រយៈពេល2ខែដើមឆ្នាំ កម្ពុជានាំចេញកៅស៊ូកើនឡើង13ភាគរយ
រាជធានីភ្នំពេញ ៖ មន្ត្រីជាន់ខ្ពស់អគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្នុងរយៈពេល២ខែដើមឆ្នាំនេះ កម្ពុជាបាននាំចេញកៅស៊ូជាង
រាជធានីភ្នំពេញ ៖ មន្ត្រីជាន់ខ្ពស់អគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្នុងរយៈពេល២ខែដើមឆ្នាំនេះ កម្ពុជាបាននាំចេញកៅស៊ូជាង២ម៉ឺនតោន កើនឡើង១៣ភាគរយ បើធៀបនឹងរយៈពេលដូចគ្នាកាលពីឆ្នាំមុន ។
លោក ប៉ុល សុផា ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទ បានថ្លែងឲ្យដឹងនាព្រឹកថ្ងៃទី៦ មេសា ម្សិលមិញថា ការនាំចេញកៅស៊ូរបស់កម្ពុជាទៅទីផ្សារអន្តរជាតិ បើគិតត្រឹម២ខែដើមឆ្នាំនេះ បានចំនួនជាង២ម៉ឺនតោន។ រីឯតម្លៃកាលពីខែកុម្ភៈកន្លងមកនេះ បានធ្លាក់ចុះពី២.៣៥០ដុល្លារក្នុង១តោន មកនៅត្រឹម២.០០០ដុល្លារក្នុង១តោនវិញ ។
លោកបន្តថា ស្ថានភាពទីផ្សារកៅស៊ូចុងក្រោយនេះនៅតែមានភាពល្អប្រសើរ ហើយរំពឹងថា នឹងមានស្ថិរភាពវិញទាំងការផលិតក្នុងស្រុក ដែលបញ្ហានេះពឹងផ្អែកទាំងស្រុងលើគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ដែលអាចទាក់ទាញអ្នកវិនិយោគមកបន្ថែម ។
លោកថ្លែងថា ៖« កម្ពុជាមានវត្ថុធាតុដើមគ្រប់គ្រាន់សម្រាប់ការកែច្នៃ ប៉ុន្តែបញ្ហាបង្កើតរោងចក្រថ្មីត្រូវចាយទុនច្រើន ព្រោះផ្សារកម្ពុជាតូច ដូច្នេះមិនសូវមានការចាប់អារម្មណ៍ខ្លាំងពីអ្នកវិនិយោគក្រៅប្រទេសនោះទេ » ។
ប្រធានសមាគមកៅស៊ូគ្រួសារតំបែរ ស្រុកតំបែរ ខេត្តត្បូងឃ្មុំ លោកជា សាវន បានលើកឡើងថា បច្ចុប្បន្ននេះតម្លៃកៅស៊ូធ្លាក់ចុះបន្តិច ប៉ុន្តែសមាគមនៅតែជំរុញកសិករថែទាំកៅស៊ូឲ្យបានល្អ ហើយនៅឆ្នាំ២០១៨ខាងមុខត្រៀមរៀបចំសហគមន៍ ដោយស្នើថវិកាបដិភាគពីរាជរដ្ឋាភិបាល ដើម្បីឲ្យកសិករកែច្នៃជ័រសន្លឹកដែលទីផ្សារក្រៅប្រទេសកំពុងមានតម្រូវការ ។
លោកបន្តទៀតថា៖ « កៅស៊ូដែលកសិករផលិតបានហើយ ពឹងផ្នែកលើឈ្មួញតូចៗប្រមូលទិញលក់ទៅប្រទេសវៀតណាម ហើយបើសិនជាមានការទាក់ទាញអ្នកវិនិយោគបង្កើតរោងចក្រកែច្នៃរឹតតែល្អប្រសើរ សម្រាប់ប្រជាកសិករ » ។
បច្ចុប្បន្ននេះ មានក្រុមហ៊ុនចំនួន១៣២ ដែលប្រកបអាជីវកម្មកៅស៊ូនៅកម្ពុជា ហើយចំនួននេះមិនមានការកើនឡើងបន្ថែមទៀតនោះទេ ដោយសារកន្លងមក រាជរដ្ឋាភិបាលបានបញ្ឈប់ការផ្តល់ដីសម្បទានដល់ក្រុមហ៊ុនវិនិយោគ ៕
ចែករំលែកព័តមាននេះ