ខេត្តព្រះសីហនុ ៖ លំនៅដ្ឋានអនុប្រធានមណ្ឌលសុខភាពឃុំអណ្តូងថ្មមួយខ្នងត្រូវបានជនមិនស្គាល់មុខគាស់ចូលលួចយកទ្រព្យសម្បត្តិមានតម្លៃអស់គ្មានសល់ក្នុងខណៈពេលដែលក្រុមគ្រួសារខាងលើនេះបាននាំគ្នាទៅលេងនឹងពិនិត្យសុខភាពនៅប្រទេសថៃ ។ ហេតុការណ៍នេះនាំឲ្យមានកាភ្ញាក់ផ្អើលកើតឡើងកាលពីវេលាម៉ោង២និង១០នាទីរសៀល ថ្ងៃទី១៧ ខែមេសា ឆ្នាំ២០១៧ នៅចំណុចភូមិត្រពាំងស្អុយ ឃុំអណ្តូងថ្ម ស្រុកព្រៃនប់ ខេត្តព្រះសីហនុ ។
តាមប្រភពពីមន្ត្រីមូលដ្ឋានបានឲ្យដឹងថា លំនៅដ្ឋានដែលត្រូវក្រុមជនមិនស្គាល់មុខធ្វើសកម្មភាពនេះ ជារបស់ឈ្មោះ ម៉ក់ ម៉ារ៉ា ជាអនុប្រធានមណ្ឌលសុខភាពឃុំអណ្តូងថ្មដែលមានប្តីឈ្មោះ សេង វណ្ណៈអាយុ៣៨ឆ្នាំ ជាមន្ត្រីនគបាល ។ ជនមិនស្គាល់មុខបានគាស់ចូលតាមបង្អួចផ្ទះ និងទ្វាបន្ទប់ ហើយបានយកទ្រព្យសម្បត្តិរួមមាន ខ្សែដៃផ្លាកទី១ខ្សែទំងន់២ដំឡឹង, ខ្សែដៃមាស២ខ្សែ ១ខ្សែទំងន់៣ដំឡឹង នឹង១ដំឡឹងកន្លះ១ខ្សែ, ជញ្ជៀនមាស១វង្យទំងន់២ជី, លុយដុល្លារចំនួន៥.០០០ដុល្លារ និងលុយរៀល៥លានរៀល ។
ប្រភពដដែលបានបន្តទៀតថា ជនរងគ្រោះដែលជាម្ចាស់ផ្ទះបាននាំគ្នាទៅលេង និងពិនិត្យសុខភាពនៅប្រទេសថៃតាំងពីថ្ងៃទី១៣ ខែមេសា ឆ្នាំ២០១៧ ហើយរហូតដល់ថ្ងៃ១៧ ខែមេសា ឆ្នាំ២០១៧ ទើបត្រឡប់មកវិញ លុះមកដល់បានមួយសន្ទុះក៏មានការស្រឡាំងកាំង ព្រោះតែបន្ទប់ក្នុងផ្ទះត្រូវបានខុសប្រក្រតី សម្លឹងទៅកន្លែងទុកទ្រព្យសម្បត្តិត្រូវបានគាស់ខ្ទេចខ្ទីយកអស់គ្មានសល់ ។
ប្រភពនោះបានបន្ថែមថា ការធ្វើកម្មភាពរបស់ជនសង្ស័យមិនដឹងថា តាំងពីថ្ងៃណានោះទេក្នងរយៈពេលដែលម្ចាស់ផ្ទះទៅថៃ ។ សមត្ថកិច្ចកំពុងធ្វើការស្រាវជាវយ៉ាងយកចិត្តទុកដាក់បំផុតដើម្បីឈានទៅចាប់ក្រុមជនល្មើសព្រោះក្នុងឃុំអណ្តូងនេះករណីគាស់ផ្ទះលូចយកទ្រព្យសម្បត្តិកើតឡើង២ករណី ដោយជនសង្ស័យយកទៅដោយសុវត្ថិភាព ។ ជាមួយគ្នានេះដែរករណីដាក់ថ្នាំសណ្តំនាំទៅដោះគ្រឿងមានតំលៃក៏កំពុងតែរីកដុះដាលផងដែរហើយក៏មិនត្រូវទាន់បានបង្ក្រាបបាននៅឡើយ ៕
ចែករំលែកព័តមាននេះ