិការជាតិអូឡាំពិកកម្ពុជា១២លានរៀល និងសម្ដេចតេជោ ហ៊ុន សែន ២០លានរៀល បន្ទាប់ពីផ្ដួលអ្នកលេងអុកចាស់វស្សា ប៊ិន គាសេង នៅក្នុងការប្រកួតផ្ដាច់ព្រ័ត្រ កាលពីថ្ងៃទី១៦ មេសា នៅមុខប្រាសាទអង្គរវត្ត ខេត្តសៀមរាប ។
នេះជាឆ្នាំដំបូងហើយដែលកីឡាករមកពីរាជធានីភ្នំពេញរូបនេះបានក្លាយជាស្ដេចអុកអង្គរសង្ក្រាន្តប្រចាំឆ្នាំ២០១៧ បន្ទាប់ពីបរាជ័យអស់រយៈពេល២ឆ្នាំកន្លងមក។
កីឡាករ ហេង សៅឌី បានយកឈ្នះកីឡាករ ប៊ិន គាសេង មកពីខេត្តក្រចេះដោយបច្ចេកទេសតែម្ដង ខណៈកីឡាករ ឆយ វីរ៉ា មកពីរាជធានីភ្នំពេញទទួលបានជ័យលាភីលេខ៣ ក្រោយពីយកឈ្នះកីឡាករ ឈាវ បូរ៉ា មកពីរាជធានីភ្នំពេញដូចគ្នា ។
សូមរំលឹកថា ឈាវ បូរ៉ា ធ្លាប់គ្រងតំណែងជាស្ដេចអុក២ឆ្នាំជាប់គ្នា គឺឆ្នាំ២០១៤ និង ២០១៥ រីឯកីឡាករ ឆយ វីរ៉ា ធ្លាប់គ្រងតំណែងជើងឯកពានរង្វាន់សម្ដេចអគ្គមហាសេនាបតីតេជោ ហ៊ុន សែន បានម្ដង ។ នៅក្នុងការប្រកួតស្ដេចអុកអង្គរសង្ក្រាន្ត ឆយ វីរ៉ា តែងតែភ្លាត់ស្នៀតបរាជ័យពុំបានឡើងទៅវគ្គ៨នាក់ចុងក្រោយឡើយ ទើបតែឆ្នាំ២០១៧នេះដែលគេបានឡើងដល់វគ្គ៨នាក់ចុងក្រោយ ព្រមទាំងដណ្ដើមបានជ័យលាភីលេខ៣ ។
ជ័យលាភីលេខ២ កីឡាករ ប៊ិន គាសេង ទទួលបានពានជើងឯករង និងទឹកប្រាក់សរុប២០លានរៀលក្នុងនោះ៨លានរៀលបានពីគណៈកម្មាធិការជាតិអូឡាំពិកកម្ពុជា និង១២លានរៀលបានពីសម្ដេចតេជោ ហ៊ុន សែន។ កីឡាករ ឆយ វីរ៉ា ជ័យលាភីលេខ៣ ទទួលបានទឹកប្រាក់សរុប១២លានរៀលក្នុងនោះ៤លានរៀលបានពីគណៈកម្មាធិការជាតិអូឡាំពិក កម្ពុជា និង៨លានរៀលបានពីសម្ដេចតេជោ ហ៊ុន សែន ។ កីឡាករ ឈាវ បូរ៉ា ជ័យលាភីលេខ៤ ទទួលបានទឹកប្រាក់សរុប៧លានរៀលក្នុងនោះ៣លានរៀលបានពីគណៈកម្មាធិការជាតិអូឡាំពិកកម្ពុជា និង៤លានរៀលបានពីសម្ដេចតេជោ ហ៊ុន សែន ។
គួរបញ្ជាក់ថា ចំពោះកីឡាករ រស់ រិទ្ធីយ៉ា, លឹម ផល្លា, ម៉ី កែវនិម្មិត និងកីឡាករ កាំង ហេង ដែលទទួលបានជ័យលាភីចាប់ពីលេខ៥ ដល់លេខ៨នោះ ក៏ទទួលបានទឹកប្រាក់ចំនួន២លានរៀលស្មើៗគ្នាពីសម្ដេចតេជោ ហ៊ុន សែន ផងដែរ ៕
ចែករំលែកព័តមាននេះ