មេបក្សប្រឆាំងបំពេញបេសកកម្មក្រៅប្រទេសក្រោយស្ថានការណ៍នយោបាយស្ងប់ស្ងាត់
រាជធានីភ្នំពេញ ៖ នៅវេលាម៉ោង១១ព្រឹកថ្ងៃទី៥ មេសា លោក កឹម សុខា ប្រធានគណបក្សសង្គ្រោះជាតិ បានទៅបំពេញបេសកកម្មនៅបរទេសគឺប្រទេសនូវែលសេឡង់
រាជធានីភ្នំពេញ ៖ នៅវេលាម៉ោង១១ព្រឹកថ្ងៃទី៥ មេសា លោក កឹម សុខា ប្រធានគណបក្សសង្គ្រោះជាតិ បានទៅបំពេញបេសកកម្មនៅបរទេសគឺប្រទេសនូវែលសេឡង់
រាជធានីភ្នំពេញ ៖ នៅវេលាម៉ោង១១ព្រឹកថ្ងៃទី៥ មេសា លោក កឹម សុខា ប្រធានគណបក្សសង្គ្រោះជាតិ បានទៅបំពេញបេសកកម្មនៅបរទេសគឺប្រទេសនូវែលសេឡង់ (ញូហ្សេលែន)និងអូស្ត្រាលីរយៈពេល២សប្ដាហ៍ បន្ទាប់ពីស្ថានការណ៍នយោបាយនៅក្នុងប្រទេសមានភាពស្ងប់ស្ងាត់ ។
លោកបានចេញដំណើរដោយស្ងាត់ៗមិនបាន ជូនដំណឹងដល់អ្នកសារព័ត៌មានដូចលើកមុននោះទេ គ្រាន់តែលោកបានសសេរលើបណ្តាញសង្គមហ្វេសប៊ុកថា៖«ព្រឹកនេះ ខ្ញុំចេញដំណើរទៅបំពេញបេសកកម្មនៅបរទេស គឺប្រទេសញូហ្សេលែន និងប្រទេសអូស្ដ្រាលី ។ ក្នុងដំណើរបេសកកម្មរយៈពេលខ្លីនេះ ខ្ញុំនឹងមានជំនួបជាមួយក្រុមសមាជិកសភា និងមន្ដ្រីរដ្ឋាភិបាល នៃប្រទេសទាំងពីរ ។ ក្នុងដំណើរបេសកកម្មនេះ ខ្ញុំនឹងជួបជាមួយបងប្អូនខ្មែរនៅទីនោះផងដែរ» ។
លោក មុត ចន្ថា នាយកខុទ្ទកាល័យលោក កឹម សុខា ត្រូវបានគេហទំព័រព័ត៌មានក្នុងស្រុកមួយស្រង់សំដីផ្សាយថា នៅនូវែលសេឡង់ លោក កឹម សុខា នឹងជួបជាមួយសហគមន៍ខ្មែរ មន្ត្រីរដ្ឋាភិបាល និងសមាជិកសភា ។ ចំណែកនៅអូស្ត្រាលីគាត់ជួបជាមួយនឹងបងប្អូនខ្មែរនៅទីនោះ ហើយត្រឡប់មកវិញនៅថ្ងៃទី១៨ ឬ១៩ ខែមេសា ។
សូមជម្រាបថា នេះជាលើកដំបូងហើយដែលលោក កឹម សុខា មានឱកាសចេញទៅបំពេញបេសកកម្មនៅបរទេសចាប់តាំងពីលោកមានរឿងអាស្រូវនៅតុលាការ ហើយត្រូវបានព្រះមហាក្សត្រចេញព្រះរាជក្រឹត្យលើកលែងទោស ចំពោះសំណុំរឿងមិនចូលខ្លួនតាមការកោះហៅរបស់តុលាការមក និងស្របពេលស្ថានការណ៍នយោបាយមានសភាពស្ងប់ស្ងាត់ ។ បើតាមមន្ត្រីគណបក្សសង្គ្រោះជាតិ បាននិយាយថា ដំណើរទស្សនកិច្ចនេះ លោក កឹម សុខា មិនមានគម្រោងជួបជាមួយលោក សម រង្ស៊ីនោះទេ ។ ប៉ុន្តែបើតាមអ្នកវិភាគស្ថានការណ៍នយោបាយនៅកម្ពុជាខ្លះថា លោកអាចឆ្លៀតទៅជួបលោក សម រង្ស៊ី នៅថ្ងៃណាមួយ ព្រោះអ្នកទាំងពីរខានជួបមុខគ្នាផ្ទាល់មួយរយៈពេលមកហើយ ។
