យី! ឱ្យខ្ចីមួយភ្លេតសោះស៊ីដាច់
ខេត្តឧត្តរមានជ័យ ៖ បុរសម្នាក់ត្រូវបានប៉ូលិសស្រុកអន្លង់វែង ធ្វើការឃាត់ខ្លួនពីបទរំលោ.ភលើទំនុកចិត្ត ដោយខ្ចីម៉ូតូពីបុរសម្នាក់ជិះមួយភ្លេតសោះ បែរជាចង់ស៊ីដាច់ ហេតុការណ៍នេះកើតឡើង
ខេត្តឧត្តរមានជ័យ ៖ បុរសម្នាក់ត្រូវបានប៉ូលិសស្រុកអន្លង់វែង ធ្វើការឃាត់ខ្លួនពីបទរំលោភលើទំនុកចិត្ត ដោយខ្ចីម៉ូតូពីបុរសម្នាក់ជិះមួយភ្លេតសោះ បែរជាចង់ស៊ីដាច់ ហេតុការណ៍នេះកើតឡើងកាលពីវេលាម៉ោង១១ព្រឹក ថ្ងៃទី១៥ ខែមេសា ឆ្នាំ២០១៧ តាមដងផ្លូវជាតិលេខP.R១៧៤ នៅក្នុងភូមិរំចេក ឃុំអន្លង់វែង ស្រុកអន្លង់វែង ។
ជនសង្ស័យឈ្មោះ ស ណាត ភេទប្រុស អាយុ២៥ឆ្នាំ រស់នៅភូមិសាលាទង ឃុំបារាយណ៍ ស្រុកបារាយរណ៍ ខេត្តកំពង់ធំ ដោយឡែកម្ចាស់ម៉ូតូឈ្មោះ ឡុង ថាវុធ ភេទប្រុស អាយុ២៥ឆ្នាំមានម៉ូតូម៉ាកហុងដាឌ្រីម C១២៥ ពណ៌ខ្មៅ ស៊េរី២០១៦ ពាក់ស្លាកលេខ ឧត្តរមានជ័យ ១C.៦៦.៧៩ រស់នៅភូមិពរពេល ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ។
យោងតាមសម្តីពីម្ចាស់ម៉ូតូបានឱ្យដឹងថា បុរសឈ្មោះស ណាតរូបនេះ គឺជាមនុស្សដែលស្គាល់រាប់អានគ្នា ហើយមកលេងនៅក្នុងស្រុកត្រពាំងប្រាសាទ កាលពីព្រឹកថ្ងៃទី១៤ មេសា ក្រោយមកបានខ្ចីម៉ូតូរបស់ខ្លួនមួយភ្លេត ស្រាប់តែបាត់អស់មួយយប់មួយថ្ងៃ ពេលនោះខ្លួនបានប្តឹងសមត្ថកិច្ចប៉ូលិសស្រុកត្រពាំងប្រាសាទ និងប៉ូលិសស្រុកអន្លង់វែង ឱ្យជួយធ្វើការស្រាវជ្រាវ និងឃាត់ខ្លួន។
ប៉ូលិសស្រុកអន្លង់វែងបានឱ្យដឹងថា បន្ទាប់ពីបានទទួលនូវពាក្យបណ្តឹងពីជនរងគ្រោះរួច សមត្ថកិច្ចបានធ្វើការស្រាវជ្រាវ និងដាក់បារាសត្រួតពិនិត្យ ស្រាប់តែជនសង្ស័យរូបនេះបានជិះម៉ូតូមកដល់ ក៏ឃាត់ខ្លួនតែម្តង រួចនាំមកធ្វើការសាកសួរនៅអធិការស្រុកអន្លង់វែង បន្ទាប់ពីសាកសួររួចហើយ ម៉ូតូ និងជនសង្ស័យត្រូវបានបញ្ជូនទៅអធិការស្រុកត្រពាំងប្រាសាទ ដើម្បីចាត់ការទៅតាមនីតិវិធីច្បាប់៕
ចែករំលែកព័តមាននេះ