ទីក្រុងក្យូដូ ៖ បណ្តារដ្ឋមន្ត្រីសេដ្ឋកិច្ចអាស៊ាន និងនាយករដ្ឋមន្ត្រីជប៉ុន បានឯកភាពបញ្ចប់កិច្ចព្រមព្រៀងពាណិជ្ជកម្មដ៏ធំមួយក្នុងឆ្នាំនេះ ដែលមានឈ្មោះថា កិច្ចព្រមព្រៀងភាពជាដៃគូសេដ្ឋកិច្ចទូលំទូលាយកម្រិតតំបន់ (RCEP) ។ នេះបើយោងតាមសេចក្តីប្រកាសព័ត៌មានរបស់ក្រសួងពាណិជ្ជកម្មនាពេលថ្មីៗនេះ ក្នុងឱកាសរដ្ឋមន្ត្រីសេដ្ឋកិច្ចនៃប្រទេសអាស៊ានចូលជួបសម្តែងការគួរសមជាមួយលោក ស៊ិនហ្សូ អាបេ នាយករដ្ឋមន្ត្រីជប៉ុន កាលថ្ងៃទី៨ មេសា នៅខេត្តអូសាកា ប្រទេសជប៉ុន ។
ដើម្បីសម្រេចបាននូវកិច្ចព្រមព្រៀងភាពជាដៃគូសេដ្ឋកិច្ចទូលំទូលាយកម្រិតតំបន់នេះ សេចក្តីប្រកាសបញ្ជាក់ថា ៖ « រដ្ឋមន្ត្រីសេដ្ឋកិច្ចអាស៊ាន និងនាយករដ្ឋមន្ត្រីជប៉ុនបានពិភាក្សា និងព្រមព្រៀងលើការអភិវឌ្ឍធនធានមនុស្ស, ការរៀបចំច្បាប់ និងកិច្ចសហប្រតិបត្តិការសេដ្ឋកិច្ចក្នុងតំបន់ដូចជា ហេដ្ឋារចនាសម្ព័ន្ធដើម្បីសម្រេចបាននូវក្របខ័ណ្ឌពាណិជ្ជកម្មសេរីមានលក្ខណៈគ្រប់ជ្រុងជ្រោយ, គុណភាពខ្ពស់ និងផ្តល់អត្ថប្រយោជន៍ឲ្យគ្នាទៅវិញទៅមក។ ប្រទេសជប៉ុនត្រូវបានរំពឹងថា នឹងអភិវឌ្ឍផែនការជាក់លាក់សម្រាប់កញ្ចប់កិច្ចសហប្រតិបត្តិការជាមួយអាស៊ាន រួមមាន ការគាំទ្រក្រុមហ៊ុនខ្នាតតូច និងមធ្យមនៅក្នុងប្រទេសជាសមាជិកអាស៊ាន » ។
យោងតាមទិន្នន័យពីនាយកដ្ឋានស្ថិតិអាស៊ាន បង្ហាញថា ពាណិជ្ជកម្មទ្វេភាគីរវាងអាស៊ាន និងជប៉ុនបានកើនដល់២៣៨ពាន់លានដុល្លារក្នុងឆ្នាំ២០១៥ ។ អាស៊ានបាននាំចេញចំនួន១១៤ពាន់លានដុល្លារទៅកាន់ប្រទេសជប៉ុន ខណៈនាំចូលពីប្រទេសនៅអាស៊ីខាងកើតច្រើនជាង១២៤ពាន់លានដុល្លារនៅក្នុងឆ្នាំដដែល ។
គួររំឭកដែរថា RCEP គឺជាកិច្ចព្រមព្រៀងពាណិជ្ជកម្មសេរី (FTA) ដែលត្រូវបានស្នើឡើងរវាងរដ្ឋទាំង១០នៃសមាជិកអាស៊ាន ជាមួយប្រទេសចំនួន៦ (អូស្ត្រាលី, ចិន,
ឥណ្ឌា, ជប៉ុន, កូរ៉េខាងត្បូង និងនូវែលសេឡង់) ។ កិច្ចពិភាក្សាស្តីពី RCEP ត្រូវបានបើកដំណើរការជាផ្លូវការនៅក្នុងខែវិច្ឆិកា ឆ្នាំ២០១២ នៅឯកិច្ចប្រជុំកំពូលអាស៊ាន ធ្វើឡើងក្នុងប្រទេសកម្ពុជា ៕
ចែករំលែកព័តមាននេះ