តម្លៃប្រេងបានកើនឡើងកាលពីថ្ងៃចន្ទ ដោយសារមានតម្រូវការខ្លាំង និងភាពមិនប្រាកដប្រជាជុំវិញជម្លោះនៅប្រទេសស៊ីរី ទោះបីការខួងប្រេងរបស់សហរដ្ឋអាមេរិកបានត្រៀមខ្លួនគ្រប់គ្រងកំណើននេះក្តី ។
តម្លៃប្រេងគោលអន្តរជាតិ Brent ស្មើ៥៥,៤៧ដុល្លារក្នុង១បារ៉ែល កើនឡើង២៣សេន ឬ០,៤២% ។ ចំណែកតម្លៃប្រេងគោលសហរដ្ឋអាមេរិក West Texas Intermediate (WTI) បានកើនឡើង២៥សេន ឬ០,៤៩% ស្មើ៥២,៤៩ដុល្លារក្នុង១បារ៉ែល ។
ធនាគារ ANZ និយាយថា តម្រូវការប្រេងខ្លាំង និងស្ថានភាពសកលមិននឹងនរ គឺកំពុងតែធ្វើឲ្យទីផ្សារនេះពិបាកប៉ាន់ស្មាន ។
« ឥណ្ឌា ដែលទើបយកឈ្នះជប៉ុន ជាប្រទេសនាំចូលប្រេងធំជាងគេទី៣លើពិភពលោក មានតម្រូវការប្រេងកើនឡើងកាលពីខែមីនា ចំនួន៤,៩% បើធៀបនឹងខែដូចគ្នានៅឆ្នាំមុន » ។ នេះបើតាមលោក Sukrit Vijayakar អ្នកប្រឹក្សាយោបល់ផ្នែកថាមពល Trifecta ។
ការកើនឡើងនៃការខួងប្រេងមួយផ្សេងទៀតនៅសហរដ្ឋអាមេរិក ក្នុងរយៈពេល១២សប្តាហ៍ជាប់គ្នា ជាមួយម៉ាស៊ីនខួង៦៧២ គឺជាកម្រិតខ្ពស់បំផុតចាប់ពីខែសីហា ឆ្នាំ២០១៥ បានរក្សាតម្លៃទីផ្សារមិនឲ្យឡើងខ្ពស់កាលពីសប្តាហ៍មុន គឺប្រហែល៥៦ដុល្លារក្នុង១បារ៉ែល ។
ធនាគារអាមេរិក Goldman Sachs ឱ្យដឹងថា បន្ទាប់ពីទិន្នន័យការខួងប្រេងចេញផ្សាយ ផលិតកម្មប្រេងអាមេរិកពីមួយឆ្នាំទៅមួយឆ្នាំ នឹងកើនឡើង២១ម៉ឺន៥ពាន់បារ៉ែលក្នុង១ថ្ងៃនៅឆ្នាំ២០១៧ ។
ការកើនឡើងនៃទិន្នផលរបស់អាមេរិកនេះ គឺផ្ទុយគ្នានឹងទិសដៅរបស់អង្គការប្រទេសនាំប្រេងចេញ (OPEC) ដែលសង្ឃឹមថា តម្លៃប្រេងនឹងកើនឡើងតាមរយៈកាត់បន្ថយការផ្គត់ផ្គង់នៅឆមាសទី១ ឆ្នាំ២០១៧ ។
ក្រុមហ៊ុនស្រាវជ្រាវ BMI និយាយថា៖ «ការថយចុះនៃបរិមាណផ្គត់ផ្គង់ក្នុងបណ្តាប្រទេស OPEC និងទិន្នផលកាន់តែច្រើនរបស់អាមេរិក នឹងធ្វើឲ្យតម្លៃប្រេងឆៅអាមេរិកធ្លាក់ថ្លៃ និងគាំទ្រការនាំចេញពីអាមេរិកទៅកាន់ទ្វីបអាស៊ី ក្នុងរយៈពេលប៉ុន្មានខែខាងមុខ » ។
ក្រុមហ៊ុនបន្ថែមថា ក្នុងលក្ខខណ្ឌបរិមាណរួម សហរដ្ឋអាមេរិកនៅតែមានចំណែកទីផ្សារតូចក្នុងតំបន់អាស៊ី ដោយសារ OPEC ការពារទីផ្សាររបស់ខ្លួនយ៉ាងសកម្ម ។
ក្រៅពីសហរដ្ឋអាមេរិក ប្រទេសផលិតប្រេងផ្សេងទៀត ក៏ទទួលបានផលប្រយោជន៍ផងដែរពីលទ្ធផលកាត់បន្ថយការផ្គត់ផ្គង់របស់ OPEC និងការរឹតបន្តឹងទីផ្សារ ។
ការនាំចេញប្រេងរបស់ប្រទេសប្រេស៊ីលបានកើនឡើង៦៥% ចាប់តាំងពីខែកុម្ភៈ ឆ្នាំ២០១៦ ដល់កម្រិតខ្ពស់បំផុតជាង១,៤៦លានបារ៉ែលក្នុង១ថ្ងៃ ។ នេះបើតាមទិន្នន័យរបស់សារព័ត៌មាន Reuters ។
ក្រុមហ៊ុនប្រឹក្សាយោបល់ Wood Mackenzie ប៉ាន់ស្មានថា ការនាំចេញប្រេងរបស់ប្រេស៊ីល នឹងកើនជាមធ្យមជិត១លានបារ៉ែលក្នុង១ថ្ងៃរយៈពេលពេញមួយឆ្នាំនេះ ពីចំនួន៧៩ម៉ឺន៨ពាន់បារ៉ែលក្នុង១ថ្ងៃកាលពីឆ្នាំមុន ៕
ចែករំលែកព័តមាននេះ