ខេត្តបន្ទាយមានជ័យ ៖ ទាហានតំបន់អភិវឌ្ឍន៍ភូមិភាគ៥ម្នាក់ ដណ្តឹងកូនស្រីគេមិនឲ្យយប់ថ្ងៃបុណ្យចូលឆ្នាំថ្មី បាញ់រះចូលក្នុងផ្ទះបណ្តាលឲ្យស្លាប់៣នាក់ របួសធ្ងន់ម្នាក់។ ហេតុការណ៍នេះកើតឡើងនៅវេលាម៉ោង៣ និង១៥នាទីចូលថ្ងៃទី១៤ខែមេសា ឆ្នាំ២០១៧ ស្ថិតភូមិ.ឃុំថ្មី ស្រុកម៉ាឡៃ។ លោកវរៈសេនីយ៍ត្រីយ៍ តាំង សុហេង មេបញ្ជាការកងរាជអាវុធហត្ថស្រុកម៉ាឡៃបានប្រាប់ថា ជនរងគ្រោះស្លាប់៣នាក់មានទី១.ឈ្មោះ ជួប សាំងលីន ភេទប្រុស អាយុ៣០ឆ្នាំ(ស្លាប់ក្នុងផ្ទះ) ទី២.ឈ្មោះ ម៉ែ សុវណ្ណរ៉ាឌី ភេទស្រី អាយុ៣២ឆ្នាំ(ស្លាប់នៅពេទ្យ) ទី៣.ឈ្មោះ សុខ ខាត់ណា ភេទស្រី អាយុ៥៥ឆ្នាំ(ស្លាប់នៅពេទ្យ) និងរបួសធ្ងន់ម្នាក់ឈ្មោះ អឹម សំបុន ភេទប្រុស អាយុ៣៤ឆ្នាំ ដែលរស់នៅភូមិកើតហេតុខាងលើ។
តាមសម្ដីសាច់ញាតិជនរងគ្រោះបានបញ្ចាក់ថា នៅពេលការលួចបាញ់ប្រហារកើតឡើងគឺនៅពេលដែលម្ចាស់ផ្ទះបានបើកទ្វារចេញមកអុជធូបនៅវេលាម៉ោង៣និង១៥នាទីទាបភ្លឺ ឈានចូលថ្ងៃទី១៤ ខែមេសា ឆ្នាំ២០១៧ ស្រាប់តែស្នូរកាំភ្លើងបាញ់លាន់ប្រាវជាច្រើនគ្រាប់ចូលក្នុងផ្ទះបណ្តាលឲ្យឈ្មោះ ជួប សាំងលីន ត្រូវជាច្រើនគ្រាប់ស្លាប់នៅកន្លែង និង៣នាក់ទៀតរបួសធ្ងន់បញ្ជូនទៅមន្ទីពេទ្យស្លាប់២នាក់ទៀតឈ្មោះ ម៉ែ សុវណ្ណរ៉ាឌី និងឈ្មោះ សុខ ខាត់ណា និងរបួសធ្ងន់ឈ្មោះ អឹម សំបុន។
សាច់ញាតិជនរងគ្រោះបានបញ្ជាក់ថា ករណីលួចបាញ់ប្រហារទាំងយប់នេះគេដាក់ការសង្ស័យ និងស្គាល់មុខសញ្ញាជនដៃដល់ហើយគឺឈ្មោះ រ៉េត រាត្រី ភេទប្រុស អាយុ២៦ឆ្នាំ(មានមុខងារជាកម្លាំងយោធាអង្គភាពតំបន់អភិឌ្ឍន៍យោធភូមិភាគទី៥ ដែលឈរជើងនៅចំណុចភ្នំឆ័ត្រ ស្ថិតភូមិក្តិបថ្ម ឃុំស្លក្រាម ស្រុកស្វាយចេក)។ ព្រោះតែរឿងជនដៃដល់ស្រលាញ់កូនស្រីហើយចូលដណ្តឹងមិនឲ្យ ទើបកើតរឿងគំនុំលួចបាញ់ប្រហារបណ្តាលស្លាប់៣នាក់ និងរបួសម្នាក់ធ្ងន់កំពុងសង្គ្រោះបន្ទាន់នៅប្រទេសថៃ។
លោកវរៈសេនីយ៍ត្រី តាំង សុហេង បានបញ្ជាក់ថា ករណីលួចបាញ់ប្រហារទាំងយប់បណ្តាលស្លាប់៣នាក់ និងរបួសធ្ងន់ម្នាក់នេះ កម្លាំងជំនាញកំពុងស្រាវជ្រាវ និងកំណត់មុខសញ្ញាជនល្មើសដែលជាជនដៃដល់ដើម្បីចាប់ខ្លួនមកអនុវត្តតាមច្បាប់៕
ចែករំលែកព័តមាននេះ