ដំណើរទស្សនកិច្ចរបស់មេបក្សប្រឆាំងរូបនេះ ស្របពេលក្រសួងមហាផ្ទៃកំពុងតែពិនិត្យ លើលិខិតរបស់ខ្លួនស្តីពីការជ្រើសរើសថ្នាក់ដឹកនាំថ្មី និងការសម្រេចដកពាក្យស្លោកចេញពីគោលនយោបាយអាទិភាពចំនួន៥របស់ខ្លូន ។
លោក ខៀវ សុភ័គ អ្នកនាំពាក្យក្រសួងមហាផ្ទៃបានឱ្យដឹងថា ក្រសួងមហាផ្ទៃមិនទាន់អាចអះអាងថា លទ្ធផលថ្មីនៃកិច្ចប្រជុំគណៈកម្មាធិការនាយករបស់គណបក្សសង្គ្រោះជាតិ ដែលសម្រេចលុបពាក្យស្លោក«ដូរមេឃុំបម្រើបក្ស ដាក់មេឃុំបម្រើរាស្ត្រ»និងរក្សាក្បាលម៉ាស៊ីនដឹកនាំបក្សឱ្យនៅដដែលនោះត្រឹមត្រូវតាមលក្ខន្តិកៈ ឬយ៉ាងណានោះទេ ប៉ុន្តែសម្តេចក្រឡាហោម ស ខេងឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ កំពុងពិនិត្យមើលលទ្ធផលនេះ ។
លោក ខៀវ សុភ័គ បានបញ្ជាក់ឱ្យដឹងថា រហូតដល់ពេលនេះ ក្រសួងមហាផ្ទៃមិនអាចឆ្លើយតបយ៉ាងណានោះទេ ចំពោះករណីនេះ ហើយថា ក្រសួងកំពុងពិនិត្យមើលសំណើរបស់គណបក្សប្រឆាំង ។ ក្នុងករណីដែលពិនិត្យរួចរាល់ ក្រសួងនឹងជូនដំណឹងជាផ្លូវការតែម្តង ។
បើតាមលោក ខៀវ សុភ័គ ត្រូវបានវិទ្យុអាស៊ីសេរីដកស្រង់សម្ដីផ្សាយថា ការសម្រេចរក្សាសមាសភាពថ្នាក់ដឹកនាំបក្សប្រឆាំងឱ្យនៅដដែល គឺត្រឹមត្រូវតាមលក្ខន្តិកៈគណបក្ស ប៉ុន្តែក្រសួងនៅត្រូវការពេលវេលាបន្តិចដើម្បីពិនិត្យជុំវិញបញ្ហានេះ ។
គណបក្សសង្គ្រោះជាតិបានប្រកាសជំហរចុងក្រោយរបស់ខ្លួនដោយរក្សាទុកតំណែង លោក កឹម សុខា ជាប្រធាន និងអនុប្រធានមានអ្នកស្រី មូរ សុខហួរ លោក ប៉ុល ហំម និងលោក អេង ឆៃអ៊ាង ដែលក្រសួងធ្លាប់ចាត់ទុកថា សមាជជ្រើសតាំងប្រធាននិងអនុប្រធានគណបក្សប្រឆាំងធ្វើឡើងខុសលក្ខន្តិកៈបក្សកន្លងមក ។
ទោះបីយ៉ាងណា ក្រសួងមហាផ្ទៃបានអបអរសាទរនៅពេលឃើញគណបក្សប្រឆាំង សម្រេចលុបចោលពាក្យស្លោក«ដូរមេឃុំបម្រើបក្ស ដាក់មេឃុំបម្រើរាស្ដ្រ»ចោលដែល
គណបក្សមួយនេះធ្លាប់ប្រើតាំងពីឆ្នាំ២០១២មកនៅកិច្ចប្រជុំជ្រើសរើសថ្នាក់ដឹកនាំរបស់ខ្លួនជាថ្មី កាលពីថ្ងៃទី២ មេសា ស្របពេលក្រសួងមហាផ្ទៃចាត់ទុកពាក្យស្លោកនេះផ្ទុយនឹងរដ្ឋធម្មនុញ្ញ ច្បាប់ស្ដីពីគណបក្សនយោបាយ និងច្បាប់បោះឆ្នោត ។ ប៉ុន្តែគណបក្សនេះសម្រេចទុកថ្នាក់ដឹកនាំដែលត្រូវសមាជវិសាមញ្ញរបស់ខ្លួនជ្រើសរើសកាលពីថ្ងៃទី២ ខែមីនា ឆ្នាំ២០១៧ នៅដដែល ។
លោក កឹម សុខា បង្ហោះរូបថតមួយសន្លឹកមុនចេញពីប្រទេសកម្ពុជា ដោយគេឃើញលោក ប៉ុល ហំម កូនស្រីលោក គឺកញ្ញា គឹម មនោវិទ្យា លោក មុត ចន្ថា និងសកម្មជនមួយចំនួនទៀតអមដំណើរលោក ៕
ចែករំលែកព័តមាននេះ