វាសនាអ្នកប៊ូឌិញ ម្ចាស់ផ្ទះប្រកែកដាច់អហង្ការលើតម្លៃកំណត់ថោកជាងទីផ្សារ
រាជធានីភ្នំពេញ ៖ លទ្ធផលនៃកិច្ចប្រជុំពិភាក្សាអំពីការអភិវឌ្ឍអគារប៊ូឌីញនៅក្រសួងរៀបចំដែនដី នគរូបនីយកម្ម និងសំណង់នាព្រឹកថ្ងៃទី៧ មេសា
រាជធានីភ្នំពេញ ៖ លទ្ធផលនៃកិច្ចប្រជុំពិភាក្សាអំពីការអភិវឌ្ឍអគារប៊ូឌីញនៅក្រសួងរៀបចំដែនដី នគរូបនីយកម្ម និងសំណង់នាព្រឹកថ្ងៃទី៧ មេសា
រាជធានីភ្នំពេញ ៖ លទ្ធផលនៃកិច្ចប្រជុំពិភាក្សាអំពីការអភិវឌ្ឍអគារប៊ូឌីញនៅក្រសួងរៀបចំដែនដី នគរូបនីយកម្ម និងសំណង់នាព្រឹកថ្ងៃទី៧ មេសា មិនបានទទួលផ្លែផ្កានោះទេ គឺអ្នករស់នៅក្នុងអគារប៊ូឌីញប្រមាណជិត៥០០គ្រួសារ បាននាំគ្នាបដិសេធមិនទទួលយកដំណោះស្រាយដែលលោក ជា សុផារ៉ា ទេសរដ្ឋមន្ដ្រី រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ក្នុងការអភិវឌ្ឍលំនៅឋានរបស់ពួកគាត់ ដោយសារផ្ដល់តម្លៃផ្ទះថោកជាងទីផ្សារ ពួកគាត់មិនអាចទទួលយកលុយទៅទិញផ្ទះរស់នៅបានទេ ។
នៅក្នុងអង្គប្រជុំខាងលើនេះលោកទេសរដ្ឋមន្ដ្រី ជា សុផារ៉ា បានលើកឡើងថា បើបងប្អូនរង់ចាំទទួលយកគម្រោងអភិវឌ្ឍនៅនឹងកន្លែងនាថ្ងៃអនាគតរយៈពេល៤ឆ្នាំក្រោយ បងប្អូនអាចយកបន្ទប់នៃចំណែកផ្ទះបងប្អូនជួលក្នុងមួយខែបានតម្លៃចាប់ពី១៥០០ទៅ២០០០ដុល្លារ តែបើបងប្អូនសម្រេចចិត្ដលក់ផ្ទះវិញ គឺក្រុមហ៊ុនវិនិយោគរបស់ជប៉ុនគេហ៊ានទិញដីតំបន់ប៊ូឌីញដែលមានទំហំផ្ទះចាប់ពី៤០ម៉ែត្រការ៉េឡើងក្នុងតម្លៃ១ម៉ែត្រការ៉េស្មើនឹង១.២៦៣ដុល្លារ ។ ចំពោះទឹកប្រាក់នេះម្ចាស់ផ្ទះក្នុងអគារប៊ូឌីញទាំងអស់បានប្រកែកដាច់អហង្ការតែម្ដង ដោយសារតម្លៃនេះទាបជាងទីផ្សារ ។
ជាមួយនឹងការបដិសេធរបស់ប្រជាពលរដ្ឋទាំងនោះ លោកទេសរដ្ឋមន្ត្រី បានបង្ហើបថា លោកអាចចរចាជាមួយភាគីអ្នកទិញក្នុងតម្លៃចន្លោះពី១៣០០ទៅ១៣៥០ដុល្លារក្នុង១ម៉ែត្រការ៉េនៃទំហំផ្ទះនីមួយៗ ។ ឆ្លើយឆ្លងគ្នាក្នុងអង្គប្រជុំនោះ ប្រជាពលរដ្ឋប្រមាណ២ទៅ៣គ្រួសារបានសំណូមពរសុំតម្លៃ២២០០ដុល្លារក្នុង១ម៉ែត្រការ៉េ ។ ដោយឡែកអ្នកផ្សេងទៀតស្ទើរតែទាំងស្រុងបានខ្សឹបខ្សាវតៗគ្នាថា មិនលក់ទេតម្លៃខាងលើនេះគឺលក់ក្នុងតម្លៃយ៉ាងទាបបំផុត១ម៉ែត្រការ៉េ៥០០០ដុល្លារនៃទំហំផ្ទះជាក់ស្ដែង បើក្រុមហ៊ុនវិនិយោគទិញបានក៏ទិញទៅ តែបើទិញមិនបានទេក៏ហីទៅចុះ ។
