ខេត្តប៉ៃលិន ៖ កាលពីព្រឹកថ្ងៃទី១៥ ខែមេសា ឆ្នាំ២០១៧ នេះ គេសង្កេតឃើញគំនរសំរាម២កន្លែងក្បែរគ្នា ស្ថិតនៅជ្រុងខាងត្បូងផ្សារសាមគ្គី ហៅប៉ាហ៊ី ក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ដែលត្រូវ
ខេត្តប៉ៃលិន ៖ កាលពីព្រឹកថ្ងៃទី១៥ ខែមេសា ឆ្នាំ២០១៧ នេះ គេសង្កេតឃើញគំនរសំរាម២កន្លែងក្បែរគ្នា ស្ថិតនៅជ្រុងខាងត្បូងផ្សារសាមគ្គី ហៅប៉ាហ៊ី ក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ដែលត្រូវគេយកទៅគរទុកចោលរយៈពេលយូរ អត់ឃើញមានរថយន្តអនាម័យខេត្តមកដឹកយកទៅបោះចោលនៅកន្លែងចាក់សំរាម ទើបបង្កជាក្លិនស្អុយប៉ះពាល់ដល់បរិស្ថានយ៉ាងខ្លាំង ។ ជាពិសេសធ្វើឱ្យជះក្លិនស្អុយប៉ះពាល់ដល់អាជីវករលក់ដូរក្នុងផ្សារ ប្រជាពលរដ្ឋ ភ្ញៀវទេសចរជាតិ និងអន្តរជាតិ ដែលធ្វើដំណើរតាមផ្លូវក្នុងផ្សារ ខណៈពួកគេចូលទៅទិញម្ហូបអាហារ និងឥវ៉ាន់ផ្សេងៗផងដែរ ។
បើតាមការរៀបរាប់ពីអាជីវករ និងប្រជាពលរដ្ឋរស់នៅក្បែរគំនរសំរាម បានឱ្យដឹងថា ជារៀងរាល់ថ្ងៃគំនរសំរាមចំនួន២កន្លែងខាងលើ នៅក្នុងផ្សារសាមគ្គី ហៅប៉ាហ៊ី ដែលកម្មករផ្សារយកទៅគរទុកនោះ ត្រូវបានរថយន្តអនាម័យខេត្តប៉ៃលិនដឹកយកទៅបោះចោលនៅកន្លែងចាក់សំរាមឆ្ងាយពីក្រុង ។ តែអស់រយៈពេល១អាទិត្យមកហើយ ដែលគំនរសំរាម ទាំងនេះ មិនត្រូវបានអាជ្ញាធរ ប្រធានផ្សារ ឬក្រុមហ៊ុនដឹកសំរាមយករថយន្តដឹកទៅបោះចោលនោះឡើយ ដោយទុកឱ្យជះក្លិនស្អុយអសោចបង្កផលប៉ះពាល់ដល់បរិស្ថានជុំវិញផ្សារ គួរឱ្យកត់សម្គាល់ ។ ប្រភពបន្តទៀតថា គំនរសំរាមទាំងនោះមានដូចជា ក្បាលត្រី ស្រកាត្រី សំបកពងមាន់ ពងទា បន្លែ ការ៉ុង កាកអំពៅ និងថង់វេចខ្ចប់សំណល់ផ្សេងៗជាដើម ដែលរហូតមកដល់ពេលនេះ បានក្លាយទៅជាមានដង្កូវតូចធំកើតចេញពីគំនរសំរាមទាំងនេះវាររវើកគួរឱ្យខ្ពើមតែម្តង ។
ចំណែកភ្ញៀវទេសចរជាតិ និងអន្តរជាតិបានឱ្យដឹងថា មិនគួរណាអាជ្ញាធរក្រុង ក៏ដូចជាប្រធានផ្សាររក្សាទុកសំរាមដែលស្អុយគគ្រក់បែបនេះនៅក្នុងផ្សារអស់រយៈពេលយូរឡើយ គួរតែយករថយន្តដឹកយកទៅចាក់ចោលនៅកន្លែងទីលានចាក់សំរាម ព្រោះវាបង្កផលប៉ះពាល់ធ្ងន់ធ្ងរដល់ផ្លូវដង្ហើម អាចបណ្តាលឱ្យកើតទៅជាជំងឺផ្តាសាយ រលាកផ្លូវដង្ហើម និងជំងឺ ផ្សេងៗ ។ ម្យ៉ាងវិញទៀតទីផ្សារគឺជាកន្លែងដែលមនុស្សប្រុសស្រី ក្មេងចាស់ធ្វើដំណើរចេញចូលទៅមកជារៀងរាល់ថ្ងៃ គួរតែសំអាតឱ្យបានល្អគ្រប់ពេលវេលា មិនគួរធ្វេសប្រហែសបែបនេះទេ ។ ពួកគាត់បានរិះគន់ថា បើទុកសំរាមយ៉ាងនេះទៀត ពិតជាបង្កបញ្ហាដល់សុខភាពអ្នកដែលរស់នៅក្បែរផ្សារ ដល់ប្រជាពលរដ្ឋដែលចេញចូលទៅទិញឥវ៉ាន់ និងដល់ភ្ញៀវទេសចរជាតិ និងអន្តរជាតិដែលធ្វើដំណើរមកពីខេត្តផ្សេងចូលលេងក្នុងខេត្តប៉ៃលិន ទៅទិញរបស់របរក្នុងផ្សារផងដែរ ។
ពាក់ព័ន្ធទៅនឹងបញ្ហានេះ លោកស្រី មុំ ម៉ុន ប្រធានផ្សារសាមគ្គី បានឱ្យដឹងថា ការទុកសំរាមចោលបែបនេះ គឺគាត់ធ្លាប់បានណែនាំអស់ហើយ ដោយទុកដាក់ឱ្យបានស្រួលបួល ។ ម្យ៉ាងវិញទៀត ដោយសារតែកម្មកររថយន្តដឹកសំរាមអនាម័យខេត្តប៉ៃលិន ជាប់រវល់ទៅលេងស្រុកកំណើតនាពេលរដូវបុណ្យឆ្នាំខ្មែរ ហើយបើសិនជាអត់មានរថយន្តចូលទៅដឹកទេ ខាងលោកស្រីក៏មិនដឹងទៅរកកម្មករ និងរថយន្តឯណាដែរ ។
ចំណែកលោក គឹម សុខា ប្រធានមន្ទីរបរិស្ថានខេត្តប៉ៃលិន បានឱ្យដឹងថា ភារកិច្ច នេះគឺប្រធានផ្សារ និងក្រុមហ៊ុនអនាម័យខេត្តប៉ៃលិន ជាអ្នកទទួលខុសត្រូវមើលផ្សារខាង លើ ។ តែបើមានបញ្ហាគេទុកគំនរសំរាមចោលយូរអត់មានដឹកយកទៅបោះចោលនៅទីលានចាក់សំរាមទេ ខាងលោកនឹងឱ្យមន្ត្រីក្រោមឱវាទចុះទៅពិនិត្យមើល ដើម្បីរៀបចំឱ្យ បានស្រួលបួលឡើងវិញ ៕
ចែករំលែកព័តមាននេះ