បុរសជនជាតិថៃព្រាននារី បញ្ឆោតនាងឱ្យបើកទ្វារ ចូលចាប់រំលោ.ភសេពសន្ថវៈ
ខេត្តប៉ៃលិន ៖ ស្ត្រីបុគ្គលិកកាស៊ីណូម្នាក់ត្រូវបានបុរសជនជាតិថៃដើរទៅគោះទ្វារបន្ទប់ជួលរបស់នាងទាំងព្រឹកព្រលឹមដោយបញ្ឆោតថា យកនាឡិកាទៅលក់ឱ្យ
ខេត្តប៉ៃលិន ៖ ស្ត្រីបុគ្គលិកកាស៊ីណូម្នាក់ត្រូវបានបុរសជនជាតិថៃដើរទៅគោះទ្វារបន្ទប់ជួលរបស់នាងទាំងព្រឹកព្រលឹមដោយបញ្ឆោតថា យកនាឡិកាទៅលក់ឱ្យ លុះនាងបើកទ្វារបន្ទប់ភ្លាម ស្រាប់តែជននេះស្ទុះចូលទៅច្របាច់កគំរាមសម្លាប់ រួចធ្វើសកម្មភាពចាប់រំលោភទាំងកំរោលរហូតបានសម្រេចដូចបំណងទើបបុរសនោះក្រោកចេញទៅបាត់ ។ បន្ទាប់ពីត្រូវរំលោភរួចភ្លាម នារីរងគ្រោះប្រញាប់ទូរស័ព្ទទៅប្តឹងនគរបាលប៉ុស្តិ៍ស្ទឹងកាច់ឱ្យមកឃាត់ខ្លួនបុរសថៃនោះកាលពីវេលាម៉ោង៧និង១០នាទីព្រឹក ថ្ងៃទី៩ មេសា ស្ថិតនៅក្នុងបន្ទប់ជួល ឃុំស្ទឹងកាច់ ស្រុកសាលាក្រៅ ។
តាមព័ត៌មានពីលោក ញ៉ឹក ថុល អធិការនគរបាលស្រុកសាលាក្រៅបានឱ្យដឹងថា នារីរងគ្រោះមានអាយុ៣៥ឆ្នាំ ជាបុគ្គលិកស៊ីណូ ស្នាក់នៅភូមិកើតហេតុខាងលើ រីឯជនជាតិថៃនោះឈ្មោះ ចាន់ ឆានុនកាន់ថៈផន អាយុ៣៩ឆ្នាំ ជាជនជាតិថៃ រស់នៅស្រុកប៉ោងណាំរ៉ន ខេត្តច័ន្ទបូរី ប្រទេសថៃ ។ ប្រភពបន្តទៀតថា មុនពេលកើតហេតុគេឃើញជនសង្ស័យខាងលើ បានប្រើល្បិចដោយទៅគោះទ្វារបន្ទប់នារីរងគ្រោះទាំងព្រឹកព្រលឹមដោយប្រាប់ថា រូបគេមាននាឡិកាស្រស់ស្អាតមួយ ចង់លក់ឱ្យនាងប្រើប្រាស់ក្នុងតម្លៃថោក ។ ពេលនោះនាងប្រាប់ថា អត់មានលុយទិញទេ តែដោយជនសង្ស័យចេះតែគោះទ្វារម្តងហើយម្តងទៀតរហូតនាងទ្រាំមិនបានក៏បើកទ្វារ ។ រំពេចនោះបុរសថៃបានស្ទុះទៅចាប់ច្របាច់ក នាងគំរាមសម្លាប់ រួចធ្វើសកម្មភាពរំលោភទាំងកំរោលរហូតដល់បានសម្រេចទើបបុរសនោះក្រោកដើរចេញទៅវិញបាត់ ។
លោកបញ្ជាក់ថា នៅចំពោះមុខសមត្ថកិច្ច ជនជាតិថៃនោះបានសារភាពថា រូបគេធ្លាប់បានរួមរ័កជាមួយស្ត្រីរងគ្រោះ២ដងរួចមកហើយ ដោយត្រូវរ៉ូវគ្នាទាំងសងខាង ហើយនាងអត់មានប្តឹងប្តល់អ្វីនោះឡើយ ។ តែនៅព្រឹកថ្ងៃកើតហេតុ ដោយសារនាងមិនយល់ព្រម ហើយរូបគេបង្ខំចាប់រំលោភ ទើបធ្វើឱ្យនាងខឹងប្តឹងទៅនគរបាល ឱ្យចាប់ឃាត់ខ្លួនបែបនេះ ។
ចំណែកនារីរងគ្រោះ បានឱ្យដឹងថា រូបនាងបានមកធ្វើការនៅកាស៊ីណូខេត្តប៉ៃលិនអស់រយៈពេលជាច្រើនឆ្នាំមកហើយ មិនធ្លាប់ស្គាល់បុរសជនជាតិថៃម្នាក់ខាងលើនោះទេ ហើយក៏មិនធ្លាប់មានទំនាក់ទំនងស្នេហាអ្វីនឹងគ្នាពីមុនមកដែរ ដោយគ្រាន់តែឃើញបុរសនោះជួលបន្ទប់ស្នាក់នៅក្បែរបន្ទប់ជួលរបស់នាងប៉ុណ្ណោះ ។
ទោះជាយ៉ាងណាក៏ដោយ បច្ចុប្បន្នជនសង្ស័យខាងលើ ត្រូវបាននគរបាលនៃអធិការដ្ឋានស្រុកសាលាក្រៅរៀបចំសំណុំរឿងបញ្ជូនទៅស្នងការដ្ឋាននគរបាលខេត្តប៉ៃលិនចាត់ការបន្តតាមនីតិវិធី ។ ចំណែកនារីរងគ្រោះ កំពុងសម្រាកនៅក្នុងមន្ទីរពេទ្យបង្អែកខេត្តប៉ៃលិនដើម្បីព្យាបាលមុខរបួស ។ សូមបញ្ជាក់ ជនសង្ស័យខាងលើត្រូវបានសមត្ថកិច្ចបង្ហើបឱ្យដឹងថា អាចពាក់ព័ន្ធនឹងករណីប្រើប្រាស់គ្រឿងញៀនផងដែរ ៕
ចែករំលែកព័តមាននេះ