ប្រទេសអីុស្រាអែល ៖ ក្រុមហ៊ុនរដ្ឋ Israel Aerospace Industries (IAI) និយាយកាលពីថ្ងៃព្រហស្បតិ៍សប្ដាហ៍មុនថា ពួកគេបានសម្រេចកិច្ចព្រមព្រៀងតម្លៃជិត២ប៊ីលានដុល្លារអាមេរិក ក្នុងការ
ប្រទេសអីុស្រាអែល ៖ ក្រុមហ៊ុនរដ្ឋ Israel Aerospace Industries (IAI) និយាយកាលពីថ្ងៃព្រហស្បតិ៍សប្ដាហ៍មុនថា ពួកគេបានសម្រេចកិច្ចព្រមព្រៀងតម្លៃជិត២ប៊ីលានដុល្លារអាមេរិក ក្នុងការលក់ប្រព័ន្ធការពារកាំជ្រួចមីស៊ីលទៅឲ្យកងយោធាលើគោក និងជើងទឹករបស់ឥណ្ឌា ដែលនេះជាកិច្ចព្រមព្រៀងលក់អាវុធធំជាងគេរបស់ប្រទេសអីុស្រាអែល ។
ក្រុមហ៊ុននេះបាននិយាយក្នុងសេចក្តីថ្លែងការណ៍មួយថា ពួកគេនឹងផ្គត់ផ្គង់ប្រព័ន្ធការពារលើអាកាសដ៏ទំនើបមួយ ដែលរួមមានកាំភ្លើងបាញ់កាំជ្រួចមីស៊ីល និងបច្ចេកវិទ្យាទំនាក់ទំនងនិងគ្រប់គ្រងទៅឲ្យកងយោធារបស់ឥណ្ឌា ក្នុងតម្លៃប្រមាណ១,៦ប៊ីលានដុល្លារ ។
សេចក្តីថ្លែងការណ៍បន្តថា ប្រព័ន្ធការពារជើងទឹកមួយទៀតរួមមានកាំភ្លើងបាញ់មីស៊ីល នឹងត្រូវបានដាក់លើនាវាដឹកជញ្ជូនយន្តហោះរបស់ឥណ្ឌាទី១ ដែលកំពុងនៅក្រោមការសាងសង់។ តម្លៃនៃការទិញនេះមិនទាន់ត្រូវបានប្រកាសឲ្យដឹងទេ ប៉ុន្តែ IAI និយាយថា តម្លៃសរុបស្មើជិត២ប៊ីលានដុល្លារ ។
គួរបញ្ជាក់ថា ប្រទេសអីុស្រាអែលស្ថិតក្នុងចំណោមអ្នកផ្គត់ផ្គង់អាវុធធំៗទាំងបីរបស់ឥណ្ឌា ដោយមានព្រំប្រទល់ជាប់ប្រទេសចិន និងប៉ាគីស្ថាន ដែលមានអាវុធនុយក្លេអ៊ែរ។
យោងតាមសភាជាតិរបស់អាមេរិកឲ្យដឹងថា រវាងឆ្នាំ២០០៨ ដល់២០១៥ ប្រទេសឥណ្ឌាគឺជាអ្នកទិញអាវុធច្រើនជាងគេលេខ២ ដែលមកពីប្រទេសកំពុងអភិវឌ្ឍន៍ ។
មកដល់ពេលថ្មីៗនេះ ប្រទេសឥណ្ឌាបានរក្សាទំនាក់ទំនងយោធាជាមួយអីុស្រាអែលដោយស្ងៀមស្ងាត់ ព្រោះតែភ័យខ្លាចថា អាចធ្វើឲ្យប្រទេសអារ៉ាប់ និងប្រជាជនដែលកាន់សាសនាអ៊ិស្លាមខឹងសម្បា ។
ប៉ុន្តែលោកនាយករដ្ឋមន្ត្រីឥណ្ឌា Narendra Modi បានធ្វើឲ្យទំនាក់ទំនងរវាងប្រទេសទាំងពីរកាន់តែប្រសើរឡើងដោយបើកចំហ ហើយនឹងធ្វើទស្សនកិច្ចទៅកាន់ប្រទេសអីុស្រាអែល ក្នុងឆ្នាំនេះទៀតផង ៕
ចែករំលែកព័តមាននេះ