រាជធានីភ្នំពេញ ៖ កូនរបស់អ្នកនឹងចម្លងយកនូវអ្វីដែលអ្នកបានធ្វើ ដូច្នេះវាជារឿងសំខាន់ណាស់ក្នុងការធ្វើជាគំរូដ៏ល្អ ។ តើអ្នកកំពុងបង្ហាញអាកប្បកិរិយាបែបណាចំពោះមុខកូនៗរាល់ថ្ងៃ ? កូនៗ និងក្មេងជំទង់របស់អ្នកតែងតែមើលអ្វីដែលអ្នកធ្វើ ។ ពួកគេមើលពីរបៀបដែលអ្នកដោះស្រាយភាពតានតឹង ពួកគេមើលពីរបៀបដែលអ្នកប្រព្រឹត្តចំពោះអ្នកដទៃ និងមើលពីរបៀបដែលអ្នកដោះស្រាយជាមួយនឹងអារម្មណ៍របស់អ្នក ។ វាជ្រាបចូលទៅក្នុងព័ត៌មានទាំងអស់ដូចជាអេប៉ុងតូចៗ ។ សូម្បីតែនៅពេលដែលអ្នកគិតថា កូនរបស់អ្នកមិនយកចិត្តទុកដាក់ក៏ដោយ ដូច្នេះវាជារឿងចាំបាច់ក្នុងការធ្វើជាគំរូវិជ្ជមាន ។
យោងតាមទ្រឹស្ដីសិក្សាសង្គម មនុស្សរៀនដោយការមើលអ្នកដទៃ ។ កុមារធ្វើត្រាប់តាមអាកប្បកិរិយារបស់មនុស្សពេញវ័យ ។ កុមារដែលបានមើលមនុស្សពេញវ័យជាមនុស្សឆេវឆាវរាល់ថ្ងៃក៏ក្លាយជាមនុស្សឆេវឆាវផងដែរ ។ អាស្រ័យហេតុនេះ អ្នកត្រូវយកចិត្តទុកដាក់ចំពោះរឿងដែលអ្នកកំពុងបង្រៀនកូនដោយអចេតនា ។
តើអ្នកកំពុងបង្ហាញអាកប្បកិរិយាបែបណា ? ពេលខ្លះ អ្នកអាចធ្វើគំរូអាកប្បកិរិយាមិនល្អសម្រាប់កូនរបស់អ្នកដោយមិនដឹងខ្លួន ។ សូមពិចារណាអំពីស្ថានភាពទាំងនេះ ។ ឧទាហរណ៍ ឪពុកម្នាក់ចំណាយពេលល្ងាចរបស់គាត់មើលទូរទស្សន៍ ប៉ុន្តែប្រាប់កូនស្រីអាយុ ១៤ ឆ្នាំរបស់គាត់ថា គាត់គួរតែអានបន្ថែម កុំមើលទូរទស្សន៍ ម្តាយរវល់នឹងលេងទូរស័ព្ទ តែប្រាប់កូនកុំឱ្យលេងទូរស័ព្ទ ។ ម្ដាយប្រាប់កូនស្រីឱ្យមានសន្តានចិត្តល្អចំពោះអ្នកដទៃ ប៉ុន្តែម្តាយបែរជាស្រែកដាក់អ្នកដទៃ ។ ឪពុកប្រាប់កូនរបស់គាត់ថា ពួកគេគួរតែញ៉ាំអាហារដែលមានសុខភាពល្អ ប៉ុន្តែគាត់លួចញ៉ាំបង្អែមបន្ទាប់ពីពួកគេចូលគេង ។
