ខេត្តក្រចេះ ៖ ឈើអារប្រភេទលេខ១ លេខ២ និងលេខ៣ ចំនួនជាង១រយម៉ែត្រគូប ត្រូវបានបង្ក្រាបដោយអាជ្ញាធរខេត្ដ ក្នុងការចុះរុករកនៅក្នុងព្រៃដែនជំរកសត្វស្នួល ក្នុងភូមិសាស្ត្រឃុំកាបី ស្រុកស្នួល ដែលរហូតមកទល់នឹងពេលនេះគឺមានរយៈពេល៥ថ្ងៃ ដោយគិតចាប់ពីថ្ងៃទី២៣ ដល់ថ្ងៃទី២៧ មករា។ អាជ្ញាធរខេត្ដដឹកនាំដោយលោកស្រី ចាត សូរស្មី ព្រះរាជអាជ្ញាអមសាលាដំបូងរួមជាមួយនឹងមន្ដ្រីខណ្ឌរដ្ឋបាលព្រៃឈើ ផ្នែក សង្កាត់ ព្រមទាំងកំលាំងកងរាជអាវុធហត្ថខេត្ដ កំលាំងកងរាជអាវុធហត្ថលើផ្ទៃប្រទេស ជាលក្ខណៈទ្រង់ទ្រាយធំ បានចុះធ្វើសកម្មភាពបង្ក្រាបសកម្មភាពកាប់និងដឹកជញ្ជូនឈើអនាធិបតេយ្យនៅក្នុងព្រៃដែនជំរកសត្វស្នួល ដែលគិតមកទល់នឹងថ្ងៃទី២៧ មករា គឺមានរយៈពេល៥ថ្ងៃជាប់ៗគ្នា ដោយធ្វើការរុករកនិងរឹបអូសបានឈើគ្រប់ប្រភេទមានចំនួនជាង១រយម៉ែត្រគូប ព្រមទាំងរថយន្ដច្នៃជាច្រើនគ្រឿង ក្នុងនោះក៏មានការឃាត់ខ្លួនជនមួយចំនួនផងដែរ។
នៅក្នុងប្រតិបត្ដិការរយៈពេល៥ថ្ងៃនេះ មន្ដ្រីរដ្ឋបាលព្រៃឈើមួយរូបបានឱ្យដឹងកាលពីព្រឹកថ្ងៃទី២៨ មករា ថា ចំនួនឈើដែលត្រូវសមត្ថកិច្ចធ្វើការរុករកក្នុងព្រៃដែនជំរកសត្វស្នួល និងនៅខាងក្រៅ ហើយត្រូវបានរឹបអូសនោះ មានចំនួនសរុបជាង១២៩ម៉ែត្រគូប ក្នុងនោះមានប្រភេទឈើអារលេខ១ ចំនួនជាង៦៤ម៉ែត្រគូប ឈើអារលេខ២ ចំនួនជាង៦៤ម៉ែត្រគូប និងឈើអារលេខ៣ មានចំនួន០,៤៦៣ម៉ែត្រគូប ព្រមទាំងធ្វើការដកហូតរថយន្ដដឹកឈើកែច្នៃប្រភេទរ៉េវ ចំនួន៨គ្រឿង ដែលសំភារទាំងនេះត្រូវបានយកមករក្សាទុកនៅសង្កាត់រដ្ឋបាលព្រៃឈើស្នួល ដើម្បីធ្វើការវាស់វែង និងចាត់វិធានការតាមនីតិវិធី។
