រាជធានីភ្នំពេញ ៖ ជារឿងនឹកស្មានមិនដល់ ព្រោះគេមិនដឹងថា ជាការចៃដន្យ ឬជាការរៀបចំនោះទេ ដោយសារសមាសភាពកីឡាករប្រដាល់នៅលើសង្វៀនទូរទស្សន៍ភីអិនអិន ថ្ងៃអាទិត្យ ទី៩ មេសា សប្ដាហ៍នេះ ប្រមូលផ្ដុំដោយអ្នកប្រដាល់ត្រកូលម៉នដល់ទៅ៤រូប ក្នុងនោះ១រូបទើបតែដូរនាមត្រកូលបានណាត់គ្នាឡើងអង្រួនសង្វៀនព្រមគ្នា ។
កីឡាករ ថៃ រដ្ឋា ពីដើមមានឈ្មោះថាម៉ន រដ្ឋា មកពីក្លិបការិយាល័យទី៥កងទ័ពជើងគោក ត្រូវគេរៀបចំឱ្យជួបប្រកួតជាមួយកីឡាករ ព្រំ វី មកពីក្លិបបញ្ជាការដ្ឋានកងទ័ពជើងទឹក ។ គូនេះសុទ្ធតែជាអ្នកប្រដាល់ចាស់វស្សាមានបទពិសោធន៍ប្រកួតនៅលើសង្វៀនយូរឆ្នាំដូចគ្នាប៉ុន្តែកន្លងមកមិនធ្លាប់ជួបសាកវិជ្ជាគុនគ្នាឡើយ ។ តាមការសង្កេត
ការប្រកួតកន្លងមកព្រំ វី ជាអ្នកប្រដាល់ចិត្តត្រជាក់ មិនចេះមើលស្រាលលើគូប្រកួតនោះទេ ទាំងស្នៀតកណ្ដាប់ដៃ និងស្នៀតជើងអាចប្រើការបានគ្រប់ស្ថានការណ៍ ។
ចំណែក ថៃ រដ្ឋា ជាអ្នកប្រដាល់ចិត្តក្ដៅឆាប់ច្រឡោតបន្តិច ទម្លាប់របស់គេមិនចូលចិត្តឱ្យគូប្រកួតវាយមុនឡើយ ។ សម្រាប់ការមកជួបជាមួយ ព្រំ វី ដែលមានទាំងកម្លាំង និងល្បិចប្រយុទ្ធមិនអន់ជាងខ្លួនបែបនេះ បើហ៊ានតែប្រហែសច្បាស់ស៊យធំមិនខាន។
កីឡាករ ម៉ន ភារម្យ មកពីក្លិបការិយាល័យទី៥កងទ័ពជើងគោក ត្រូវជួបប្រកួតជាមួយកីឡាករ សុខ ទូ មកពីក្លិបឃ្លាំងមឿងកីឡា ។
គូនេះមានប្រវត្តិប្រកួតមិនចាញ់គ្នាប៉ុន្មាននិងជាអ្នកប្រដាល់មានចិត្តសឿងដូចគ្នា ។ សុខ ទូ មិនសូវពូកែស្នៀតកែងនិងជង្គង់តែកុំមើលស្រាលលើស្នៀតជើងនិងស្នៀតកណ្ដាប់ដៃរបស់គេឱ្យសោះ រាល់ពេលម៉ាត់ និងទាត់ចេញម្ដងៗមានទម្ងន់ធ្ងន់ហើយចំគោលដៅបានល្អទៀតផង ។ ចំណែក ម៉ន ភារម្យ វិញក្នុងចំណោមអ្នកប្រដាល់ត្រកូលម៉ន គេមានចិត្តធ្ងន់ជាងគេ មិនចេះច្រឡោតផ្ដាស់ឡើយ ។ ទោះបីយ៉ាងណា គូនេះពិបាកប៉ាន់ស្មានពីលទ្ធផលទុកមុនណាស់ដូច្នេះមានតែរង់ចាំមើលការប្រកួតជាក់ស្ដែងនៅលើសង្វៀនតែប៉ុណ្ណោះ អ្នកណាខ្លាំងជាងអ្នកណាគង់តែដឹងទេ ។
នៅលើសង្វៀនដដែលអ្នកប្រដាល់ត្រកូលម៉ន ២រូបទៀតក៏នឹងបង្ហាញវត្តមានដែរក្នុងនោះ កីឡាករ ម៉ន ទី មកពីក្លិបការិយាល័យទី៥កងទ័ពជើងគោក នឹងជួបប្រកួតជាមួយកីឡាករ ធន មករា មកពីសមាគមកីឡាប្រដាល់ក្រសួងការពារជាតិ និងកីឡាករ ម៉ន វណ្ណី មកពីក្លិបការិយាល័យទី៥កងទ័ពជើងគោក ប្រកួតជាមួយកីឡាករ ឈុន បញ្ញា មកពីក្លិបរ៉ាហាប់ស្វាយប៉ាក ៕
ចែករំលែកព័តមាននេះ