ខេត្តកណ្តាល ៖ បុរសចិត្តភ្លើងម្នាក់ត្រូវប្រពន្ធប្តឹងប៉ូលិសស្រុកស្អាងឱ្យចាប់ខ្លួន បន្ទាប់ពីរូបគេផឹកស្រាស្រវឹង ហើយដុតផ្ទះឆេះម៉ដ្ឋ ដោយសារតែខឹងប្រពន្ធ កូនមិននៅផ្ទះ។ ហេតុការណ៍នេះកើតឡើងកាលពីថ្ងៃទី៦ មីនា នៅភូមិជ្រោយឫស្សី ឃុំប្រាសាទ ស្រុកស្អាង។ ផ្ទះដែលបុរសអគតិដុតឆេះអស់ម៉ដ្ឋនេះមានទំហំ៣គុណនឹង៤ម៉ែត្រ ធ្វើអំពីឈើ ជញ្ជាំងស្លឹក និងដំបូលប្រក់ស្លឹក។
តាមប្រភពពីមន្ត្រីប៉ូលិសបានឱ្យដឹងថា បន្ទាប់ពីទទួលពាក្យបណ្តឹងពីស្ត្រីឈ្មោះតន វណ្ណា អាយុ៣៣ឆ្នាំ ប្តឹងប្តីរបស់ខ្លួនឈ្មោះវង់ ជាង អាយុ២៩ឆ្នាំ ថា បានប្រព្រឹត្តផ្តេសផ្តាសដុតផ្ទះចោលឆេះម៉ត់ កាលពីវេលាម៉ោង៦ល្ងាច ថ្ងៃទី៦ មីនា ។ ក្រោយហេតុការណ៍បន្តិចប៉ូលិសបានឃាត់ខ្លួនបុរសជាប្តីរូបនោះបញ្ជូនទៅអធិការដ្ឋាននគរបាលស្រុកស្អាង។ នៅចំពោះមុខប៉ូលិសបុរសឈ្មោះវង់ ជាង បានសារភាពថា មុនពេលកើតហេតុខ្លួនបានទៅទិញស្រាសមកផឹកនៅផ្ទះតែម្នាក់ឯង អស់មួយលីត្រស្រវឹងស្រឿងៗ ហើយពេលនោះប្រពន្ធ និងកូនដើរលេងអស់រហូតរសៀលទើបត្រឡប់មកវិញ ហើយខ្លួនដើររកមិនឃើញក៏កើតក្តីក្តៅក្រហាយជាខ្លាំង និងបានត្រៀមរំពាត់មួយដោយគំនិតថា ពេលត្រឡប់មកវិញ នឹងវាយឱ្យរាងចាលម្តង ។ លុះពេលប្រពន្ធ និងកូនត្រឡប់មកវិញខ្លួនបានទាញរំពាត់ដែលត្រៀមទុកនោះមកគំរាមរកវាយកូន ក៏កើតជាទំនាស់ពាក្យសម្តីជាមួយប្រពន្ធ ហើយប្រពន្ធបានជេរបញ្ចោរខ្លួនយ៉ាងចាស់ដៃធ្វើឱ្យប្តីខឹងទ្រាំមិនបានក៏យកចង្កៀងប្រេងកាតដែលមានប្រេងស្រាប់មកចាក់លើជញ្ជាំង ហើយដុតឆេះម៉ដ្ឋអស់តែម្តង។
បើតាមសំដីប្រពន្ធឈ្មោះតន វណ្ណា បានប្រាប់ប៉ូលិសថា ប្តីកំហូចនេះឱ្យតែស្រវឹងស្រារករឿងក្រុមគ្រួសារឥតឈប់ និងបំផ្លាញទ្រព្យសម្បត្តិក្នុងផ្ទះជាច្រើនលើកច្រើនសាមកហើយពេលនេះដុតផ្ទះចោលទៀតធ្វើឱ្យទ្រាំលែងបានក៏ប្តឹងប៉ូលិសឱ្យចាប់ខ្លួន៕
ចែករំលែកព័តមាននេះ