រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពវាយប្លន់យកម៉ូតូពីនារីរងគ្រោះបានសម្រេច កាលពីវេលាម៉ោង៨និង២០នាទីយប់ ថ្ងៃទី១៧ មេសា ត្រង់ចំណុចច្រកចូលមុខធនាគារមួយ ក្នុងភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ។
ស្ត្រីរងគ្រោះឈ្មោះម៉ាស្រី តាល់ អាយុ២១ឆ្នាំ ជាកម្មករិនីកាត់ដេរ ស្នាក់នៅភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ។ ម៉ូតូដែលចោរវាយប្លន់យកទៅបាត់នោះម៉ាកZOOMERX ពណ៌ខៀវ ពាក់ផ្លាកលេខភ្នំពេញ១DO3339 ស៊េរី២០១៦ ។
តាមសម្ដីនារីរងគ្រោះបានឲ្យដឹងថា មុនពេលកើតហេតុរូបគេបានជិះម៉ូតូម៉ាកZOOMERX ត្រឡប់មកពីលេងផ្ទះជីដូននៅផ្សារទូលទំពូង ធ្វើដំណើរទិសដៅពីកើតទៅលិច លុះមកដល់ចំណុចកើតហេតុ ស្រាប់តែលេចមុខជនសង្ស័យបានដើរទៅទាញដៃនាងធ្លាក់លើម៉ូតូរួចរុញដួលកប់ភក់ ហើយនាងបានក្រោកស្រវេស្រវាចាប់ទាញម៉ូតូ តែត្រូវជននោះឡើងជិះម៉ូតូយ៉ាងលឿនចេញទៅបាត់ ។
ក្រោយពេលកើតហេតុនារីរងគ្រោះបានទៅដាក់ពាក្យបណ្តឹងនៅឯប៉ុស្តិ៍នគរបាលចោមចៅ ដើម្បីឱ្យសមត្ថកិច្ចស្រាវជ្រាវចាប់ជនសង្ស័យយកមកផ្តន្ទាទោសតាមផ្លូវច្បាប់ ៕
ចែករំលែកព័តមាននេះ