ទីក្រុងហាណូយ ៖ ក្នុងរយៈពេលប៉ុន្មានថ្ងៃចុងក្រោយនេះ តម្លៃខ្សាច់នៅវៀតណាមបានហក់ឡើងយ៉ាងខ្លាំង ដោយសារតែរដ្ឋាភិបាលបញ្ជាឲ្យរឹតបន្ដឹងទៅលើការបូមខ្សាច់។
អ្នកផ្គត់ផ្គង់សម្ភារសំណង់និយាយថា ១សប្ដាហ៍កន្លងមកនេះ អ្នកលក់ខ្សាច់បានដំឡើងថ្លៃគុណនឹង៥ដង ។
យោងតាមអ្នកលក់ខ្សាច់និយាយថា តម្លៃកើនឡើងនេះ ដោយសារតែការត្រួតពិនិត្យរ៉ែខ្សាច់ត្រូវបានរឹតបន្ដឹង ខណៈដែលរដូវសាងសង់ចាប់ផ្ដើម ។
នៅទីក្រុងហាណូយ តម្លៃខ្សាច់ក៏បានកើនឡើងផងដែរក្នុងរយៈពេលប៉ុន្មានថ្ងៃចុងក្រោយនេះ ។ ម្ចាស់ក្រុមហ៊ុនផ្គត់ផ្គង់សម្ភារសំណង់នៅក្នុងក្រុងនិយាយថា ឥឡូវតម្លៃខ្សាច់មានចន្លោះពី៥,៣ ទៅ៨,៨ដុល្លារក្នុង១ម៉ែត្រគូប បើធៀបនឹងតម្លៃពីមុន គឺប្រមាណ៣,៥ ទៅ៧,៩ដុល្លារក្នុង១ម៉ែត្រគូប ។
យោងតាមអគ្គនាយកដ្ឋានសម្ភារសំណង់នៃក្រសួងសំណង់វៀតណាមបានឲ្យដឹងថា តម្រូវការខ្សាច់ក្នុងការដ្ឋានស្របច្បាប់នៅទីក្រុង មានប្រហែលជា៦០ទៅ៦៥%ប៉ុណ្ណោះ ខណៈនៅទូទាំងប្រទេសមានត្រូវការខ្ពស់ពី៩២លានម៉ែត្រគូបក្នុងឆ្នាំ២០១៥ ហើយនឹងឡើងដល់១៣០លានម៉ែត្រគូបនៅឆ្នាំ២០២០ ។
អគ្គនាយកដ្ឋានពន្យល់ថា ដោយសារតែបរិមាណខ្សាច់ដែលនាំចូលពីប្រភពមិនច្បាស់លាស់កើនឡើង ដូច្នេះហើយទើបច្បាប់រឹតបន្ដឹង ត្រូវបានអនុវត្ត ។
ទោះបីជាយ៉ាងណា លោក Pham Sy Liem អតីតរដ្ឋមន្ត្រីសំណង់ បាននិយាយថា កង្វះខាតខ្សាច់ វាមិនមែនបណ្ដាលឲ្យតម្លៃកើនឡើងនោះទេ ។ លោកយល់ថា ស្ថានភាពនេះអាជ្ញាធរគួរតែកំណត់ឲ្យច្បាស់ពីមូលហេតុដែលនាំឲ្យតម្លៃខ្សាច់កើនឡើងខ្ពស់បែបនេះ ។
ចំណែកលោក Nguyen Ngoc Thanh ប្រធាននាយកដ្ឋានសម្ភារសំណង់ទីក្រុងហូជីមិញ និយាយថា ការកើនឡើងនៃតម្លៃខ្សាច់ ដោយសារតែភាពផ្សេងគ្នារវាងការផ្គត់ផ្គង់ និងតម្រូវការ ។
ដើម្បីជួយប្រជាជន និងអ្នករកស៊ីរក្សាបាននូវតម្លៃសមរម្យ អគ្គនាយកដ្ឋានគួរតែកែប្រែច្បាប់ និងផ្សព្វផ្សាយពីតារាងតម្លៃទៅដល់ក្រុមហ៊ុនផ្គត់ផ្គង់សម្ភារសំណង់ទាំងអស់ឲ្យបានដឹង ដើម្បីជាឯកសារបញ្ជាក់របស់ពួកគេ ៕
ចែករំលែកព័តមាននេះ