លោក ជឹង ធានសេង រស់នៅភ្នំពេញ ត្រូវជាប់ចោទរំលោ.ភយកដីជនជាតិព្នង២៥៥ហិកតា(វីដេអូ)
- មណ្ឌលគិរី
អ្នកភូមិជនជាតិដើមភាគតិចប្រមាណជិត១០០នាក់ បាននាំគ្នាប្រមូលផ្តុំមុខសាលាឃុំសែនមនោរម្យ ស្រុកអូររាំង ដោយពួកគាត់អះអាងថា
ខេត្តមណ្ឌលគិរី ៖ អ្នកភូមិជនជាតិដើមភាគតិចប្រមាណជិត១០០នាក់ បាននាំគ្នាប្រមូលផ្តុំមុខសាលាឃុំសែនមនោរម្យ ស្រុកអូររាំង ដោយពួកគាត់អះអាងថា បានរងគ្រោះដោយសារអ្នកមានអំណាច មានប្រាក់ម្នាក់ នៅឯរាជធានីភ្នំពេញ ទន្ទ្រានយកដីអាស្រ័យផលរបស់ពួកគាត់រាប់រយហិកតា នៅភូមិពូរាំង។
បើតាមស្ត្រីតំណាងអ្នកភូមិម្នាក់ បាននិយាយប្រាប់កោះសន្តិភាពនាព្រឹកថ្ងៃទី២៦ ខែតុលា ឆ្នាំ២០២២ នេះថា ប្រជាពលរដ្ឋជនជាតិដើមភាគតិចព្នងមួយភូមិ គឺភូមិពូរ៉ាង ជិតពីររយគ្រួសារ នាព្រឹកថ្ងៃទី២៦ ខែតុលានេះ បានលើកគ្នាធ្វើការតវ៉ានៅមុខសាលាឃុំសែនមនោរម្យ ព្រោះអាជ្ញាធរបានឃុបឃិតគ្នាលួចលក់ដីចំការរបស់ពួកគាត់ទំហំ២៥៥ហិកតា ទៅឲ្យឈ្មោះ ជឹង ធានសេង រស់នៅភ្នំពេញ។
អំឡុងផ្ទុះការតវ៉ានោះ បងប្អូនជនជាតិភាគតិចព្នង បានថ្លែងថា អាជ្ញាធរបានលួចលក់ដីចំការរបស់ពួកខ្ញុំ ។ កន្លងទៅ គេបានចុះមកចុចនិយាមកា គេថាមិនអីទេ បន្ទាប់មកគេយកបង្គោលរបងមកដាក់ទៀត គេថាមិនអីដែរ។ ស្រាប់តែពេលនេះ គេបែរជាមកបិទប្រកាសតែម្ដង ដែលធ្វើឲ្យពួកគាត់មិនសុខចិត្ត ហើយទាមទារឲ្យរក្សាទំហំដីនេះ ជាប្រយោជន៍អ្នកភូមិ ។ ចំពោះករណីនេះ ពួកគាត់បានស្វះស្វែងរកកិច្ចអន្តរាគមន៍ពីអាជ្ញាធរ មានថ្នាក់ស្រុក និងថ្នាក់ខេត្តដែរ ប៉ុន្តែគ្មានលទ្ធផលអ្វីឡើយ។
ជុំវិញករណីខាងលើនេះ លោកស្រី ថ្វាន់ ត្រែល មេឃុំសែនមនោរម្យ បានទទួលស្គាល់ថា ទីតាំងដីខាងលើ ពិតជាចំការដែលពួកគាត់អាស្រ័យផលរាប់តំណរមកហើយមែន។ លោកស្រីមេឃុំបន្តថា គាត់មិនបានដឹងគេចុះមកវាស់វែង ឬចុចនិយាមកា លើផ្ទៃដីទាំងនោះទេ ។
ទោះជាយ៉ាងណា សកម្មភាពផ្ទុះការតវ៉ានេះ កោះសន្តិភាពមិនទាន់អាចសុំការបំភ្លឺពីអាជ្ញាធរខេត្តមណ្ឌលគិរី និងឈ្មោះ ជឹង ធានសេង ទេ នារសៀលថ្ងៃទី២៦ ខែតុលា ឆ្នាំ២០២២នេះ។
ព័ត៌មានពិស្តារនឹងមានផ្សាយជូនបន្តទៀត នៅលើកាសែតកោះសន្តិភាព៕
ចែករំលែកព័តមាននេះ