ខេត្តស្វាយរៀង ៖ ក្រុមចោរប្រដាប់អាវុធ(K59)ពីរនាក់ចេញធ្វើសកម្មភាពស្ទាក់ប្លន់អាជីវករនៅព្រំដែនយកមាសបាន២តម្លឹង២ជី រួចបានជិះរថយន្តគេចខ្លួនតែត្រូវសមត្ថកិច្ចបង្ក្រាបព័ទ្ធចាប់ និងបាញ់តគ្នាមួយប្រាវអស់រយៈពេលមួយម៉ោងកន្លះ ទើបសមត្ថកិច្ចក្របួចចាប់ជនសង្ស័យបាន និងវាយទ្រមខ្លួន។
បើតាមលោកវរៈសេនីយ៍ទោ កែវ សុថា នាយការិយាលយ័ព្រហ្មទណ្ឌកម្រិតធ្ងន់ស្នងការនគបាលខេត្ត បានឲ្យដឹងថា ករណីក្រុមចោរធ្វើសកម្មភាពប្លន់នេះកើតឡើងនៅរសៀលថ្ងៃទី១៥ ខែមេសា ឆ្នាំ២០១៧ វេលាម៉ោង១និង០៥នាទីរសៀល នៅចំណុចចន្លោះបង្គោលព្រំដែនលេខ២២០.២២១ ស្ថិតនៅភូមិកែវជះ ឃុំបន្ទាយក្រាំង ស្រុកកំពង់រោទ៍ ខេត្តស្វាយរៀង ប្លន់យកបានមាសចំនួន២តម្លឹង២ជី ខណៈជនរងគ្រោះឈ្មោះ តីឃឿន ភេទប្រុស អាយុ៤៩ឆ្នាំ ជាអាជីវករលក់បារី នៅភូមិប្រចន្ទ័ទ្រា ឃុំបន្ទាយក្រាំង ស្រុកកំពង់រោទ៍ ជិះម៉ូតូត្រលប់មកពីប្រទេសវៀតណាមវិញ ក៏ត្រូវក្រុមចោរប្រដាប់អាវុធ២នាក់ ប្រើប្រាស់អាវុធខ្លី១ដើមម៉ាក (K59) ស្ទាក់ប្លន់តែម្តង និងបានបាញ់គម្រាមជនរងគ្រោះ១គ្រាប់ និងដោះយកខ្សែក របស់ជនរងគ្រោះមួយខ្សែទម្ងន់២តម្លឹង២ជី រួចបើករថយន្តគេចខ្លួន។
ប្រភពដដែលបន្តទៀតថា ក្រោយមកជនរងគ្រោះបានប្តឹងសម្ថកិច្ចឲ្យជួយអន្តរាគមន៍ដោយមានការសហការណ៍ពី នគរបាលប៉ុស្តិ៍រដ្ឋបាល ឃុំបន្ទាយក្រាំង នគរបាលការពារព្រំដែនសំយ៉ោង យោធាវរៈការពារព្រំដែនសំយ៉ោង យោធាការពារព្រំដែនវៀតណាមប៉ុស្តិ៍៨៨៥ និងប្រជាពលរដ្ឋល្អបានជួយផ្តល់ព័ត៌មានបានទាន់វេលា ទើបចុះបង្ក្រាប និងបានព័ទ្ធជាប់ក៏មានការបាញ់ស្ទាក់ក្រុមចោរឲ្យឈប់ និងចាប់ខ្លួន។ ក៏ប៉ុន្តែក្រុមចោរបានឈប់រថយន្តរួចបានរត់ចេញពីរថយន្ត និងបានបាញ់មកលើសមត្ថកិច្ចវិញចំនួន២គ្រាប់ តែមិនបណ្តាលឲ្យរបួសសមត្ថកិច្ចទេ។
ដោយសមត្ថកិច្ចមានកម្លាំងច្រើនឡោមពទ្ធ័រហូតចាប់បានជនសង្ស័យទាំងពីរនាក់ជាបន្តបន្ទាប់ នៅត្រង់ចំណុចបង្គោល២២២.២២៣ ក្នុងទឹកដីប្រទេសវៀតណាម។ ប្រភពដដែលបន្តទៀតថា ជនសង្ស័យទី១.ឈ្មោះ សៀង គឹមហួត ភេទប្រុស អាយុ៥០ឆ្នាំ រស់នៅភូមិបាក់រនាស់ សង្កាត់សង្ឃ័រ ក្រុងស្វាយរៀង ខេត្តស្វាយរៀង ឃាត់ខ្លូនបាននៅម៉ោង១និង៤៥នាទីរសៀល។ ទី២.ឈ្មោះ ទេព ភារុន អាយុ៣៥ឆ្នាំ រស់នៅផ្ទះលេខ៧៦AM 1 E2 ផ្លូវលេខ១៤១ ភូមិ០៦៩ សង្កាត់វាលវង់ ខណ្ឌ៧មករា រាជធានីភំពេញ ឃាត់ខ្លូនបាននៅវេលាម៉ោង ២និង៣០នាទីរសៀល។
សមត្ថកិច្ចរឹបអូសវត្ថុតាងបានរួមមាន អាវុធខ្លីម៉ាក(K59) ចំនួន១ដើមបង់១ និងគ្រាប់២គ្រាប់ (ជនសង្ស័យមានគ្រាប់៥គ្រាប់ បាញ់គម្រាមជនរងគ្រោះ១គ្រាប់ បាញ់តដៃសមត្ថកិច្ច២គ្រាប់) រថយន្ត១គ្រឿងម៉ាកកាមរី ពណ៌ស ពាក់ស្លាកលេខ បាត់ដំបង 2A-0133 សម្រាប់ធ្វើសកម្មភាពប្លន់។ បច្ចុប្បន្នសមត្ថកិច្ច បានបញ្ជូនជនសង្សយ័ទាំងពីរនាក់ និងវត្ថុតាងទៅស្នងការដ្ឋាននគរបាលខេត្តស្វាយរៀងដើម្បីអនុវត្តន៍តាមនីតិវិធី៕
ចែករំលែកព័តមាននេះ