អ្នកប្រើប្រាស់ស៊ីមកាតទូរស័ព្ទលើសចំនួនពលរដ្ឋសរុបទូទាំងប្រទេស
រាជធានីភ្នំពេញ ៖ រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានអះអាងនាពេលថ្មីៗនេះថា អ្នកប្រើប្រាស់អីុនធើរណេតមានជាងពាក់កណ្តាលនៃចំនួនប្រជាពលរដ្ឋ ប៉ុន្តែអ្នក
រាជធានីភ្នំពេញ ៖ រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានអះអាងនាពេលថ្មីៗនេះថា អ្នកប្រើប្រាស់អីុនធើរណេតមានជាងពាក់កណ្តាលនៃចំនួនប្រជាពលរដ្ឋ ប៉ុន្តែអ្នកប្រើប្រាស់ស៊ីមកាតទូរស័ព្ទបានកើនលើសចំនួនប្រជាពលរដ្ឋសរុបទូទាំងប្រទេសសព្វថ្ងៃ ។
លោក ត្រាំ អីុវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ មានប្រសាសន៍ថា ៖ «សព្វថ្ងៃនេះ អ្នកប្រើប្រាស់អីុនធើរណេតមានជិត៨លាននាក់ ហើយអ្នកប្រើទូរស័ព្ទមានស៊ីមកាត មានរហូតដល់១៩,៦លានស៊ីមកាត ដែលលើសពីចំនួនប្រជាពលរដ្ឋសរុបនៅទូទាំងប្រទេស » ។
ទន្ទឹមនឹងការកើនឡើងនៃចំនួនទូរស័ព្ទ និងអីុនធើរណេតនេះ លោករដ្ឋមន្ត្រីក្រសួងប្រៃសណីយ៍បញ្ជាក់ថា ៖ « យើងលើកទិសដៅថា រហូតដល់ឆ្នាំ២០២០ មានអ្នកប្រើប្រាស់ទូរស័ព្ទឱ្យបាន១០០%, អីុនធើរណេតល្បឿនលឿននៅតាមទីប្រជុំជន១០០% ហើយនៅជនបទ៨០% ស្របតាមគោលនយោបាយថា ក្នុង១ឆ្នាំៗនឹងមានអ្នកប្រើប្រាស់អីុនធើរណេតកើនឡើង១លាននាក់ ខណៈមានខ្សែកាប្លិ៍បាតសមុទ្រមកដល់កម្ពុជា ដែលអាចលក់សេវាបានច្រើន អ្នកទិញច្រើន ហើយល្បឿនលឿនជាងមុន » ។
លោករដ្ឋមន្ត្រីលើកឡើងថា សព្វថ្ងៃនេះ ក្រុមហ៊ុនដែលបម្រើសេវាអីុនធើរណេតខ្នាតតូចៗមានប្រមាណ៣០ ហើយខ្នាតធំមាន៣ ។ ក្រុមហ៊ុនខ្នាតតូចទាំង៣០នេះ ផ្តល់សេវាអីុនធើរណេតសម្រាប់អ្នកប្រើប្រាស់ធម្មតាមានតម្លៃថោក ប៉ុន្តែសម្រាប់ការធ្វើអាជីវកម្ម គឺមានក្រុមហ៊ុនផ្សេងទៀតផ្តល់សេវាក្នុងតម្លៃថ្លៃ បើធៀបនឹងបណ្តាប្រទេសជិតខាងកម្ពុជា ។
លោករដ្ឋមន្ត្រីក្រសួងប្រៃសណីយ៍ឲ្យដឹងទៀតថា នៅថ្ងៃខាងមុខនេះ ទូរគមនាគមន៍នឹងតខ្សែកាប្លិ៍ទៅតាមផ្ទះ ដោយដាក់ឧបករណ៍រ៉យទ័រមួយប្រើ Wifi ហើយនឹងមានតម្រូវការច្រើនផងដែរ ។ បើនិយាយពីឧបករណ៍តភ្ជាប់ទៅតាមផ្ទះ នៅកម្ពុជាមានតែ២,៥%ប៉ុណ្ណោះ ខណៈនៅប្រទេសផ្សេងមានភាគរយច្រើន ។ ដូចនេះ ការប្រើប្រាស់អីុនធើរណេតនាពេលខាងមុខនឹងមានច្រើនថែមទៀត ស្របពេលកម្ពុជាមានខ្សែកាប្លិ៍អុបទិកក្រោមបាតសមុទ្រមកដល់ វានឹងផុសចេញនូវការរីកចម្រើនលើផ្នែកបច្ចេកវិទ្យា។
កាលពីឆ្នាំមុន អត្រានៃការលក់ស៊ីមកាតទូរស័ព្ទចល័តមានប្រមាណ១៩លាន៥សែន ស្មើ១៣០%។ ចំណែកអ្នកជាវសេវាអីុនធើរណេតមានប្រមាណ៧លាន ស្មើនឹងប្រមាណ៤៥%នៃចំនួនប្រជាពលរដ្ឋសរុប ។ នេះបើតាមប្រសាសន៍លោករដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានថ្លែងក្នុងពិធីប្រកាសឲ្យប្រើកម្មវិធីផ្ដល់ព័ត៌មានសេវាសាធារណៈតាមរយៈទូរស័ព្ទស្មាតហ្វូន កាលពីចុងឆ្នាំ២០១៦ ៕
ចែករំលែកព័តមាននេះ