រាជរដ្ឋាភិបាលអនុម័តគោលនយោបាយជំរុញចលនាភូមិ1 ផលិតផល1
រាជធានីភ្នំពេញ ៖ រាជរដ្ឋាភិបាលកម្ពុជាបានប្រកាស និងអនុម័តជាផ្លូវការនូវគោលនយោបាយជំរុញចលនាភូមិមួយ ផលិតផលមួយឆ្នាំ២០១៦-២០២៦ ជាផ្លូវការ ដែលគេរង់ចាំជាយូរមកហើយ ។
រាជធានីភ្នំពេញ ៖ រាជរដ្ឋាភិបាលកម្ពុជាបានប្រកាស និងអនុម័តជាផ្លូវការនូវគោលនយោបាយជំរុញចលនាភូមិមួយ ផលិតផលមួយឆ្នាំ២០១៦-២០២៦ ជាផ្លូវការ ដែលគេរង់ចាំជាយូរមកហើយ ។
អគ្គលេខាធិការគណៈកម្មាធិការជំរុញចលនាភូមិមួយ ផលិតផលមួយ លោក ជា សំណាង បានថ្លែងនៅក្នុងពិធីប្រកាសដាក់ឲ្យដំណើរការនូវគោលនយោបាយនាព្រឹកថ្ងៃទី៦ មេសា ថា គោលនយោបាយនេះ មានគោលដៅជំរុញការអភិវឌ្ឍខ្សែសង្វាក់ផលិតកម្ម ឬសេវានៅតាមភូមិឋានឬសហគមន៍ ទាំងការផលិត ការកែច្នៃ ការវេចខ្ចប់ និងការអភិវឌ្ឍផលិតផលមួយ ឬច្រើនដើម្បីបង្កើនតម្លៃបន្ថែម និងស្វែងរកទីផ្សារទាំងក្នុងស្រុក និងក្រៅប្រទេស ដោយបង្កើនប្រាក់ចំណូលរបស់ប្រជាជនម្នាក់ៗឲ្យឡើងខ្ពស់ កាត់បន្ថយភាពក្រីក្រឲ្យបានឆាប់រហ័ស ដើម្បីឲ្យកម្ពុជាក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ ។
លោក ហាស វង់ដារ៉ា អគ្គលេខារងគណៈកម្មាធិការជំរុញចលនាភូមិមួយ ផលិតផលមួយ ថ្លែងថា គោលនយោបាយជាតិជំរុញចលនាភូមិមួយ ផលិតផលមួយ សមស្របនឹងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ជាអ្វីដែលសម្តេចតេជោយល់ថា វាមានសារសំខាន់ក្នុងការចូលរួមលើកកម្ពស់ជីវភាព និងកាត់បន្ថយភាពក្រីក្ររបស់ប្រជាពលរដ្ឋ ។ គោលនយោបាយនេះបានផ្តោតសំខាន់លើចំណុចសំខាន់ៗចំនួនបី ១-គិតជាសកលដល់មូលដ្ឋាន ការពឹងផ្អែកលើខ្លួនឯង ។ ២-ការច្នៃប្រឌិតឲ្យរស់រវើក ធ្វើយ៉ាងណាឲ្យភូមិមួយ មានផលិតផលមួយយ៉ាងតិច និងផលិតឲ្យបានច្រើន ព្រោះការផលិតបានច្រើននឹងធ្វើឲ្យថ្លៃដើមនៃការផលិតមានតម្លៃទាប និង៣-ការអភិវឌ្ឍធនធានមនុស្ស ដោយផ្តោតសំខាន់លើយុវជនជាអ្នកបន្តវេន ។
