បែកធ្លាយឈ្មួញវៀតណាមអង្វរឈ្មួញខ្មែរបង្កើនការនាំចូលជ្រូក
រាជធានីភ្នំពេញ ៖ ក្នុងរយៈពេលខ្លីនេះ បណ្ដាសារព័ត៌មានជាតិ និងអន្តរជាតិបានចុះផ្សាយពីការផ្ទុះជំងឺម្យ៉ាងលើសត្វជ្រូកនៅប្រទេសវៀតណាម ហើយបណ្ដា
រាជធានីភ្នំពេញ ៖ ក្នុងរយៈពេលខ្លីនេះ បណ្ដាសារព័ត៌មានជាតិ និងអន្តរជាតិបានចុះផ្សាយពីការផ្ទុះជំងឺម្យ៉ាងលើសត្វជ្រូកនៅប្រទេសវៀតណាម ហើយបណ្ដាប្រទេសជាប់ព្រំដែន បានបិទការនាំចូលផងដែរ ប៉ុន្តែកម្ពុជាវិញនៅតែបន្តនាំចូល ខណៈមន្ត្រីត្រួតពិនិត្យថា ជ្រូកទាំងនោះគ្មានជំងឺទេ ។
លោក លី ឡាវីល អ្នកគ្រប់គ្រងកសិដ្ឋានចិញ្ចឹមជ្រូកក្រុមហ៊ុន ម៉ុង ឫទ្ធី ឲ្យដឹងថា បន្ទាប់ពីមានការចុះផ្សាយថា នៅវៀតណាមមានផ្ទុះជំងឺម្យ៉ាងទៅលើសត្វជ្រូក ដែលអាចប៉ះពាល់ដល់អ្នកបរិភោគនោះ ប្រទេសមួយចំនួនបានបិទការនាំចូលជ្រូកពីវៀតណាមហើយ ។ ចំណែកកម្ពុជានៅតែបន្ដនាំចូលដដែល ហើយនាំចូលកាន់តែច្រើនជាងមុនទៅទៀត ខណៈការនាំចូលនោះបានត្រួតពិនិត្យមួយចំនួន និងមួយចំនួនទៀតនៅចន្លោះប្រហោង ហើយក៏មិនដឹងថា ជ្រូកទាំងនោះមានជំងឺ ឬអត់ទេ ។
លោកនិយាយថា ៖ « ខ្ញុំបានដឹងពីឈ្មួញខ្មែរថា សព្វថ្ងៃនេះ ឈ្មួញវៀតណាមបានអង្វរឲ្យឈ្មួញខ្មែរជួយនាំចូលជ្រូកឲ្យបានច្រើន ព្រោះជ្រូកនៅវៀតណាមសល់គរច្រើន គ្មានការនាំចេញទៅណាទេ បើខ្មែរមិននាំចូលទេ មានតែបោះចោល ។ ទោះជាយ៉ាងណា ដោយសារតែជ្រូកវៀតណាមចុះថោកខ្លាំងបន្ទាប់ពីផ្ទុះជំងឺ បានធ្វើឲ្យឈ្មួញខ្មែរមួយចំនួនសប្បាយដៃ និងជាឱកាសរកប្រាក់ចំណេញ ទើបនៅតែមានការនាំចូលទាំងលួចលាក់ និងតាមច្បាប់ » ។
លោកបន្តថា បើទោះជាមានការត្រួតពិនិត្យត្រឹមត្រូវហើយក្តី ក៏មិនដឹងលទ្ធផលភ្លាមៗដែរថា ជ្រូកនោះមានជំងឺ ព្រោះតាមធម្មតា ការត្រួតពិនិត្យត្រូវការរយៈពេលពី២ទៅ៣ថ្ងៃទើបដឹង ។ ដូច្នេះ នៅអំឡុងពេលនោះ សត្វជ្រូកនោះត្រូវគេកាប់ ហើយហូបអស់បាត់ទៅហើយ បើមានជំងឺ ក៏វាឆ្លងចូលក្នុងខ្លួនអ្នកហូបរួចហើយដែរ។
លោកបន្តថា ៖ « ដោយសារតែការនាំចូលមកស្រួលពេក និងតម្លៃថោក បានធ្វើឲ្យជ្រូកក្នុងស្រុកដែលខំផលិតអស់ថ្លៃដើមច្រើន ក៏ត្រូវធ្លាក់ថ្លៃដូចជ្រូកនាំចូលដែរ ។ ពេលនេះ គ្មានការរអ៊ូរទាំពីអ្នកចិញ្ចឹមលក្ខណៈគ្រួសារទេ ព្រោះតែពួកគាត់បោះបង់ការចិញ្ចឹមហើយ ។ ដូចនេះ ទោះបីជាជ្រូកធ្លាក់ថ្លៃកម្រិតណា ក៏ពួកគាត់មិនខ្វល់ដែរ គឺរង់ចាំទិញជ្រូកពីក្រៅមកស្រាប់ » ។
