ខេត្តកែប ៖ តាមសេចក្តីរាយការណ៍បានឱ្យដឹងថា មានករណីចោរលួចគាស់សោរទ្វាររថយន្តរបស់ភ្ញៀវទេសចរណ៍បរទេសមួយគ្រឿងម៉ាក HILUXREVO ពាក់ស្លាកលេខ ថៃ៧៩២៩ ដែលចតទុកចោលក្រោយផ្ទះសំណាក់ឆ្នេរ ស្ថិតក្នុងភូមិថ្មី សង្កាត់ព្រៃធំ ក្រុងកែប ខេត្តកែប ។ តាមសមត្ថកិច្ចនគរបាលខេត្តកែបបានឲ្យដឹងថា ក្នុងករណីជនមិនស្គាល់អត្តសញ្ញាណចូលលួចចាក់សោរបើកទ្វាររថយន្តភ្ញៀវទេសចរណ៍បរទេសនេះបានកើតឡើងកាលពីវេលាម៉ោង១១និង៣០នាទីថ្ងៃត្រង់ ថ្ងៃទី១៦ ខែមេសា ឆ្នាំ២០១៧ នៅខាងក្រោយផ្ទះសំណាក់ខាងលើ ។
សមត្ថកិច្ចឲ្យដឹងទៀតថា ការធ្វើសកម្មភាពពីសំណាក់ជនមិនស្គាល់អត្តសញ្ញាណខាងលើគឺបណ្តាលឲ្យបាត់បង់នូវសម្ភាររបស់ជនរងគ្រោះអស់មួយចំនួនដែលទុកនៅក្នុងរថយន្តមាន អាយផេតមួយគ្រឿង ប្រាក់អឺរ៉ូចំនួន២០០អឺរ៉ូ ទូរសព្ទ័ដៃ១គ្រឿង ឯកសាររថយន្តមួយចំនួន ។ ក្រោយពីធ្វើសកម្មភាពរួចជនសង្ស័យបានគេចខ្លួនបាត់ដោយសុវត្ថិភាព ។
សមត្ថកិច្ចបានឲ្យដឹងទៀតថា ជនរងគ្រោះមានឈ្មោះ RUFS TROM ភេទប្រុស អាយុ៥៧ឆ្នាំ ជនជាតិស៊ុយអែត និងស្ត្រីឈ្មោះ UNG អាយុ៤៩ឆ្នាំ រស់នៅប្រទេសបារាំង ។ ចំណែកពាក់ព័ន្ឋនឹងករណីខាងលើសមត្ថកិច្ចកំពុងស្រាវជ្រាវរកមុខសញ្ញាជនល្មើសដើម្បីចាប់មកផ្តន្ទា ៕
ចែករំលែកព័តមាននេះ