មិនមានប្រភពព័ត៌មានណាមួយបញ្ជាក់ឱ្យដឹងអំពីយុទ្ធនាការដ៏កក្រើកនេះថា នឹងប្រព្រឹត្ដទៅរយៈពេលប៉ុន្មានថ្ងៃទៀតនោះទេ ខណៈដែលសកម្មភាពចុះរុករកនៅតែបន្ដ។ នៅក្នុងប្រតិបត្ដិការបង្ក្រាបបទល្មើសឈើខុសច្បាប់ដែលប្រើប្រាស់កងកំលាំងជាទ្រង់ទ្រាយធំកក្រើកពេញផ្ទៃស្រុកស្នួលនេះ សមត្ថកិច្ចក៏បានឃាត់ខ្លួនមនុស្សចំនួន១១នាក់ផងដែរ ដែលជនទាំងនេះមានការពាក់ព័ន្ធជាមួយនឹងបទល្មើសឈើដែលសមត្ថកិច្ចបង្ក្រាបបានជាក់ស្ដែងប៉ុណ្តោះ ក្នុងនោះ៥នាក់បានជាប់ឃុំបណ្ដោះអាសន្ន និង៦នាក់ត្រូវបានដោះលែង។
គេមិនបានដឹងថា ក្នុងចំណោមជនទាំង៥នាក់ដែលបានជាប់ឃុំនោះ តើមានថៅកែឈើធំៗដែលគេធ្លាប់ឮឈ្មោះបោះសំលេងថា ជាថៅកែឈើ និងកាងឈើដុះស្លែឈ្មោះយុល សុផល ហៅផល កញ្ចែ ដែលជាមន្ដ្រីយោធាមានទេពកោសល្យទាំងកាងឈើ និងបាញ់បោះសេរីនោះដែរឬក៏អត់ទេ ។ កន្លងមកគេដឹងថា ជនម្នាក់នេះជាអ្នកកាងឈើក្នុងតំបន់នេះ និងមានការសង្ស័យថា អាចត្រូវរ៉ូវគ្នាជាមួយនាយកដែនជំរកសត្វស្នួលឈ្មោះតូច សុភី ដែលបច្ចុប្បន្ននាយកដែនជំរកស្នួលនេះ ប្រហែលជាគេចខ្លួនដោយសារតែមានការពាក់ព័ន្ធនឹងបទល្មើសឈើអនាធិបតេយ្យ និងល្មើសច្បាប់ក្នុងដែនសមត្ថកិច្ចរបស់ខ្លួន។
ចំណែកនគរបាលការពារព្រំដែនចំណុចដេ១ ដេ២ និងដេ៦ បានច្រានចោលចំពោះព័ត៌មានដែលថា មានរថយន្ដដឹកឈើជាច្រើនគ្រឿងធំៗ បានឆ្លងកាត់តាមចំណុចនេះទៅកាន់ប្រទេសវៀតណាម កាលពីយប់ថ្ងៃទី២២ មករា កន្លងទៅ។ មន្ដ្រីនគរបាលការពារព្រំដែននៅចំណុចខាងលើ បានធ្វើការអះអាងប្រាប់កោះសន្ដិភាព ថា ក្រោយពីមានព័ត៌មានពីការធ្វើចរាចរណ៍ឈើអនាធិបតេយ្យនៅក្នុងព្រៃដែនជំរកសត្វស្នួលមក លោកឧត្ដមសេនីយ៍ត្រី ជួង ស៊ាងហាក់ ស្នងការនគរបាលខេត្ដ បានដាក់បទបញ្ជាយ៉ាងតឹងរ៉ឹងម៉ឺងម៉ាត់ដល់សមត្ថកិច្ចតាមគោលដៅព្រំដែនឱ្យចុះបង្ក្រាបទប់ស្កាត់ ប្រសិនបើមានរថយន្ដដឹកឈើឆ្លងកាត់តំបន់ទាំងនេះ។ មន្ដ្រីដដែលបានអះអាងថា រថយន្ដដឹកឈើទាំងនោះគឺមិនបានឆ្លងកាត់តំបន់ទាំងនេះទេ គឺប្រហែលជាបើកដឹកយកទៅលក់នៅក្នុងព្រៃចំណុចណាមួយច្រើនជាង៕
ចែករំលែកព័តមាននេះ