អ្នកភូមិក្មេងចាស់ជាង30នាក់ពុលចំណីអាហារក្នុងពិធីបុណ្យ
ខេត្តបាត់ដំបង ៖ យ៉ាងហោចណាស់មនុស្សជាង៣០នាក់ ដែលភាគច្រើនជាកុមារ ត្រូវគេសង្ស័យថា បានពុលអាហារជាបន្តបន្ទាប់
ខេត្តបាត់ដំបង ៖ យ៉ាងហោចណាស់មនុស្សជាង៣០នាក់ ដែលភាគច្រើនជាកុមារ ត្រូវគេសង្ស័យថា បានពុលអាហារជាបន្តបន្ទាប់ នៅក្នុងកម្មវិធីបុណ្យមួយកន្លែងក្នុងភូមិព្រៃកូនសេក សង្កាត់អូរចា ក្រុងបាត់ដំបង ចាប់តាំងពីវេលាថ្ងៃត្រង់ ថ្ងៃទី៩ មេសា រហូតដល់យប់ តែត្រូវបានបញ្ជូនទៅកាន់មន្ទីរពេទ្យទាន់ពេលវេលាមិនមានគ្រោះថ្នាក់ដល់អាយុជីវិតនរណាម្នាក់ឡើយ ។
លោកប៉ាង ហៀង អធិការក្រុងបាត់ដំបង បានឱ្យដឹងថា មនុស្សរាប់រយនាក់បានមកចូលរួមក្នុងពិធីបុណ្យមួយកន្លែងនៅក្នុងភូមិខាងលើ។ លោកថា បន្ទាប់ពីហូបអាហារថ្ងៃត្រង់រួច ស្រាប់តែអ្នកចូលរួមបុណ្យ ដែលភាគច្រើនជាកុមារមានអាការក្អូតចង្អោរជាបន្តបន្ទាប់ ដែលគេសង្ស័យថា អាចបណ្ដាលមកពីការពុលអាហារតែម្ដង ។ លោកប៉ាង ហៀង បានបញ្ជាក់ថា ជនរងគ្រោះមួយចំនួនត្រូវបានបញ្ជូនភ្លាមៗទៅសង្គ្រោះនៅមន្ទីរពេទ្យខេត្ត និងមួយចំនួនទៀតដេកព្យួរសឺរ៉ូមនៅផ្ទះ។ បើតាមចំនួនជនរងគ្រោះសរុប៣៣នាក់ ក្នុងនោះមានស្រី២០នាក់ ដែលភាគច្រើនជាកុមារតូចៗ តែរហូតដល់ពេលនេះមិនទាន់មានជនរងគ្រោះណាម្នាក់គ្រោះថ្នាក់ដល់អាយុជីវិតទេ ។
បើតាមការបំភ្លឺខ្លះៗពីអ្នកភូមិបានឱ្យដឹងថា ជនរងគ្រោះដែលមានអាការពុលនោះ បានកើតឡើងនៅថ្ងៃចុងក្រោយនៃពិធីបុណ្យ ។ អ្នកភូមិនិយាយថា នៅវេលាថ្ងៃត្រង់ ក្រោយពីនាំគ្នាហូបអាហាររួច ប្រហែលកន្លះម៉ោងប៉ុណ្ណោះស្រាប់តែគេឃើញក្មេងៗមួយចំនួន ចាប់ផ្ដើមមានអាការក្អួតចង្អោរជាបន្តបន្ទាប់ បង្កឲ្យមានការភ្ញាក់ផ្អើលពេញភូមិ រហូតមានការសង្ស័យថា ជនរងគ្រោះទំនងជាពុល តែគេមិនដឹងថា ពុលអ្វីនោះទេ ។ អ្នកភូមិមួយចំនួនបានសង្ស័យថា កុមារទាំងនោះពុលទឹកផ្លែឈើ រីឯមួយចំនួនទៀតសង្ស័យថា អាចពុលចំណីអាហារក្នុងកម្មវិធីបុណ្យនេះ ។ ប៉ុន្តែយ៉ាងណាមនុស្សភាគច្រើនបានសន្និដ្ឋានថា អាចបណ្ដាលមកពីការពុលអាហារនៅក្នុងពិធីបុណ្យ ដែលធ្វើខ្វះអនាម័យ ។
លោកប៉ាង ហៀង អធិការក្រុងបាត់ដំបង បានប្រាប់ថា គិតត្រឹមម៉ោង១២យប់ថ្ងៃដដែល ជនរងគ្រោះទាំង៣៣នាក់នោះមិនទាន់មាននរណាម្នាក់គ្រោះថ្នាក់ដល់អាយុជីវិតនោះទេ ។ លោកថា ជនរងគ្រោះទាំងអស់បានធូរស្បើយវិញហើយ តែមួយចំនួនសម្រាកព្យាបាលនៅមន្ទីរពេទ្យបង្អែកខេត្ត និងមួយចំនួនទៀត កំពុងសម្រាកព្យួរសឺរ៉ូមនៅផ្ទះ ។
លោកប៉ាង ហៀង ក៏បានបញ្ជាក់ដែរថា ក្រោយពេលកើតហេតុ មន្ត្រីជំនាញរួមទាំងគ្រូពេទ្យផង បានចុះទៅសួរនាំ និងស្រាវជ្រាវរកមូលហេតុ ដែលនាំឲ្យមនុស្សជាច្រើននាក់ពុលក្អួតចង្អោរនោះភ្លាមៗដែរ ហើយមន្ត្រីជំនាញបានសន្និដ្ឋានជំហានដំបូងទៅលើការពុលចំណីអាហារ ច្រើនជាងពុលទឹកផ្លែឈើ ៕
ចែករំលែកព័តមាននេះ