សហភាពអឺរ៉ុប ៖ ប្រទេសអីុតាលី អីុស្រាអែល ក្រិក និងស៊ីប បានសន្យាកាលពីថ្ងៃចន្ទថា នឹងសម្រេចកសាងបំពង់នាំឧស្ម័នក្រោមសមុទ្រវែងជាងគេលើពិភពលោក ពីសមុទ្រមេឌីទែរ៉ាណេខាងលើទៅកាន់អឺរ៉ុបខាងត្បូង ដោយមានការគាំទ្រពីសហភាពអឺរ៉ុប ។
ប្រសិនបើត្រូវបានអនុម័តដូចផែនការនោះ បំពង់មានតម្លៃ៦,២ប៊ីលានដុល្លារ នឹងនាំឧស្ម័នពីប្រទេសអីុស្រាអែល និងស៊ីបទៅកាន់អឺរ៉ុប ដែលអាចកាត់បន្ថយការពឹងផ្អែករបស់ប្រទេសអឺរ៉ុបលើថាមពលពីប្រទេសរុស្ស៊ី ខណៈកំពុងមានភាពតានតឹង ។
ក្នុងសន្និសីទកាសែតមួយនៅ Tel Aviv នៅអីុស្រាអែល រដ្ឋមន្ត្រីថាមពលពីប្រទេសទាំងបួន និងប្រធាននាយកដ្ឋានសកម្មភាពបរិយាកាស និងថាមពលរបស់ EU លោក Miguel Arias Canete សន្យាថា នឹងប្តេជ្ញាចំពោះគម្រោងការនេះ ។
ពួកគេនិយាយថា ការសិក្សាត្រូវបានបញ្ចប់ ហើយសង្ឃឹមថា នឹងអាចសម្រេចចេញផែនការពេញលេញមួយសម្រាប់គម្រោងនេះនាចុងឆ្នាំ២០១៧ ។ ពួកគេបន្ថែមថា ការសាងសង់បំពង់នេះ នឹងមិនចាប់ផ្តើមក្នុងរយៈពេលប៉ុន្មានឆ្នាំខាងមុខទេ គឺអាចក្នុងឆ្នាំ២០២៥ ។
លោក Yuval Steinitz រដ្ឋមន្ត្រីថាមពលអីុស្រាអែល ថ្លែងថា ៖ « វានឹងក្លាយជាបំពង់នាំឧស្ម័នក្រោមសមុទ្រវែង និងធំជាងគេក្នុងពិភពលោក » ។
ប៉ុន្តែលោក Elio Ruggeri ប្រធាន IGI Poseidon ជាក្រុមហ៊ុនមួយក្នុងចំណោមក្រុមហ៊ុនចូលរួមក្នុងគម្រោងនេះ និយាយថា តម្លៃឧស្ម័នបានធ្លាក់ចុះ ហើយកត្តាហិរញ្ញវត្ថុសម្រាប់បំពង់នេះ គឺយោងតាមការសង្ឃឹមថា តម្លៃនឹងកើនឡើងម្តងទៀត ។
រដ្ឋមន្ត្រីទាំងបួនក៏បានយល់ព្រមថា នឹងជួបគ្នារៀងរាល់៦ខែម្តង ក្នុងរយៈពេលប៉ុន្មានឆ្នាំខាងមុខ ។
រដ្ឋមន្ត្រីការអភិវឌ្ឍសេដ្ឋកិច្ចរបស់អីុតាលីលោក Carlo Calenda ថ្លែងថា ការផ្គត់ផ្គង់ដ៏គួរឲ្យទុកចិត្ត និងមានតម្លៃសមរម្យ គឺជាឧបសគ្គដ៏សំខាន់មួយសម្រាប់ប្រទេសធ្វើឲ្យបំពង់នាំឧស្ម័ននេះទទួលបានអាទិភាពជាងគេ ។
លោក Amit Mor ប្រធានក្រុមហ៊ុន EcoEnergy របស់អីុស្រាអែល ប្រាប់ថា ខណៈរដ្ឋមន្ត្រីទាំងឡាយប្តេជ្ញាចិត្តក្តី ប៉ុន្តែវាមិនធានាថា គម្រោងនេះនឹងអាចបន្តបានទេ ។
លោកបន្តថា ៖ « ក្នុងដំណាក់កាលនេះ វាជាបំពង់ក្នុងសុបិន ប៉ុន្តែវាសំខាន់ណាស់ក្នុងការដឹងថា គម្រោងពាណិជ្ជកម្មអន្តរជាតិ ពេលខ្លះត្រូវការពេលរាប់ទសវត្សរ៍ក្នុងការអភិវឌ្ឍ » ៕
ចែករំលែកព័តមាននេះ