គ្រោះថ្នាក់ចរាចរណ៍តិចតួចនាំគ្នាព្រួតវាយបុរសពិការជើងសន្លប់
រាជធានីភ្នំពេញ ៖ គ្រោះថ្នាក់ចរាចរណ៍តិចតួចទូរស័ព្ទហៅបក្សពួកទៅវាយអ្នកបើករ៉ឺម៉កដែលពិការជើងទាំងសងខាង
រាជធានីភ្នំពេញ ៖ គ្រោះថ្នាក់ចរាចរណ៍តិចតួចទូរស័ព្ទហៅបក្សពួកទៅវាយអ្នកបើករ៉ឺម៉កដែលពិការជើងទាំងសងខាង និងបណ្តាលឱ្យសន្លប់ស្តូកស្តឹង បង្កឱ្យមានការភ្ញាក់ផ្អើលដល់ប្រជាពលរដ្ឋដែលធ្វើដំណើរតាមដងផ្លូវឈប់ចោមរោមយ៉ាងកកកុញកាលពីវេលាម៉ោង៨យប់ ថ្ងៃទី៩ ខែមេសា ឆ្នាំ២០១៧ ត្រង់ចំណុចតាមបណ្តោយផ្លូវសហព័ន្ធរុស្ស៉ីខាងលិចច្រកចូលថ្មីរបស់អាកាសយន្តដ្ឋានភ្នំពេញអន្តរជាតិ ស្ថិតនៅក្នុងសង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះដែលពិការជើងទាំងសងខាងមានឈ្មោះ ចាន់ មករា ភេទប្រុស អាយុ៣៨ឆ្នាំ ស្នាក់នៅភូមិព្រៃសាក់ សង្កាត់ចោមចៅ ខណ្ឌពោធិ៍សែនជ័យ ។ ចំណែកឯជនបង្កដែលជាអ្នកបើកបរម៉ូតូឈ្មោះ ចាន់ សីហា ភេទប្រុស អាយុ២៦ឆ្នាំ ស្នាក់នៅផ្ទះជួលម្តុំកាណាឌីយ៉ា ក្នុងសង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅស្រុកកោះសូទិន ខេត្តកំពង់ចាម និងអ្នករួមដំណើរពីក្រោយឈ្មោះ មុត ភារម្យ អាយុ៣៤ឆ្នាំ ស្នាកនៅភូមិក្បាលដំរី សង្កាត់កាកាប ឃុំគគី ស្រុកកៀនស្វាយ ខេត្តកណ្តាល ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញបុរសរងគ្រោះខាងលើបើករ៉ឺម៉កម៉ូតូមួយគ្រឿងអត់មានស្នាកលេខរួមដំណើរពីក្រោយដោយនារីពីរនាក់ និងប្រុសពីនាក់រួមទាំងក្មេងតូចម្នាក់ផងដែរទើបចេញមកពីម្តុំព្រៃទាបំណងទៅលេងនៅផ្សារស៊ីនជូរី លុះមកដល់ចំណុចកើតហេតុខាងលើ ស្រាប់តែមានម៉ូតូជិះមកពីក្រោយមួយគ្រឿងម៉ាកហ្ស៊ុយសាគីស្មាសវី ពណ៌ក្រហម ពាក់ស្លាកលេខកណ្តាល 1S-2245 បើកបរដោយបុរសពីរនាក់ស្រវឹងជោកជាំបានជិះទៅបុកគូទរ៉ឺម៉កម៉ូតូខាងលើចំពីក្រោយបណ្តាលឱ្យដួលរងខូចខាតតិចតួច ។ ភ្លាមៗនោះជនបង្កបានហៅមេការម្នាក់ឈ្មោះ លឹម ស្រ៊ុន អាយុ៣៦ឆ្នាំ ស្នាក់ភូមិក្បាលដំរី ស្រុកកំណើតស្រុកកោះសូទឹន ខេត្តកំពង់ចាម និងបក្សពួកពីរនាក់ទៀតទី១-ឈ្មោះ ឆើត ឧត្តម អាយុ២៩ឆ្នាំ ស្នាក់នៅភូមិក្បាលដំរី សង្កាត់កាកាប ខណ្ឌពោធិ៍សែនជ័យ, ទី២-ឈ្មោះ សុខ ណេង ភេទប្រុស អាយុ២៦ឆ្នាំ ស្នាក់នៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ មកឱ្យជួយដោះស្រាយខណៈពេលបុរសជាមេការកំពុងតែនិយាយដោះស្រាយ ស្រាប់តែជនបង្កដែលជាអ្នកបើកបរម៉ូតូរួមទាំងបក្សពួកលោតទៅវាយបុរសរងគ្រោះបង្កឱ្យមានការភ្ញាក់ផ្អើលដល់ប្រជាពលរដ្ឋឈប់ចោមរោមមើល និងមានការប្រតាយប្រតប់គ្នាទៅវិញទៅមកពេញដងផ្លូវទោះជាមានសមត្ថកិច្ចមកជួយអន្តរាគមន៍ក៏មិនស្តាប់ បណ្តាលឱ្យបុរសរងគ្រោះរងរបួសសន្លប់ស្តូកស្តឹង ពេលនោះជនបង្កបានរួមទាំងបក្សពួកម្នាក់ឈ្មោះ ឆើត ឧត្តម បានឆ្លៀតឱកាសលើកម៉ូតូជិះរត់គេចខ្លួនក៏ត្រូវបានសមត្ថកិច្ចអន្តរាគមន៍ពិសេសខណ្ឌពោធិ៍សែនជ័យធ្វើការប្រដេញចាប់ឃាត់បានត្រង់ចំណុចច្រកចូលវត្តតាំងកសាំង ។
ក្រោយពេលកើតហេតុបុរសរងគ្រោះត្រូវសាច់ញាតិដឹកតាមរ៉ឺម៉កម៉ូតូបញ្ជូនទៅសង្គ្រោះនៅមន្ទីរពេទ្យព្រះកុសុមៈ ចំណែកឯជនបង្ករួមទាំងបក្សពួកត្រូវសមត្ថកិច្ចនាំខ្លួនយកទៅសាកសួរ និងកសាងសំណំរឿងបញ្ជូនទៅអធិការដ្ឋាននគរបាលខណ្ឌពោធិ៍សែនជ័យដើម្បីរងចាំការចាត់ការតាមនីតិវីធី ៕
ចែករំលែកព័តមាននេះ