រាជធានីភ្នំពេញ ៖ ស្ត្រីម្នាក់ត្រូវគេប្រទេះឃើញស្លាប់ក្នុងបន្ទប់ទឹកដោយដាំក្បាលចូលក្នុងធុង ចំណែកក្នុងបន្ទប់រប៉ាត់រប៉ាយ និងមានចាក់សោរខាងក្រៅបន្ទប់ផង ហេតុការណ៍នេះបង្កភ្ញាក់ផ្អើលកាលពីម៉ោង១៩និង៣០នាទីព្រលប់ ថ្ងៃទី០៨ ខែមេសា ឆ្នាំ២០១៧ នៅក្នុងបន្ទប់ជួល០២E5 ជាន់ទី៥ ក្រុម១ ផ្លូវវ៉េងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
សមត្ថកិច្ចបានប្រាប់ថា សពខាងលើនេះឈ្មោះ លឿម ហៀក ភេទស្រី អាយុ៣៣ឆ្នាំ មុខរបរកម្មការនីរោងចក្រកាត់ដេរដាក់ក្វាន់ ស្នាក់នៅបន្ទប់ជួល០២E5 ជាន់ទី៥ ក្រុម១ ផ្លូវវ៉េងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតភូមិជីប៉ាង ឃុំផ្លូវមាស ស្រុករតនៈមណ្ឌល ខេត្តបាត់ដំបង។
តាមសម្ដីស្ត្រីឈ្មោះ លី សារ៉ាយ អាយុ៣១ឆ្នាំ មុខរបរកម្មការនីរោងចក្រ ហើយត្រូវជាមិត្តភក្តិនារីរងគ្រោះបានប្រាប់សមត្ថកិច្ចថា កាលពីវេលាម៉ោង៦និង១៥នាទីព្រឹក ថ្ងៃទី៨ មេសា មុនកើតហេតុគាត់បានទូរស័ព្ទមកមិត្តភក្តិដែលស្លាប់ (សព) ដោយបបួលទៅធ្វើការ ។ ពេលនោះនាងបានប្រាប់វិញថា ទៅមុនទៅ ជាប់ហូបបាយសិន។ គាត់បានប្រាប់ទៀតថា លុះម៉ោងប្រហែល០៨ព្រឹក ប្រធានក្រុមបានបាត់ស្ត្រីខាងលើ មិនឃើញទៅធ្វើការក៏នាំគ្នាមកមើលដល់បន្ទប់ជួល ប៉ុន្តែពេលមកដល់ឃើញទ្វារបន្ទប់ចាក់សោរ ក៏នាំគ្នាទៅវិញទៅ រីឯទូរស័ព្ទខលមិនចូលទេ។
ប្រភពដដែលបានប្រាប់ទៀតថា លុះដល់ល្ងាចថ្ងៃដដែល ក៏បាននាំគ្នាប្រហែល១០នាក់មករកម្តងទៀត ពេលមកដល់មុខបន្ទប់ជួលឃើញចាក់សោរដដែល ទើបសុំឱ្យម្ចាស់ផ្ទះធ្វើការកាត់សោរ ដើម្បីចូលមើលក្នុងបន្ទប់ ក្រែងមានអ្វីអាចទំនាក់ទំនងទៅស្ត្រីខាងលើបាន ប៉ុន្តែពេលកាត់សោររួចក៏ចូលទៅមើល ស្រាប់តែឃើញនាងស្លាប់ក្នុងបន្ទប់ទឹកដាំក្បាលចូលក្នុងធុងបាត់ទៅហើយ ទើបបង្កភ្ញាក់ផ្អើល ហើយម្ចាស់ផ្ទះបានរាយការណ៍ជូនសមត្ថកិច្ចតែម្តង។
តាមសម្ដីម្ចាស់ផ្ទះជួលឈ្មោះ គីង សុគន្ធរិទ្ធិ អាយុ៤៥ឆ្នាំ បានប្រាប់សមត្ថកិច្ចថា កាលពីម៉ោងប្រហែល១៨និង៣០នាទីព្រលប់ ថ្ងៃទី០៨ មេសា មុនកើតហេតុខណៈដែលគាត់កំពុងអង្គុយលេងកន្លែងលក់ដូរខាងក្រោម ស្រាប់តែមានកម្មការនីជាង១០នាក់បានមកសុំគាត់ឱ្យកាត់សោរបន្ទប់ជួលខាងលើ ដោយសំអាងថា បាត់ខ្លួនមិត្តភក្តិមួយថ្ងៃ ហើយទូរស័ព្ទក៏មិនចូលទៀត ទើបសុំឱ្យកាត់សោរក្រែងអាចរកឃើញវត្ថុតាងអ្វីទំនាក់ទំនងបាន ខណៈដែលគាត់កាត់សោរ ហើយមានស្រីៗ៤ទៅ៥នាក់បានចូលទៅមើលក្នុងបន្ទប់ពេ លនោះគាត់ឈរនៅខាងក្រៅបន្ទប់ ស្រាប់តែស្រីទាំងនោះប្រាប់ថា ឃើញនាងស្លាប់ក្នុងបន្ទន់ទឹក ទើបបង្កភ្ញាក់ផ្អើលឡើង ហើយគាត់ក៏ប្តឹងទៅសមត្ថកិច្ចមូលដ្ឋានចុះមកពិនិត្យ។
ក្នុងករណីខាងលើនេះ ក្រោយពីកើតហេតុសមត្ថកិច្ចជំនាញរបស់ការិយាល័យនគរបាលបច្ចេកទេស និងវិជ្ជសាស្ត្ររាជធានីភ្នំពេញ ចុះមកពិនិត្យសាកសពខាងលើ និងបញ្ជាក់ថា នារីរងគ្រោះត្រូវបានជនសង្ស័យមិនស្គាល់មុខវាយបែកច្រមុះ រួចរុញជ្រមុះក្នុងធុងទឹក ចំណែកដៃឃើញមានខ្សែនីឡុងពណ៌ខ្មៅចងជាប់ក.ដៃខាងឆ្វេងផង ក្រោយពីពិនិត្យរួចបានប្រគល់សពឱ្យសាច់ញាតិយកទៅធ្វើបុណ្យតាមប្រពៃណី៕
ចែករំលែកព័តមាននេះ