ប្រទេសរុស្ស៊ី ៖ រូបិយវត្ថុរបស់រុស្ស៊ី និងទីផ្សារភាគហ៊ុនបានធ្លាក់ចុះកាលពីថ្ងៃសុក្រ ខណៈសកម្មភាពយោធារបស់អាមេរិកលុបបំបាត់ក្តីសង្ឃឹមថា ទំនាក់ទំនងរវាងប្រទេសរុស្ស៊ី និងសហរដ្ឋអាមេរិកនឹងល្អជាងមុន ។
លោកប្រធានាធិបតី Trump បានចាប់ផ្តើមវាយប្រហារផ្នែកយោធាលើមូលដ្ឋានទ័ពអាកាសរបស់រដ្ឋាភិបាលស៊ីរី ដើម្បីឆ្លើយតបនឹងការវាយប្រហារដោយប្រើប្រាស់អាវុធគីមីលើប្រជាជនកាលពីដើមសប្តាហ៍មុន ។
ប្រទេសរុស្ស៊ីបានរិះគន់យ៉ាងខ្លាំងក្លាលើការវាយប្រហារនេះ និងសន្យាថា នឹងជំរុញការការពារផ្នែកអាកាសរបស់ស៊ីរី និងបញ្ជូនកប៉ាល់ចម្បាំងទៅកាន់សមុទ្រមេឌីទែរ៉ាណេផងដែរ ។
រូបិយប័ណ្ណរបស់ប្រទេសនេះបានធ្លាក់ចុះ១%បើធៀបនឹងប្រាក់ដុល្លារ ខណៈសន្ទស្សន៍ទីផ្សារភាគហ៊ុនធំជាងគេរបស់រុស្ស៊ីធ្លាក់ចុះ ១,៨% ប៉ុន្តែតម្លៃប្រេងបានកើនឡើង ដែលជាមូលដ្ឋាននៃសេដ្ឋកិច្ចរុស្ស៊ី ។
លោក William Jackson ឧត្តមសេដ្ឋវិទូក្នុង Capital Economics និយាយថា ៖ «ការប៉ះពាល់ភ្លាមៗ គឺនឹងលុបបំបាត់នូវក្តីសង្ឃឹមថា ទំនាក់ទំនងរវាងសហរដ្ឋអាមេរិក និងរុស្ស៊ី ដែលជាអ្នកគាំទ្ររដ្ឋាភិបាលស៊ីរីនឹងល្អជាងមុន ហើយសហរដ្ឋអាមេរិកនឹងធ្វើឲ្យទំនាក់ទំនងល្អឡើងវិញ » ។
គណៈកម្មាធិការ House Intelligence Committee ក៏កំពុងស៊ើបអង្កេតលើការប្តឹងថា ប្រទេសរុស្ស៊ីបានលូកដៃក្នុងការបោះឆ្នោតឆ្នាំ២០១៦ របស់សហរដ្ឋអាមេរិកផងដែរ និងប្តឹងថា លោក Trump ចូលរួមផ្សំគំនិតជាមួយប្រទេសរុស្ស៊ី ។
លោកប្រធានាធិបតី Trump និយាយថា លោកប្តេជ្ញាថា នឹងដកការដាក់ទណ្ឌកម្មសេដ្ឋកិច្ចលើរុស្ស៊ី ទាក់ទិននឹងបញ្ហាប្រទេសអ៊ុយក្រែន ប៉ុន្តែនៅក្រោមលក្ខខណ្ឌថា រុស្ស៊ីអាចនឹងសហការជាមួយបញ្ហាផ្សេងៗទៀត ។
ភាគហ៊ុន និងរូបិយប័ណ្ណរុស្ស៊ីបានកើនឡើងភ្លាមៗបន្ទាប់ពីលោក Trump ឈ្នះឆ្នោតនាខែវិច្ឆិកា ខណៈវិនិយោគិនសង្ឃឹមថា ទំនាក់ទំនងរវាងប្រទេសទាំងពីរនឹងល្អប្រសើរជាងមុន ។
លោក Gunter Deuber ប្រធានផ្នែកស្រាវជ្រាវក្នុង Raiffeisen Bank និយាយថា ៖ « ពួកយើងប្រហែលជាមកដល់ទំនាក់ទំនងដ៏អាក្រក់ថ្មីមួយហើយ ខណៈមានការគិតថា ការល្អប្រសើរវិញអាចនឹងសុទិដ្ឋិនិយមពេក » ។
ការដាក់ទណ្ឌកម្មសេដ្ឋកិច្ច រួមផ្សំនឹងតម្លៃប្រេងធ្លាក់ចុះបានប៉ះពាល់ដល់ប្រទេសរុស្ស៊ីយ៉ាងខ្លាំង ។ សេដ្ឋកិច្ចរបស់ប្រទេសនេះបានធ្លាក់ចុះអស់រយៈពេល៧ត្រីមាសជាប់ៗគ្នា មុនពេលកើនឡើងវិញនាត្រីមាសទី៤ ឆ្នាំ២០១៦ ។
ខណៈសេដ្ឋកិច្ចប្រៀបដូចកំពុងងើបឡើងវិញ ដោយមានការជំរុញពីតម្លៃប្រេងកើនឡើង ប្រជាជនសាមញ្ញរបស់រុស្ស៊ីមិនទាន់មើលឃើញផលចំណេញនៅឡើយទេ ។
ទិន្នន័យបង្ហាញកាលពីសប្តាហ៍មុនថា ចំនួនប្រជាជនរុស្ស៊ីដែលរស់នៅក្រោមភាពក្រីក្របានកើនជិតដល់២០លាននាក់ក្នុងឆ្នាំ២០១៦ ដែលជាកម្រិតខ្ពស់ជាងគេក្នុងរយៈពេល៩ឆ្នាំមកនេះ ៕
ចែករំលែកព័តមាននេះ