លោកបន្ថែមថា ការចិញ្ចឹមជ្រូកសម្រាប់ផ្គត់ផ្គង់ វាមិនពិបាកទេ បើសិនជាតម្លៃសមស្របនឹងការចំណាយថ្លៃដើម ព្រោះជ្រូកកូនម្ដងៗមិនមែន១ក្បាលដូចគោទេ វាកូនម្ដងជាង១០ក្បាលឯណោះ ។ សព្វថ្ងៃនេះ គ្រាន់តែការចំណាយថ្លៃដើមចិញ្ចឹមជ្រូកអស់៨ពាន់រៀលទៅហើយក្នុង១គីឡូក្រាម ប៉ុន្តែលក់វិញបានប្រមាណតែ៦ពាន់រៀលប៉ុណ្ណោះក្នុង១គីឡូក្រាម អីចឹងហើយ រឿងអីពលរដ្ឋនៅទ្រាំបន្តចិញ្ចឹមនាំឲ្យខាតបង់ទៀតនោះ ។ រាល់ថ្ងៃនេះ មានតែក្រុមហ៊ុនធំៗប៉ុណ្ណោះដែលនៅបន្តចិញ្ចឹមជ្រូកទៀត ដូចជាក្រុមហ៊ុនម៉ុង ឫទ្ធី និងក្រុមហ៊ុនស៊ីភី ជាដើម ។
លោកបន្ថែមទៀតថា បច្ចុប្បន្ន តម្រូវការជ្រូកក្នុងប្រទេសកម្ពុជាទាំងមូលមានប្រមាណពី៦ទៅ៧ពាន់ក្បាលក្នុង១ថ្ងៃ ក្នុងនោះគ្រាន់តែការនាំចូលពីក្រៅមានប្រមាណ៦០% ទៅ៧០%ទៅហើយ ។ ដូចនេះ ជ្រូកក្នុងស្រុកផ្គត់ផ្គង់បានប្រមាណតែ៤០%ប៉ុណ្ណោះ ។
លោក ឡាវីល បានសំណូមពរដល់រាជរដ្ឋាភិបាល និងឈ្មួញនានា សូមត្រួតពិនិត្យឲ្យហ្មត់ចត់មុននឹងនាំជ្រូកចូលមក ដើម្បីឲ្យខ្មែរមានជីវិតរស់បានយូរបន្តិច ។ បើមិនដូចនេះទេ ពលរដ្ឋខ្មែរនឹងមានអាយុកាន់តែខ្លី ដោយសារតែការហូបចុកជាក់ជាមិនខាន ។ ទោះជាយ៉ាងណា ក្នុងស្ថានភាពនេះ កម្ពុជាមិនអាចបិទការនាំចូលទាំងស្រុងទេ គ្រាន់តែចង់ឲ្យនាំចូលរបស់ល្អៗបន្តិច ។
លោក ស្រ៊ុន ពៅ ប្រធានសមាគមអ្នកចិញ្ចឹមជ្រូកកម្ពុជា បានឱ្យដឹងថា បើជ្រូកនាំចូលត្រឹមត្រូវ និងមានការត្រួតពិនិត្យពីមន្ត្រីជំនាញនោះ មិនមានកង្វល់ប៉ុន្មានទេ ខ្លាចតែជ្រូកដែលនាំចូលដោយខុសច្បាប់ពីសំណាក់ឈ្មួញខិលខូចមួយចំនួន ដែលនាំជំងឺផ្សេងៗមកចម្លងដល់ជ្រូកក្នុងស្រុក ជាពិសេសវាអាចនឹងឆ្លងមកមនុស្សទៀតផង ។
លោកបន្តថា ៖ « ខ្ញុំធ្លាប់សំណូមពរដល់រាជរដ្ឋាភិបាល និងក្រសួងពាក់ព័ន្ធជាលើកច្រើនសាហើយ តែមិនដឹងថាការសំណូមពររបស់ខ្ញុំតាមបណ្ដាញផ្សព្វផ្សាយនោះ អាចជ្រាបដល់ថ្នាក់ដឹកនាំដែរឬអត់នោះទេ ។ លោកថា ៖ « ពេលនេះពលរដ្ឋដែលចិញ្ចឹមជ្រូកលក្ខណៈគ្រួសារបានបោះបង់ចោលការចិញ្ចឹមហើយ ព្រោះតែពេលចិញ្ចឹមត្រូវចំណាយថ្លៃដើមច្រើន តែពេលដែលបានផល បែរជាច្រើនធ្លាក់ថ្លៃ និងមានតម្លៃទាបទៅវិញ » ។
រដ្ឋលេខាធិការក្រសួងពាណិជ្ជកម្ម លោក ម៉ៅ ថូរ៉ា បានឱ្យដឹងថា ដើម្បីឱ្យពលរដ្ឋងាកមកប្រើរបស់ដែលផលិតក្នុងស្រុក មិនថា សាច់ បន្លែ ផ្លែឈើ កម្ពុជាត្រូវការផ្សព្វផ្សាយឱ្យបានច្រើនពីសុវត្ថិភាព និងគុណភាពចំណីអាហារដែលបាននាំចូល ។
លោកសង្កត់ធ្ងន់ថា ៖ « កាំកុងត្រូលកម្ពុជាត្រូវខិតខំបន្ថែមទៀតដើម្បីត្រួតពិនិត្យពីទំនិញ ជាពិសេសចំណីអាហារ មុននឹងត្រូវអនុញ្ញាតឲ្យនាំចូល និងបន្តត្រួតពិនិត្យនៅតាមផ្សារនានាដើម្បីមើលទំនិញដែលដាក់គីមីខ្ពស់ហួសកម្រិត »៕
ចែករំលែកព័តមាននេះ