ទូរស័ព្ទអនាមិកបង្កឱ្យប្ដីមិនទុកចិត្តប្រពន្ធសង្ស័យមានសហាយ
រាជធានីភ្នំពេញ ៖ ស្ត្រីម្នាក់បានធ្វើដំណើរទៅកាន់ប៉ុស្ដិ៍នគរបាលចោមចៅ ស្ថិតក្នុងស្ថានភាពរបួសប៉ោងមុខមួយចំហៀង ដើម្បីដាក់ពាក្យបណ្ដឹងសុំការអន្តរាគមន៍
រាជធានីភ្នំពេញ ៖ ស្ត្រីម្នាក់បានធ្វើដំណើរទៅកាន់ប៉ុស្ដិ៍នគរបាលចោមចៅ ស្ថិតក្នុងស្ថានភាពរបួសប៉ោងមុខមួយចំហៀង ដើម្បីដាក់ពាក្យបណ្ដឹងសុំការអន្តរាគមន៍ពីនគរបាលប៉ុស្ដិ៍ខាងលើ ។
នាងបានរៀបរាប់ទាំងទឹកភ្នែកថា នាងត្រូវប្ដីវាយធ្វើបាបព្រោះតែការប្រចណ្ឌគ្មានហេតុផល បន្ទាប់ពីមានបុរសម្នាក់ដែលមិនធ្លាប់ស្គាល់គ្នាទាល់តែសោះ បានទូរស័ព្ទច្រឡំចូលលេខទូរស័ព្ទរបស់នាង និងបានហៅនាងថាអូនៗពេញមាត់ ។ មិនតែប៉ុណ្ណោះ ទោះជានាងប្រាប់ថាមិនដែលស្គាល់ និងជាការច្រឡំលេខក៏ដោយ ក៏ជននោះមិនព្រមស្ដាប់ និងបានទូរស័ព្ទមករកនាងម្ដងជាពីរដង ទើបធ្វើឲ្យប្ដីនាងអស់ទំនុកចិត្តលើនាង ចេះតែមួម៉ៅនិងបានរករឿងវាយធ្វើបាបនាងបែបនេះតែម្ដង។
ហេតុការណ៍នេះ បានកើតឡើងកាលពីវេលាម៉ោង៣និង៣០នាទីរសៀលថ្ងៃទី៤ ខែមេសា នៅបន្ទប់ជួល ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។ ស្ត្រីរងគ្រោះខាងលើឈ្មោះ ហោ ខន អាយុ៣៤ឆ្នាំ ជាកម្មការិនីរោងចក្រកាត់ដេរ ចំណែកបុរសជាប្តីឈ្មោះ លឹម ស៊ឹម អាយុ៣៤ឆ្នាំ មុខរបររត់ម៉ូតូឌុប ស្នាក់នៅផ្ទះជួលក្នុងភូមិខាងលើ មានស្រុកកំណើតនៅខេត្តកំពត និងមានកូន២នាក់នៅក្នុងបន្ទុក ។
ស្ត្រីខាងលើបានឲ្យដឹងថា កាលពីថ្ងៃទី១ ខែមេសា គឺ៣ថ្ងៃមុនពេលកើតហេតុ ទូរស័ព្ទរបស់នាងបានរោទ៍ឡើង ។ ខណៈនោះអត់ដែលស្គាល់លេខគ្នាសោះ ប៉ុន្តែដោយសារតែខ្លាចមានបងប្អូនសាច់ញាតិមានការសំខាន់ ឬមានទុក្ខធុរៈអ្វីចាំបាច់ ទើបនាងចុចទទួល ហើយពេលនោះប្ដីនាងក៏ស្ថិតនៅទីនោះដែរ ។ គ្រាន់តែលើកទទួលភ្លាម បានឮសំឡេងបុរសម្នាក់និយាយថា «អាឡូអូន!នៅឯណា?» ។ ឯនាងបានសួរត្រឡប់ទៅវិញថា «តើនរណាហ្នឹង?» បុរសនោះប្រាប់ថា បងឈ្មោះទី និងបានសួរនាងថា «អូនឯងភ្លេចបងហើយអី? យើងធ្លាប់ជួបគ្នានៅកំពង់ស្ពឺនោះអី!» ។
