ខេត្តសៀមរាប ៖ កម្លាំងនគរបាលស្រុកពួក បានចុះស្រាវជ្រាវរហូតឃាត់ខ្លួនជនដៃដល់បាន ពាក់ព័ន្ធករណីឃាតកម្មវាយសម្លាប់បងស្រីបង្កើតរបស់ខ្លួន ក្នុងទំនាស់សម្តីគ្នាតិចតួច ស្រាប់តែទៅយកចបជីកវាយចំបែកក្បាល និងបែកមុខ ហូរឈាមពេញខ្លួន និងស្លាប់ភ្លាមៗ ហើយជនសង្ស័យរូបនេះ រត់ចូលព្រៃបាត់ ។
ហេតុការណ៍ឃាត់ខ្លួនធ្វើឡើង កាលពីវេលាម៉ោង០៩ និង៣០នាទីយប់ថ្ងៃទី១៧ មេសា ស្ថិតនៅចំណុចភូមិចំបក់ហែរ ឃុំពួក ស្រុកពួក ខេត្តសៀមរាប ។ ជនសង្ស័យខាងលើ ឈ្មោះក្តឹប សុផល ហៅ(ខុញ) អាយុ៣២ឆ្នាំ មានទីលំនៅភូមិឃុំកើតហេតុខាងលើ ។ រីឯជនរងគ្រោះ ជាបងស្រីបង្កើតជនដៃដល់ឈ្មោះក្តឹប ផល្លា អាយុ៤៣ឆ្នាំ នៅភូមិកើតហេតុ ។
ប្រភពឱ្យដឹងថា ក្រោយវាយសម្លាប់បងស្រីរួច ជនសង្ស័យបានរត់ចូលព្រៃ លុះនៅវេលាម៉ោង៤ទៀបភ្លឺ បានចេញពីព្រៃមកផ្ទះវិញ ក៏ត្រូវប៉ូលិសស្រុកពួកឃាត់ខ្លួនតែម្តង។ បច្ចុប្បន្ន កម្លាំងជំនាញកំពុងកសាងសំណុំរឿងបញ្ជូនជនសង្ស័យ និងវត្ថុតាងទៅសាលាដំបូងខេត្តនៅព្រឹកថ្ងៃទី១៨ មេសា នេះ ។
ចែករំលែកព័តមាននេះ