កំពុងអានព័ត៌មាន ស្រាប់តែតក់ស្លុត
តាមប្រភពព័ត៌មាន Metro បានឲ្យដឹងថា អ្នកផ្សាយព័ត៌មានផ្ទាល់តាមកញ្ចក់ទូរទស្សន៍ម្នាក់បានស្លុតអារម្មណ៍ នៅពេលដឹងថា ប្តីរបស់ខ្លួនគឺជាអ្នក
ឥណ្ឌា ៖ តាមប្រភពព័ត៌មាន Metro បានឲ្យដឹងថា អ្នកផ្សាយព័ត៌មានផ្ទាល់តាមកញ្ចក់ទូរទស្សន៍ម្នាក់បានស្លុតអារម្មណ៍ នៅពេលដឹងថា ប្តីរបស់ខ្លួនគឺជាអ្នកស្លាប់នៅក្នុងហេតុការណ៍គ្រោះថ្នាក់ចរាចរណ៍ដែលខ្លួនកំពុងអាន។
អ្នកស្រី Supreet Kaur ដែលជាអ្នកអានព័ត៌មាននៅលើប៉ុស្តិ៍ IBC24 រដ្ឋ Chhattisgarh ប្រទេសឥណ្ឌា កំពុងតែអានព័ត៌មានទាន់ហេតុការណ៍មួយស្តីអំពីគ្រោះថ្នាក់ចរាចរណ៍ឡានបុកគ្នា។
យោងតាម The Indian Express បានឲ្យដឹងថា ទាល់តែអ្នកស្រីអានដល់សេចក្តីលំអិតរបស់ព័ត៌មាន បានអ្នកស្រីដឹងថា ជនរងគ្រោះម្នាក់ក្នុងចំណោម៣នាក់ដែលស្លាប់ គឺជាប្តីរបស់ខ្លួន។
បន្ទាប់ពីអ្នកស្រី Supreet បានដឹងរួចមក អ្នកស្រីនៅខំទប់ទឹកភ្នែក ហើយបន្តអានព័ត៌មានទាល់តែចប់ចុងចប់ដើម សរុបរយៈពេល១០នាទី។ គ្រាន់តែកាមេរ៉ាបិតភ្លាម អ្នកស្រីបានទ្រហ៊ោយំ ហើយទូរស័ព្ទទៅសួរបងប្អូនសាច់ញាតិភា្លម។
ប្តីរបស់អ្នកស្រី ឈ្មោះ Harshard Kawade បានធ្វើដំណើរក្នុងឡានជាមួយនឹងមនុស្ស៥នាក់។ ស្លាប់៣នាក់ និង របួសធ្ងន់២នាក់ ដោយសារតែទៅបុកជាមួយនឹងឡានដឹកទំនិញ។
អ្នកគ្រប់គ្រងកម្មវិធីព័ត៌មានបានមានប្រសាសន៍ថា «នៅពេលនាងកំពុងអានព័ត៌មាន នាងដឹងភ្លាមថា វាជាឡានដែលប្តីនាងធ្វើដំណើរនៅក្នុងនោះ។ ទោះបីជាខាងអ្នកយកព័ត៌មានមិនបានដាក់ឈ្មោះជនរងគ្រោះក៏ដោយ ក៏នាងនៅតែដឹងបានថា ជាប្តីរបស់ខ្លួន។ នាងពិតជាអាចរក្សាភាពម្ចាស់ការក្នុងការងារគួរឲ្យសរសើរ ព្រោះថា នាងអាចទប់អារម្មណ៍បានរហូតទាល់តែចប់កម្មវិធីផ្សាយផ្ទាល់។ គ្រាន់តែចប់ភ្លាម នាងស្រែកយំ ហើយទូរស័ព្ទទៅសាច់ញាតិភ្លាម»៕
ចែករំលែកព័តមាននេះ