តើកូនរបស់អ្នកជឿ និងធ្វើតាមអ្នកទេ ? វាពិតជាលំបាកណាស់ក្នុងការធ្វើជាគំរូអាកប្បកិរិយា សមរម្យ ឱ្យកូនរបស់អ្នកឃើញគ្រប់ពេលវេលា ហើយគ្មាននរណាម្នាក់រំពឹងថា អ្នកល្អឥតខ្ចោះនោះទេ ។ ប៉ុន្តែអ្នកគួរព្យាយាមធ្វើជាគំរូពីច្បាប់ និងអាកប្បកិរិយាដែលអ្នកចង់ឱ្យកូនរបស់អ្នកធ្វើតាម ។ ជាឧទាហរណ៍ ប្រសិនបើអ្នកមិនចង់ឱ្យកូនរបស់អ្នកជក់ទេ អ្នកកុំប៉ះពាល់បារីឱ្យសោះ ប្រសិនបើអ្នកចង់ឱ្យកូនរបស់អ្នកមានភាពស្មោះត្រង់ អ្នកគួរតែព្យាយាមស្មោះត្រង់ជាពិសេសជាមួយកូនរបស់អ្នក ។ គិតអំពីអ្វីដែលអ្នកចង់ឱ្យកូនរបស់អ្នករៀនពីអ្នក ហើយព្យាយាមធ្វើជាគំរូក្នុងជីវិតរបស់អ្នក ។ ជាធម្មតា វានឹងមានពេលខ្លះ នៅពេលដែលអ្នកធ្វើខុស ឬមិនធ្វើអ្វីៗដូចដែលអ្នកបានគ្រោងទុក ។ ប៉ុន្តែ នោះមិនអីទេ ទោះបីជាអ្នកធ្វើខុសក៏ដោយ ។
ញ៉ាំអាហារមានសុខភាពល្អ ៖ នៅពេលដែលអ្នកញ៉ាំអាហារដែលមានសុខភាពល្អ និងធ្វើលំហាត់ប្រាណជាទៀងទាត់ អ្នកកំពុងធ្វើជាគំរូដ៏ល្អសម្រាប់កូនរបស់អ្នក ។ ជាការពិតណាស់ សូមព្យាយាមកុំធ្វើហួសហេតុ ឬដាក់កំហិតក្នុងការខិតខំរបស់អ្នកដើម្បីធ្វើជាគំរូដ៏ល្អ ។
បង្ហាញការគោរព និងបង្រៀនការយល់ចិត្ត ៖ ឪពុកម្តាយគ្រប់រូបចង់ចិញ្ចឹមកូនដែលមានចិត្តល្អចំពោះអ្នកដទៃ ។ គោលដៅនេះក្លាយជាការពិត នៅពេលអ្នកយកគំរូតាមការគោរព និងការយល់ចិត្តក្នុងជីវិតផ្ទាល់ខ្លួនរបស់អ្នក ។ ត្រូវគោរពអ្នកគ្រប់គ្នាដែលអ្នកប្រាស្រ័យទាក់ទងជាមួយ ហើយឆាប់ៗនេះកូនរបស់អ្នកនឹងធ្វើដូចគ្នា ។
ដោះស្រាយបញ្ហាបច្ចេកវិទ្យា ៖ មុននឹងអ្នកអាចនិយាយអ្វីទៅកាន់កូនរបស់អ្នក សូមក្រឡេកមើលរយៈពេលដែលអ្នកកំពុងចំណាយនៅមុខអេក្រង់ ។ ទោះបីជាអ្នកកំពុងធ្វើការ ឆ្លើយអ៊ីមែល និងធ្វើអ្វីដែលអ្នកគិតថា មានផលិតភាពក៏ដោយ អ្នកនៅតែធ្វើជាគំរូសម្រាប់កូនរបស់អ្នក ។ ដោះស្រាយការប្រើប្រាស់បច្ចេកវិទ្យារបស់អ្នកជាមុនសិន ហើយបន្ទាប់មកព្យាយាមកំណត់ស្តង់ដារមួយចំនួនសម្រាប់កុមារ ។
