ព្រួតវាយគ្នាឡើងសន្លប់ស្រែកថាចោរ យកដល់ពេទ្យចោទថាប៉ុនប៉ងរំលោ.ភ
ខេត្តស្វាយរៀង ៖ បុរសម្នាក់ស្រវឹងស្រាជោគជាំវង្វេងរកផ្លូវទៅផ្ទះឪពុកមិនឃើញ បានដើរចូលផ្ទះគេត្រូវម្ចាស់ផ្ទះស្រែកថាចោរៗ រួចព្រួតគ្នាវាយរហូតបាក់ឆ្អឹងជំនី២
ខេត្តស្វាយរៀង ៖ បុរសម្នាក់ស្រវឹងស្រាជោគជាំវង្វេងរកផ្លូវទៅផ្ទះឪពុកមិនឃើញ បានដើរចូលផ្ទះគេត្រូវម្ចាស់ផ្ទះស្រែកថាចោរៗ រួចព្រួតគ្នាវាយរហូតបាក់ឆ្អឹងជំនី២ និងពកក្បាលសន្លប់ឈឹងត្រូវអ្នកជិតខាងស្គាល់មកឃាត់ កុំអីត្រូវតុលាការប្រជាពលរដ្ឋកាត់ទោសវាយប្រហារស្លាប់អាសារបង់។ ចុងក្រោយម្ចាស់ផ្ទះប្តូរបទចោទប្តឹងសមត្ថកិច្ចថា ជនរងគ្រោះប៉ុនប៉ងរំលោភជាបទឧក្រិដ្ឋ។ ក្រុមគ្រួសារអំពាវនាវរកយុត្តិធម៌ កាលពីវេលាម៉ោង៣រសៀល ថ្ងៃទី១៧ មេសា ២០១៧ នៅមន្ទីរពេទ្យខេត្តស្វាយរៀង។
បើតាមសមត្ថកិច្ចបានឲ្យដឹងថា កាលពីថ្ងៃទី១៥ មេសា ២០១៧ វេលាម៉ោងប្រមាណ៨យប់ នៅភូមិក្រួស ឃុំក្រួស ស្រុកស្វាយជ្រំ មានបុរសម្នាក់ស្រវឹងស្រាជោគ វង្វេងដើរសួរគេថាផ្លូវណាទៅផ្ទះឪពុកខ្លួន ក្រោយមកដើរចូលទៅផ្ទះឈ្មោះ អ៊ុក សុភាព ភេទស្រី អាយុ៤៨ឆ្នាំ ជាស្ត្រីមេម៉ាយ នៅភូមិកើតហេតុខាងលើ បានស្រែកថាចោរៗៗ ធ្វើឲ្យផ្អើលដល់អ្នកជិតខាង និងកូនៗគិតថាចោរមែន ក៏ព្រួតវាយរហូតជនរងគ្រោះបាក់ឆ្អឹងជំនី២ និងពកក្បាលហើមពោសន្លប់នៅនឹងកន្លែង។
ក្រោយមកអ្នកភូមិម្នាក់បានស្គាល់ថា ជាកូនលោកតា ងិន សារឿន អាចារ្យវត្តក្រួស ក៏បានឃាត់ឈប់ឲ្យវាយទើបផុតពីការស្លាប់។ ប្រភពដដែលបន្តទៀតថា ជនរងគ្រោះឈ្មោះ សៀង សុខខឿន អាយុ៣៦ឆ្នាំ មានប្រពន្ធនៅភូមិបឹងរការ ឃុំជើងភ្នំ ស្រុកបាភ្នំ ខេត្តព្រៃវែងបានមកលេងផ្ទះឪពុកនៅស្រុកំណើត ឈ្មោះ ងិន សារឿន អាយុ៥៩ឆ្នាំ ជាអាចារ្យវត្តក្រួស មានទីលំនៅ ភូមិរវៀង ឃុំក្រួស ស្រុកស្វាយជ្រំ។
បន្ទាប់មកអ្នកភូមិក៏ទូរសព្ទ័ប្រាប់ឪពុកមកយកកូនទៅសង្គ្រោះនៅមន្ទីរពេទ្យ ដោយកូនប្រុសត្រូវគេព្រួតវាយរបួសធ្ងន់សន្លប់នៅខាងជើងវត្តក្រួស ខណៈនោះលោកតា ងិន សារឿនក៏បានជិះម៉ូតូមកមើលកូន ពេលមកដល់ស្រាប់តែឈ្មោះ អ៊ុក សុភាព ស្រែកថា ឪធ្វើអាចារ្យឯកូនធ្វើចោរ និយាយហើយនិយាយទៀតថែមទាំងចង្អុលមុខលោកតាទៀត យើលោកអាចារ្យ ឪធ្វើអាចារ្យ កូនធ្វើចោរ អ្នកស្រុកខ្លះ អន្ថើនចង់វាយលោកតាទៀត ដោយនិយាយថា ចង់វាយអាឪនេះណាស់ ខ្លួនធ្វើអាចារ្យ តាមពិតកូនជាចោរ។
