ក្នុងការប្រកបជំនួញនានា មិនត្រឹមតែត្រូវដំណើរការជំនួញនោះទៅតាមផែនការ ឲ្យក្លាយជាការពិតនោះទេ ប៉ុន្តែទីតាំងរបស់ហាង និងស្នាក់ការ ក៏ជារឿងមួយគួរផ្តល់ភាពសំខាន់ផងដែរ ។ មនុស្សភាគច្រើនភ្លេចថា ទីតាំងល្អ ពិតជាពាក់ព័ន្ធដល់ការប្រកបជំនួញ ហើយហេតុអ្វីបានជាមុខជំនួញទាំងនេះត្រូវបំបែកទីតាំង? ហេតុអ្វីនិយាយថា ទីតាំងល្អពាក់ព័ន្ធនឹងការប្រកបជំនួញ ?
នេះជាការលើកឡើងពីទិដ្ឋភាពជាក់ស្តែង ដូចជា ភាពជឿជាក់របស់ក្រុមហ៊ុនទាំងនោះ និងទីតាំងក្រុមហ៊ុនដែលអាចធ្វើដំណើរបានយ៉ាងស្រួល អតិថិជនអាចទៅរកដោយងាយ ។
យើងធ្លាប់ឃើញក្រុមហ៊ុនធំៗបំបែកសាខាទៅកន្លែងជាច្រើន ផ្នែកទីតាំងរង់ចាំទទួលអតិថិជនគ្រប់ពេលវេលា ឬរង់ចាំទទួល-ផ្ញើឯកសារ គឺតែងមានទីតាំងស្ថិតនៅកន្លែងធ្វើដំណើរងាយស្រួល នៅអគារដែលគេស្គាល់ ប៉ុន្តែបើសិនមិនចាំបាច់ត្រូវជួបអតិថិជន ឬទាក់ទងជួបជាមួយអ្នកដទៃទេ ក៏អាចនឹងផ្លាស់ទៅកន្លែងផ្សេង ដែលមានថ្លៃជួលថោកជាងជាដើម។ ទាំងនេះសម្រាប់ភាពងាយស្រួលទាក់ទងជាមួយអតិថិជន ។ បើទីតាំងក្រុមហ៊ុនរបស់យើងពិបាកស្វែងរក ពិបាកធ្វើដំណើរ គ្មានរថយន្តចូលទៅដល់ ក៏គង់នឹងគ្មានអតិថិជនណាចង់មកទាក់ទងឡើយ ។
ក្រៅពីនេះ បើនិយាយពីទីតាំងរបស់ក្រុមហ៊ុន យើងតែងនឹកដល់មនុស្សម្នាចរាចរទៅមកថា ពួកគេឆ្លងកាត់ក្រុមហ៊ុនយើងច្រើនតិចប៉ុនណា។ ឧទាហរណ៍ ការជួលហាងលក់ទំនិញនៅផ្សារណាត់ គឺហាងនីមួយៗមានតម្លៃជួលមិនដូចគ្នា ខណៈហាងនៅជួរមុខថ្លៃជាងហាងនៅជួរក្រោយ ឬហាងនៅកាច់ជ្រុងថ្លៃជាងនៅកណ្តាលជាដើម ។
* ទីតាំងដែលល្អសម្រាប់មុខជំនួញ ៖
មុខជំនួញនីមួយៗនឹងជ្រើសរើសទីតាំងមិនដូចគ្នា ហើយជំនួញទាំងនោះកំណត់ពាក្យថា «ទីតាំងល្អ» ខុសៗគ្នា ដែលវាស្ថិតនៅត្រង់ថា តើអតិថិជនរបស់យើងជាអ្នកណា ។ ហេតុនេះ មុននឹងជ្រើសរើសទីតាំង ចូរសាកល្បងបង្កើតសំណួរដូចខាងក្រោមនេះ ៖
-អតិថិជនទៅរកហាងរបស់យើងងាយស្រួលឬទេ ?
-មានកន្លែងចតយានយន្តសម្រាប់អតិថិជនគ្រប់គ្រាន់ឬទេ ?
-ពិបាកស្វែងរកឬទេ ?
សំណួរងាយៗខាងដើមនេះ ក៏គ្រប់គ្រាន់ហើយសម្រាប់ឲ្យយើងគិតចេញថា នឹងត្រូវមានទីតាំងនៅត្រង់ណាល្អ ។ រឿងមួយទៀតដែលគេតែងមើលរំលង គឺស្វែងរកទីតាំងនៅជិតគូប្រជែង ឬជាកន្លែងប្រមូលផ្តុំទំនិញច្រើនបំផុត ។ កុំសម្លឹងថា ការដែលយើងទៅនៅជិតគូប្រជែង នឹងកាន់តែធ្វើឲ្យយើងពិបាកលក់ឡើង ប៉ុុន្តែការពិត ចំពោះមុខទំនិញប្រភេទដូចគ្នា នៅជាមួយគ្នាច្រើនប៉ុនណា នឹងកាន់តែជួយទាក់ទាញអតិថិជនមកកាន់តែច្រើនដែរ ។
ឧទាហរណ៍ បើអ្នកត្រូវការទិញកុំព្យូទ័រ១គ្រឿង ពិតណាស់ថា កន្លែងនឹកដល់ដំបូង គឺ Panipip Pratunam (ថៃ) ព្រោះជាចំណុចរួមនៃបច្ចេកវិទ្យាធំបំផុត ឬបើសិនជាស្រីៗត្រូវការទិញអីវ៉ាន់ សម្លៀកបំពាក់ កន្លែងនឹកដល់ដំបូងគឺ Platinum, Union mall (ថៃ) ព្រោះមានទំនិញឲ្យជ្រើសរើសច្រើន ។ ដូច្នេះ កុំគិតថា ការចូលទៅជិតគូប្រជែងហើយ នឹងធ្វើឲ្យយើងលក់មិនដាច់ ប៉ុន្តែការយកផលិតផលមកលក់រួមគ្នា នឹងកាន់តែជួយទាក់ទាញអតិថិជនច្រើនថែមទៀត ៕
ចែករំលែកព័តមាននេះ