ដោយឡែកអ្នកមានផ្ទះនៅជាន់ផ្ទាល់ដីវិញរឹតតែលែងលក់ថែមទៀតចំពោះតម្លៃនេះដោយចាត់ទុកថា អង្គប្រជុំហាក់បីដូចជាមានចេតនាមើលងាយប្រជាពលរដ្ឋអ្នករស់នៅអគារប៊ូឌីញដែលអ្នកខ្លះទិញផ្ទះរស់នៅក្នុងតំបន់ប៊ូឌីញតាំងពី២០ឬ៣០ឆ្នាំមកម្ល៉េះ ។ ពួកគាត់និយាយថា បើសិនជាពួកគាត់ទិញផ្ទះរស់នៅក្នុងរាជធានីភ្នំពេញដែលមានទីតាំងនៅក្បែរអគារប៊ូឌីញនេះដែរ គឺផ្ទៃក្រឡាផ្ទះគិតជាម៉ែត្រការ៉េ១ម៉ែត្រមិនក្រោមមួយម៉ឺនដុល្លារទេ ហើយតម្លៃនេះក៏គ្មានអ្នកលក់ដែរនៅជុំវិញអគារប៊ូឌិញនេះ ។
បញ្ហាមួយទៀតអ្នករស់នៅជាន់ផ្ទាល់ដី មន្ដ្រីជំនាញបានគិតផ្ទៃក្រឡាជាម៉ែត្រការ៉េជូនគ្រួសារខ្លះ គឺគិតទាំងសំយាបមុខផ្ទះដែលពលរដ្ឋកាន់កាប់រាប់ឆ្នាំមកហើយ ។ រីឯអ្នកខ្លះទៀតមន្ដ្រីជំនាញមិនគិតបញ្ចូលសំយាបផ្ទះទៅក្នុងផ្ទៃក្រឡាផ្ទះនោះទេ ។
នៅថ្ងៃបិទប្រកាសលទ្ធផលនៃការប្រកាសទទួលស្គាល់ទិន្នន័យទំហំផ្ទះនីមួយៗរយៈពេល១៥ថ្ងៃ កាលពីខែមករា ឆ្នាំ២០១៧កន្លងមកប្រជាពលរដ្ឋបានធ្វើការតវ៉ាអំពីរឿងបញ្ចូលផ្ទៃក្រឡាសំយាបមុខផ្ទះទៅក្នុងសាច់ផ្ទះតែត្រូវបានមន្ដ្រីជំនាញបញ្ជាក់ថា មិនគិតម៉ែត្រការ៉េផ្ទៃដីសំយាបឱ្យទេ ។ ប៉ុន្ដែបែរជាអ្នកខ្លះត្រូវបានមន្ដ្រីគិតបញ្ចូលផ្ទៃក្រឡាសំយាបផ្ទះចូលទៅក្នុងផ្ទៃក្រឡាផ្ទះជាក់ស្ដែងដែរ ។ បញ្ហានេះប្រជាពលរដ្ឋស្នើសុំលោកទេសរដ្ឋមន្ដ្រី ជា សុផារ៉ា មេត្ដាទទួលស្គាល់ការគ្រប់គ្រងកាន់កាប់ប្រើប្រាស់អាស្រ័យផលជាក់ស្ដែងរបស់បងប្អូនប្រជាពលរដ្ឋឲ្យស្មើភាពគ្នាស្របតាមអនុសាសន៍ដ៏ខ្ពង់ខ្ពស់របស់សម្ដេចតេជោ ហ៊ុន សែន ប្រកាសនៅក្នុងខួបថ្ងៃ៧មករា ឆ្នាំ២០១៧កន្លងមកថ្មីៗនេះដោយទទួលស្គាល់សិទ្ធិរស់នៅកាន់កាប់ជាក់ស្ដែងរបស់បងប្អូនប្រជាពលរដ្ឋលើដីរដ្ឋ ។
ជុំវិញបាតុភាពខាងលើនេះលោក ប៉េង ហុងសុជាតិខេមរ៉ូ ប្រធាននាយកដ្ឋានអភិវឌ្ឍលំនៅឋានក្រសួងរៀបចំដែនដីនគរូបនីយកម្មនិងសំណង់ បានប្រាប់កោះសន្ដិភាពចុងមាត់ចុងកថា ពេលគេបិទផ្សាយម៉េចក៏មិនតវ៉ា? ឆ្លើយបានមួយម៉ាត់ពីរម៉ាត់លោកក៏បិទទូរស័ព្ទទៅវិញយ៉ាងអសីលធម៌ ។
សូមបញ្ជាក់ថា ផ្ទៃក្រឡាដីនៃអគារប៊ូឌីញទាំងមូលមានទំហំ៦៥៣១,៦៧ម៉ែត្រការ៉េ បើគិតតម្លៃទិញពីផ្ទៃក្រឡាតាមផ្ទះនីមួយៗពីជាន់ផ្ទាល់ដីដល់ជាន់ទី៣ គឺក្រុមហ៊ុនចំណាយលុយជិត២២លានដុល្លារ ដែលអគារដ៏ចំណាស់នេះត្រូវបានសាងសង់ឡើងក្នុងទស្សវត្ស៦០ ។
ដោយសារលទ្ធផលអង្គប្រជុំមិនរលូនល្អ លោកទេសរដ្ឋមន្ដ្រី ជា សុផារ៉ា បានប្រកាសលើកពេលទៅថ្ងៃក្រោយ ហើយក៏បិទអង្គប្រជុំនៅវេលាម៉ោង១០និង៣០នាទីព្រឹក ៕
ចែករំលែកព័តមាននេះ