ភាគីម្ខាងថាតាមវាយប្លន់ សមត្ថកិច្ចថាជាជម្លោះ
រាជធានីភ្នំពេញ ៖ មានករណីវាយតប់គ្នាមួយ ដែលតាមប្រភពពីភាគីម្ខាងថាជាការប៉ុងប៉ងប្លន់យកម៉ូតូ តែមិនបានសម្រេច រវាងយុវជន២ក្រុម រហូតមានការផ្ទុះអាវុធពីសំណាក់
រាជធានីភ្នំពេញ ៖ មានករណីវាយតប់គ្នាមួយ ដែលតាមប្រភពពីភាគីម្ខាងថាជាការប៉ុងប៉ងប្លន់យកម៉ូតូ តែមិនបានសម្រេច រវាងយុវជន២ក្រុម រហូតមានការផ្ទុះអាវុធពីសំណាក់មន្ត្រីនគរបាលម្នាក់ក្នុងការបំបែកហ្វូងអ្នកឈ្លោះគ្នា ។ ករណីនេះ បានកើតឡើងនៅតាមផ្លូវបេតុង ខាងក្រោយវត្តស្ទឹងមានជ័យ ក្នុងសង្កាត់ស្ទឹងមានជ័យ ខណ្ឌមានជ័យ កាលពីវេលាម៉ោង៣និង២០នាទីរសៀល ថ្ងៃទី៩ ខែមេសា។
ប្រភពព័ត៌មានឱ្យដឹងថា យុវជនទាំង២ក្រុម ១ក្រុមមានគ្នា២នាក់ និង១ក្រុមទៀតមានគ្នា៣នាក់ ។ យុវជនមានគ្នា២នាក់ជិះម៉ូតូមួយគ្រឿងម៉ាក MSX អះអាងថា ពួកខ្លួនត្រូវយុវជនមួយក្រុមទៀតមានគ្នា៣នាក់ តាមវាយប្លន់យកម៉ូតូព្រោះពួកគេមិនដែលធ្លាប់ស្គាល់គ្នាពីមុនឡើយ ។
យុវជន២នាក់នេះនិយាយទៀតថា ខណៈពួកខ្លួនត្រូវគេវាយរហូតបង្ខំចិត្តរត់ចោលម៉ូតូហើយនោះ ក្រុមយុវជនដែលមានគ្នា៣នាក់បម្រុងលើកម៉ូតូរបស់ពួកខ្លួនជិះរត់ តែសំណាងល្អបានមន្ត្រីនគរបាល១រូបស្លៀកពាក់ស៊ីវិល លើកកាំភ្លើងខ្លីបាញ់១គ្រាប់ឡើងលើ ដើម្បីរារាំងទំនាស់របស់ពួកគេ ពិសេសកុំឱ្យក្រុមយុវជនមានគ្នា៣នាក់ យកម៉ូតូរបស់ពួកខ្លួនជិះរត់គេច ។
ប្រភពព័ត៌មាននិយាយថា ក្រោយពីមានការបាញ់ឡើងលើ១គ្រាប់ ក្រុមយុវជនមានគ្នា៣នាក់ បានលើកម៉ូតូជិះរត់គេចយ៉ាងលេឿន នៅសល់តែភាគីមានគ្នា២នាក់និងម៉ូតូ។
ក្រោយពីកើតមានករណីដូចនេះ ប្រព័ន្ធវិទ្យុទាក់ទងអនាមិកមួយបានស្រែកឡើងនៅក្នុងកាណាល់រាជធានីភ្នំពេញរបស់នគរបាលថា មានករណីវាយប្លន់នៅចំណុចខាងលើ ហើយកម្លាំងអាជ្ញាធរនិងកម្លាំងនគរបាល ក៏ចុះអន្តរាគមន៍ ដល់ទីកន្លែងភ្លាមៗដែរ ។ នៅពេលទៅដល់ សមត្ថកិច្ចបាននាំខ្លួនយុវជន២នាក់នោះ និងម៉ូតូរបស់គេម៉ាក MSX មកកាន់ប៉ុស្តិ៍មូលដ្ឋាន ដើម្បីសាកសួរព័ត៌មានជុំវិញករណីមួយនេះ ។
អ្នកទាំង២នាក់ ម្នាកឈ្មោះ ប៉ៅ អីុតា ភេទប្រុស អាយុ១៥ឆ្នាំ មានទីលំនៅភូមិគោកបញ្ជាន់ សង្កាត់ចោមចៅ ខណ្ឌពោធិ៍សែនជ័យ និងម្នាក់ទៀតឈ្មោះ កឹម ដានី ភេទប្រុស អាយុ១៥ឆ្នាំដូចគ្នា ស្នាក់នៅភូមិថ្មី សង្កាត់ស្ទឹងមានជ័យ ខណ្ឌមានជ័យ ។
នៅចំពោះមុខសមត្ថកិច្ច យុវជនទាំង២នាក់អះអាងថា ពួកគេត្រូវក្រុមជនមានគ្នា៣នាក់តាមវាយប្លន់ ព្រោះក្រុមជននោះវាយពួកខ្លួនហើយ ប្រុងយកម៉ូតូជិះរត់គេចទៀត ខណៈដែលពុំមែនជាមនុស្សធ្លាប់ស្គាល់គ្នាសោះ។ ដោយឡែក សមត្ថកិច្ចអះអាងថា នេះជាករណីវាយតប់គ្នាទេ ។
យុវជនទាំង២នាក់និយាយទៀតថា នាវេលាម៉ោងប្រមាណ២រសៀលថ្ងៃនោះ ពួកខ្លួនបានជិះម៉ូតូឌុបគ្នាទៅលេងនៅកោះពេជ្រ លុះត្រឡប់ទៅផ្ទះវិញឆ្លងកាត់ចំណុចខាងលើ ក៏កើតមានរឿងបែបនេះតែម្តង ៕
ចែករំលែកព័តមាននេះ