ប្រឹងប្រែងធ្វើការ ៖ ការអភិវឌ្ឍន៍ក្រមសីលធម៌ការងាររឹងមាំ គឺជាជំនាញជីវិតដែលក្មេងគ្រប់រូបត្រូវការ ។ មិនថា ខំធ្វើការនៅសាលា ការងារក្រៅម៉ោង ឬក្នុងក្រុមកីឡាទេ ក្មេងៗត្រូវមានក្រមសីលធម៌ការងារល្អ ។ មិនថាអ្នកទៅធ្វើការជារៀងរាល់ថ្ងៃ ឬអ្នកធ្វើការពីផ្ទះ អនុញ្ញាតឱ្យកូនរបស់អ្នកឃើញអ្នកធ្វើការ ។ សូម្បីតែការធ្វើការងាររួមគ្នាជាគ្រួសារ គឺជាវិធីដ៏ល្អមួយដើម្បីបណ្តុះក្រមសីលធម៌ការងារដ៏រឹងមាំនៅក្នុងកូនរបស់អ្នក ។
បង្ហាញពីជំនាញសង្គម និងអារម្មណ៍ ៖ យកចិត្តទុកដាក់លើជំនាញអារម្មណ៍ និងសង្គមផងដែរ ។ បង្ហាញកូនរបស់អ្នកពីរបៀបស្វាគមន៍នរណាម្នាក់ និងរបៀបសួរសំណួរនៅពេលពួកគេយល់ច្រលំ ។ ណែនាំពួកគេអំពីរបៀបជួបមិត្តថ្មី និងអញ្ជើញអ្នកដទៃឱ្យចូលរួម ។ បង្ហាញពីរបៀបគ្រប់គ្រងអារម្មណ៍ ដូចជាការខកចិត្ត ឬទុក្ខព្រួយជាដើម ។ ការងារចម្បងរបស់អ្នកក្នុងនាមជាឪពុកម្តាយ គឺជួយបណ្តុះកូនរបស់អ្នកទៅជាមនុស្សល្អ គោរព ស្មោះត្រង់ និងយកចិត្តទុកដាក់ ។ ហើយជួនកាលវិធីដែលស្រួលបំផុតដើម្បីធ្វើនោះ គឺធ្វើជាគំរូដ៏ល្អ ៕
អត្ថបទនេះផលិតឡើងក្រោមកិច្ចសហប្រតិបត្តិការជាមួយសាលារៀន វ៉េស្ទឡាញន៍ និងសាលារៀនណត្សឡាញន៍ ។ សម្រាប់វគ្គសិក្សាថ្មី កម្មវិធីមត្តេយ្យភាសាខ្មែរ និងអង់គ្លេស កម្មវិធីភាសាអង់គ្លេសសិស្សធំ កម្មវិធីភាសាចិន ចូលរៀនថ្ងៃទី ១ ខែវិច្ឆិកា ឆ្មាំ ២០២២ ។ ចំណែកម្មវិធីចំណេះទូទៅខ្មែរពីថ្នាក់ទី ១ ដល់ទី ១២ ចាប់ទទួលចុះឈ្មោះចូលរៀនជារៀងរាល់ថ្ងៃ ។ ការចុះឈ្មោះបុត្រធីតានៅសាលារៀនយើងខ្ញុំ លោកអ្នកនឹងទទួលបានពិន្ទុសន្សំកាន់តែច្រើន ដើម្បីប្តូរយកសម្ភារ ឬទូទាត់ជាមួយនិងសេវាសផ្សេងៗ ។
សាលារៀនជូននូវវេទិកា និងមធ្យោបាយសិក្សាយ៉ាងសម្បូរបែបជាមួយនឹងប្រព័ន្ធគ្រប់គ្រង សាលារៀន ប្រព័ន្ធគ្រប់គ្រង់ការសិក្សា និងអេបសាលារៀនជូនដល់មាតាបិតាសិស្ស និងសិស្សានុសិស្សក្នុងការគ្រប់គ្រងការសិក្សា និងតាមដានព័ត៌មានសិក្សារបស់បុត្រធីតាផងដែរ ។ សម្រាប់ព័ត៌មានបន្ថែម សូមទំនាក់ទំនងទូរស័ព្ទលេខ ៖ ០៩២ ៨៨៨ ៤៩៩ / ០១៥ ៨០៥ ១២៣ ៕
ចែករំលែកព័តមាននេះ