លោកបន្តថា រហូតមកទល់ពេលនេះ កម្ពុជាមិនទាន់មានចលនាភូមិមួយ ផលិតផលមួយនៅឡើយទេ ដែលការងារនេះថ្នាក់ខេត្ត-រាជធានី ជាអ្នករៀបចំ និងលើកសំណើមកកាន់គណៈកម្មាធិការជំរុញចលនាភូមិមួយ ផលិតផលមួយពិនិត្យ និងសម្រេច ។ លើសពីនេះ គណៈកម្មាធិការនេះ ក៏នឹងផ្តោតលើការងារសំខាន់ជាច្រើនទៀតដូចជា លើកកម្ពស់ការយល់ដឹងដល់សិប្បករ ឧស្សាហករ ការពង្រឹងស្ថាប័ន ការអភិវឌ្ឍធនធានមនុស្ស ការស្រាវជ្រាវនិងអភិវឌ្ឍន៍ទីផ្សារ និងប្រភពទុនជាដើម ។ លោកបន្តថា គោលនយោបាយជាតិជំរុញចលនាភូមិមួយ ផលិតផលមួយ ក៏នឹងដាក់ចេញនូវយុទ្ធសាស្ត្រចំនួន១៥បន្ថែមទៀត តាមរយៈយន្តការផលិតផលដំបូង កែច្នៃ និងការរកទីផ្សារ។
លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារ និងអភិវឌ្ឍន៍វិស័យកសិកម្មកម្ពុជា និងជាតំណាងសម្តេចតេជោ ហ៊ុន សែន ថ្លែងថា គោលនយោបាយជាតិនេះ មានគោលដៅជំរុញការលើកកម្ពស់កំណើនសេដ្ឋកិច្ច លើកកម្ពស់គុណភាពជីវិត បង្កើនប្រាក់ចំណូល និងកាត់បន្ថយភាពក្រីក្ររបស់ប្រជាពលរដ្ឋ។ គោលនយោបាយនេះ មានលក្ខណៈពិសេស ដោយផ្សារភ្ជាប់ជាមួយវិស័យទេសចរណ៍ដែលកំពុងរីកចម្រើននាពេលសព្វថ្ងៃនេះ តាមរយៈការផលិតផលិតផលមានគុណភាព និងស្តង់ដា ដើម្បីបង្កើនការប្រើប្រាស់ក្នុងស្រុក និងជំរុញការនាំចេញ ។
លោកបន្តថា ៖ « គោលនយោបាយនេះ ត្រូវដឹកនាំដោយអភិបាលខេត្ត-រាជធានីនីមួយៗ ដែលនឹងដើរតួនាទីជាប្រធានគណៈកម្មាធិការជាតិ ជំរុញចលនាភូមិមួយ ផលិតផលមួយ ដើម្បីរួមចំណែកជំរុញការប្រើប្រាស់ផលិតផលខ្មែរ ជាមួយរាជរដ្ឋាភិបាលក្នុងការអភិវឌ្ឍសេដ្ឋកិច្ច និងសង្គមប្រកបដោយចេរភាព » ។
លោកបន្តថា ដោយសារប្រទេសកម្ពុជារីកចម្រើន និងមានសេដ្ឋកិច្ចលូតលាស់ ដែលបានទាក់ទាញវិនិយោគិនអន្តរជាតិជាច្រើនចូលមកវិនិយោគនៅកម្ពុជា ។ សម្តេចតេជោមិនត្រឹមតែនាំមកនូវសុខសន្តិភាព អភិវឌ្ឍន៍សេដ្ឋកិច្ចជាតិនោះទេ ប៉ុន្តែបានធ្វើឲ្យកម្ពុជាមានកិត្យានុភាពលើឆាកអន្តរជាតិផងដែរ ។
លោកឧបនាយករដ្ឋមន្ត្រី យឹម ឆៃលី បន្តថា៖ « គោលនយោបាយនេះធ្វើឡើងដើម្បីជំរុញការប្រើប្រាស់ផលិតផលខ្មែរក្នុងស្រុក និងបង្កើនគុណភាពដើម្បីនាំចេញផងដែរ។ ហេតុនេះ ក្រសួងសេដ្ឋកិច្ច និងហិរញ្ញវត្ថុ ត្រូវបង្កើនកញ្ចប់ថវិកាដល់គណៈកម្មាធិការជំរុញចលនាជាតិភូមិមួយ ផលិតផលមួយ ដើម្បីឲ្យពួកគេមានថវិកាសមស្របសម្រាប់បំពេញការងារ » ៕
ចែករំលែកព័តមាននេះ