រាជធានីភ្នំពេញ ៖ នៅឆ្នាំ២០១៧នេះ អគ្គនាយកដ្ឋានពន្ធដារដែលមានភារកិច្ចរកចំណូលជូនជាតិ បានកំណត់ផែនការរកចំណូលឱ្យបាន១.៧១៥លានដុល្លារអាមេរិក ខណៈដែល៣ខែដំបូង ស្ថាប័នមួយនេះ
រាជធានីភ្នំពេញ ៖ នៅឆ្នាំ២០១៧នេះ អគ្គនាយកដ្ឋានពន្ធដារដែលមានភារកិច្ចរកចំណូលជូនជាតិ បានកំណត់ផែនការរកចំណូលឱ្យបាន១.៧១៥លានដុល្លារអាមេរិក ខណៈដែល៣ខែដំបូង ស្ថាប័នមួយនេះរកចំណូលបានប្រមាណ៤៥%នៃផែនការដែលបានគ្រោងទុក ។
ក្នុងកិច្ចសម្ភាសន៍មួយជាមួយអ្នកសារព័ត៌មានកាលពីថ្ងៃទី៥ មេសា ម្សិលមិញ នៅសណ្ឋាគារអាំងទែកុងទីណង់តាល់ លោកគង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារបានឲ្យដឹងថា ក្នុងឆ្នាំ២០១៧នេះ អគ្គនាយកដ្ឋានពន្ធដារបានកំណត់ផែនការរួចហើយលើការប្រមូលពន្ធនៅក្នុងប្រទេសកម្ពុជា ដោយក្នុងនោះ អគ្គនាយកដ្ឋានបានកំណត់ទឹកប្រាក់នឹងប្រមូលឲ្យបានចំនួន ១.៧១៥លានដុល្លារអាមេរិក ។
លោកថ្លែងថា ៖ « នៅក្នុងផែនការកំណត់១.៧១៥លានដុល្លារអាមេរិកនេះ ក្នុងរយៈពេល៣ខែ យើងប្រមូលបាន៤៥%ហើយ ដូចនេះវាមានច្រើន តែវាជារឿងធម្មតាទេ នៅក្នុងអំឡុង៣ខែដំបូងនៃឆ្នាំនីមួយៗ ព្រោះវាជាខែដែលបានប្រកាសឱ្យអ្នកជាប់ពន្ធទាំងឡាយ ត្រូវបង់ពន្ធជូនរដ្ឋទៅលើអាជីវកម្មផ្សេងៗ» ។
លោកបន្តថា នៅក្នុងចំណោមអ្នកជាប់ពន្ធទាំងអស់ មានវិស័យមួយចំនួនបានរួមចំណែកយ៉ាងសំខាន់ក្នុងចំណូលពន្ធដារ ក្នុងនោះរួមមាន វិស័យឧស្សាហកម្ម ដែលមានរោងចក្រ សហគ្រាសផលិតភេសជ្ជៈជាដើម ហើយក្រៅពីនោះ មានវិស័យទេសចរណ៍ ដែលមានភោជនីយដ្ឋាន សណ្ឋាគារ និងផ្ទះសំណាក់ ។
លោកបន្ថែមថា ទន្ទឹមនឹងការប្រមូលពន្ធមានកំណើនជាបន្តបន្ទាប់នោះ ក៏មានបញ្ហាប្រឈមមួយចំនួនសម្រាប់អគ្គនាយកដ្ឋានពន្ធដារផងដែរ ។ លោកថា ៖ «ជាធម្មតា គ្មានអ្នកណាម្នាក់ចង់មកបង់ពន្ធ ឬរីករាយនឹងបង់ពន្ធទេ ព្រោះវាអស់លុយ ហើយបើអាជីវកម្មនោះធំ ឬដី ផ្ទះធំៗ ការបង់ពន្ធ ក៏អស់ច្រើន តែយើងបានបណ្ដុះបណ្ដាលមន្ត្រីពន្ធដារឱ្យបានយល់ជាមុនសិន រួចហើយចាំពន្យល់ដល់អ្នកជាប់ពន្ធទាំងឡាយឱ្យបានយល់ច្បាស់ពីកាតព្វកិច្ចនៃការបង់ពន្ធ » ។
លោកបញ្ជាក់ថា កន្លងមកមន្ត្រីអគ្គនាយកដ្ឋានពន្ធដារតែងតែចុះទៅអនុវត្តច្បាប់ ដោយបានធ្វើវិសោធនកម្មនានា តែក៏មានការរិះគន់ពីសាធារណជនមួយចំនួនទៅលើការអនុវត្តច្បាប់នេះដែរ តែតាមពិតមន្ត្រីអគ្គនាយកដ្ឋាន ចុះទៅអនុវត្តចំពោះតែម្ចាស់អាជីវកម្មណា ដែលមិនគោរពទៅតាមច្បាប់ប៉ុណ្ណោះ ។
លោកបន្ដថា ៖ «ជាក់ស្ដែង តាមភោជនីយដ្ឋាន ឬកន្លែងផ្ដល់សេវាផ្សេងៗ សុទ្ធតែជាអ្នកមានតួនាទីប្រមូលពន្ធជូនរដ្ឋ ដោយបានយកពន្ធពីពលរដ្ឋ ឬអតិថិជនរបស់ខ្លួនរួចហើយ តែម្ចាស់អាជីវកម្មទាំងនោះ មិនព្រមយកមកបង់ពន្ធជូនរដ្ឋតាមកាលកំណត់ ដែលលុយទាំងនោះ មិនមែនជារបស់គាត់ តែជារបស់ពលរដ្ឋឬអតិថិជនដែលប្រើប្រាស់សេវាកម្មរបស់ពួកគាត់»។
គួរបញ្ជាក់ថា ក្នុងត្រីមាសទី១ ឆ្នាំ ២០១៧នេះ អគ្គនាយកដ្ឋានពន្ធដារដែលបានប្រមូលពន្ធបាន៧៧០លានដុល្លារអាមេរិក ស្មើនឹង៤៥%នៃផែនការដែលបានកំណត់ ។ ដោយឡែកឆ្នាំ២០១៦កន្លងទៅ អគ្គនាយកដ្ឋានពន្ធដារ ប្រមូលពន្ធអាករផ្សេងៗបានចំនួនជាង១.៤៩៧លានដុល្លារអាមេរិក ៕
ចែករំលែកព័តមាននេះ