ខណៈនោះលោកតាក៏សួរទៅសមត្ថកិច្ចគឺលោក រស់ អ៊ាន នាយនគរបាលប៉ុស្តិ៍រដ្ឋបាលឃុំក្រួស បានទៅដល់កន្លែងកើតហេតុមុនរឿងរ៉ាវយ៉ាងម៉េចខ្លះ លោកនាយប៉ុស្តិ៍ប្រាប់ថា គាត់មកដល់គេវាយសន្លប់បាត់ទៅហើយ។ បន្ទាប់មកសមត្ថកិច្ចឲ្យក្រុមគ្រួសារបញ្ជូនជនរងគ្រោះទៅមន្ទីរពេទ្យ បង្អែកស្រុកស្វាយជ្រំ ដោយរបួសធ្ងន់ធ្ងរសមត្ថកិច្ចបានបញ្ជូនទៅមន្ទីរពេទ្យខេត្តដើម្បីសង្គ្រោះ។
លោកតាងិន សារឿន ជាឪពុកបន្តទៀតថា ហើយអ្វីដែលក្រុមគ្រួសារលោកតាហួសចិត្តនោះស្រាប់តែ ឈ្មោះ អ៊ុក សុភាព ប្តូរបទចោទបែរជាប្តឹងសមត្ថកិច្ចថា កូនប្រុសគាត់ ជាជនរងគ្រោះពីបទប៉ុនប៉ងចាប់រលោភ ដោយអយុត្តិធម៌ និងបានចោទថា ជនរងគ្រោះបានទៅដេកចាំក្នុងផ្ទះមុនពេលខ្លួនចូលក្នុងផ្ទះឈ្មោះ សៀង សុខខឿន ចាប់អោប ប៉ុនប៉ងរំលោភ ទើបស្រែកឆោឡោ ឈ្មោះ សុខ ខឿន រត់ចេញមកក្រៅ ក៏ត្រូវកូនៗព្រួតវាយខណៈនោះអ្នកស្រុកក៏មកជួយវាយរហូតសន្លប់តែម្តង។
លោកតា ងិន សារឿន បន្តទៀតថា មុនពេលកើតហេតុ ប្អូនៗបានទូរសព្ទ័ហៅបងជាជនរងគ្រោះឲ្យមកលេង ហើយបាននាំគ្នាផឹកស៊ីលុះម៉ោង៦ល្ងាច លោកប្អូនបួសនៅវត្តក្រួសបានទូរសព្ទ័ហៅឲ្យមកលេងនៅវត្តក្រួស ក៏ទៅលេងលោកប្អូន បន្ទាប់ពីសួរសុខទុក្ខលោកប្អូនហើយក៏លាលោកប្អូនត្រលប់ទៅផ្ទះឪពុកវិញ។ ក៏ប៉ុន្តែដោយនៅក្នុងវត្តក្រួសមានចាក់ធុងបាសរាំលេងក្នុងពិធីបុណ្យចូលឆ្នាំថ្មីប្រពៃណីជាតិខ្មែរ ប្អូនៗបានបបួលបងជាជនរងគ្រោះចូលរាំលេងកម្សាន្តរហូតដល់ម៉ោង៨យប់ប្រាប់ប្អូនថា ទៅបទជើងក៏ចេញទៅបាត់។
ហើយពេលកើតហេតុថ្លង់នឹងសំឡេងធុងបាសទើបប្អូនៗមិនបានឮមកជួយ មិនគួរណាវាយចោទថាចោរ ចូលប្លន់សួរចុះសួរឡើងប្តូរបទចោទថាប៉ុនប៉ងរំលោភ។ បើតាមជនរងគ្រោះនិយាយថា ក្រោយពីបទជើងរួចខ្លួនវង្វេងច្រឡំផ្លូវ ក៏ដើរទៅសួរមីងម្នាក់(ឈ្មោះភាព) ដែលមានផ្ទះជិតវត្តក្រួសចម្ងាយប្រមាណ៣០ម៉ែត្រពីរបងវត្តថា មីងផ្លូវណា ផ្លូវទៅផ្ទះឪខ្ញុំ មីងម្នាក់នោះប្រាប់ថា ទៅត្បូងទៅ ពេលដើរបានបន្តិចស្រាប់តែស្ត្រីឈ្មាះ សុភាព ស្រែកឆោឡោថា ចោរៗ ពេលនោះ កូនៗរបស់ឈ្មោះភាព ចេញមកព្រួតវាយតែម្តងខ្លួនបានសំពះហើយប្រាប់ថាខ្ញុំមិនមែនចោរទេ ក៏ប៉ុន្តែគេមិនស្តាប់ព្រួតវាយរហូតរូបគេសន្លប់តែម្តង។
ហើយពេលដឹងខ្លួននៅឯមន្ទីរពេទ្យស្រាប់តែឈ្មោះ អ៊ុក សុភាព ប្តឹងសមត្ថកិច្ចថា ខ្លួន(សៀង សុខខឿន)ប៉ុនប៉ងចាប់រំលោភទៅវិញអយុត្តិធម៌ណាស់។ បច្ចុប្បន្នជនរងគ្រោះកំពុងសម្រាកព្យាបាលរបួសនៅមន្ទីរពេទ្យខេត្តដោយមានកម្លាំងសមត្ថកិច្ចនគរបាលស្រុកយាមកាមនៅខាងមុខបន្ទប់ និងមន្ត្រីនគរបាលខេត្តបានមកសាកសួរធ្វើកំណត់ហេតុជនរងគ្រោះនៅក្នុងមន្ទីរពេទ្យហើយប្រាប់ថា ឈ្មោះ អ៊ុក សុភាព ប្តឹងថា ប៉ុនប៉ងចាប់រំលោភ នេះជាទោសឧក្រិដ្ឋទើបក្រុមគ្រួសារលោកតាអាចារ្យ អំពាវនាវរកយុត្តិធម៌៕
ចែករំលែកព័តមាននេះ