ខណៈឮបែបនេះ ធ្វើឲ្យនាងស្រឡាំងកាំង ព្រោះមិនដែលមានទំនាក់ទំនងជាមួយបុរសនោះឡើយ ហើយនាងក៏បានឆ្លើយតបវិញថា «ខ្ញុំអត់ស្គាល់ទេ ខ្ញុំមានប្តីមានកូនហើយ កូនខ្ញុំធំចង់ប៉ុនម្តាយហើយ» ។ បន្ទាប់មកនាងក៏បានបិទទូរស័ព្ទឈប់និយាយតទៅទៀត ។
ប្រភពដដែលបន្តថា ការនិយាយទូរស័ព្ទនាពេលនោះ នាងបានបើកសំឡេងឮខ្លាំងៗចេញក្រៅឲ្យប្ដីស្ដាប់ដែរ គឺមិនបានលាក់លៀមឡើយ ។ ប៉ុន្តែក្រោយពីស្ដាប់ចប់ ប្តីនាងហាក់មានអាកប្បកិរិយាខុសប្លែកពីពេលមុន ទាំងកាយវិការ និងការនិយាយស្ដីមកកាន់នាងជាដើម ។ ចំណែកបុរសឈ្មោះទី នោះ បានទូរស័ព្ទមករកនាងទៀតនៅថ្ងៃបន្ទាប់ និងនិយាយតែពាក្យដដែល ហាក់ដូចជាចង់បំបែកបំបាក់គ្រួសាររបស់នាង ។ ការទូរស័ព្ទលើកចុងក្រោយ នាងបានឲ្យប្ដីលើកជំនួស ពេលនោះជនខាងលើបានប្រាប់ប្ដីនាងថា «ឲ្យខ្ញុំសុំជួបប្រពន្ធខ្ញុំបន្តិចមក» ។ ខណៈនោះធ្វើឲ្យប្ដីនាងកាន់តែខឹងច្រឡោតយ៉ាងខ្លាំង ហើយក៏បានទាស់ពាក្យសម្ដីគ្នាតាមទូរស័ព្ទយ៉ាងស្រួចស្រាល់បំផុតជាមួយជននោះ ។
ស្ត្រីរងគ្រោះបានបន្តទៀតថា នាងនិងប្ដីបានរៀបការនឹងគ្នាពេញច្បាប់យូរឆ្នាំមកហើយ រហូតមានកូនជាមួយគ្នា២នាក់ទៀតផង ។ នាងមិនដែលមានចិត្តផិតក្បត់ប្ដីនោះឡើយ សូម្បីតែគិតក៏គ្មានផង មួយថ្ងៃៗគិតតែពីខំប្រឹងរកស៊ីប៉ុណ្ណោះ ដើម្បីអនាគតកូនទាំង២នាក់ និងគ្រួសារទាំងមូល ហើយក្រុមគ្រួសារក៏មិនដែលមានបញ្ហាអ្វីកើតឡើងដែរ ។ ប៉ុន្តែចាប់តាំងពីពេលមានអ្នកទី៣ចូលជ្រៀតជ្រែកនោះមក ធ្វើឲ្យគ្រួសារមានភាពរង្គោះរង្គើអស់ នាងធ្វើអ្វីក៏ខុសចិត្តប្ដីរហូត ហើយប្ដីតែងតែរករឿងឈ្លោះទាស់រហូត ព្រោះគាត់ប្រចណ្ឌនាងជាមួយបុរសឈ្មោះទី នោះ ដែលសូម្បីតែមុខមាត់ រាងរៅបែបណាក៏នាងមិនដែលស្គាល់ផងនោះ ។
លុះនៅថ្ងៃទី៤ ខែមេសា វេលាម៉ោង៣និង៣០នាទីរសៀល ខណៈនាងកំពុងនៅផ្ទះ ហើយប្ដីជិះម៉ូតូចូលទៅដល់នាងបានសួរថា ថ្មើរហ្នឹងហើយទើបមកពីណា? ពេលនោះប្តីឆ្លើយថា «មានមុខអីហៅអញប្តីដែរ?» និយាយរួចក៏ស្រាប់តែលោកប្តីនោះក្តាប់ដៃវាយនាង១ដៃបណ្ដាលឲ្យរបួសប៉ោងមុខ១ចំហៀងខាងឆ្វេងតែម្តង ។ ដោយសារតែប្ដីមិនយល់ចិត្ត មិនចេះបែងចែកល្អអាក្រក់បែបនេះ ទើបនាងសម្រេចចិត្តប្ដឹងសុំឲ្យនគរបាលជួយអន្តរាគមន៍បើមិនដូច្នោះទេ ប្ដីនាងនឹងវាយធ្វើបាបនាងមិនឈប់ឡើយ ៕
ចែករំលែកព័តមាននេះ