ដំណាច់ត្រីមាសទី1 ការទិញលក់រថយន្តកើនឡើងតិចតួច
រាជធានីភ្នំពេញ ៖ នៅដំណាច់ត្រីមាសទី១ឆ្នាំនេះ សកម្មភាពទិញលក់រថយន្តនៅកម្ពុជាមានកំណើនតិចតួច បើធៀបនឹងរយៈពេលដូចគ្នាកាលពីឆ្នាំមុន ។ នេះបើតាមការបញ្ជាក់ពី
រាជធានីភ្នំពេញ ៖ នៅដំណាច់ត្រីមាសទី១ឆ្នាំនេះ សកម្មភាពទិញលក់រថយន្តនៅកម្ពុជាមានកំណើនតិចតួច បើធៀបនឹងរយៈពេលដូចគ្នាកាលពីឆ្នាំមុន ។ នេះបើតាមការបញ្ជាក់ពី
រាជធានីភ្នំពេញ ៖ នៅដំណាច់ត្រីមាសទី១ឆ្នាំនេះ សកម្មភាពទិញលក់រថយន្តនៅកម្ពុជាមានកំណើនតិចតួច បើធៀបនឹងរយៈពេលដូចគ្នាកាលពីឆ្នាំមុន ។ នេះបើតាមការបញ្ជាក់ពីក្រុមហ៊ុននាំចូលរថយន្តនានា ។
លោក លី ប៊ុនហៃ នាយកគ្រប់គ្រងទូទៅនៃក្រុមហ៊ុន TOYOTA Cambodia បានឲ្យដឹងតាមទូរស័ព្ទនាព្រឹកថ្ងៃទី៤ មេសាថា ការលក់រថយន្តថ្មីនៅឆ្នាំនេះកើនឡើង ប៉ុន្តែទំហំនៃកំណើនថយចុះ បើធៀបនឹងរយៈពេលដូចគ្នាឆ្នាំមុន ។ លោកបន្តថា ការទិញលក់រថយន្តមានសកម្មភាពល្អប្រសើរនៅមុនពិធីបុណ្យចូលឆ្នាំប្រពៃណីចិនកន្លងមក ប៉ុន្តែចូលដល់ខែមេសានេះ សកម្មភាពទិញលក់គ្មានការកើនឡើងទេ ។
លោកបន្តថា ៖ « ការដំឡើងពន្ធរថយន្តថ្មីរបស់រាជរដ្ឋាភិបាលកាលពីឆ្នាំមុន ក៏ទំនងជាហេតុផលធ្វើឲ្យការលក់រថយន្តឆ្នាំនេះមានកំណើនតិចតួចផងដែរ » ។
លោក ពាង ម៉ាន់ អគ្គនាយកក្រុមហ៊ុនGreat Wall ដែលបាននាំចូលរថយន្ត Great Wall មកពីប្រទេសចិន បាននិយាយស្រដៀងគ្នាថា ការលក់រថយន្តមិនល្អប្រសើរទេ បើធៀបនឹងរយៈពេលដូចគ្នាកាលពីឆ្នាំមុន ។ ការលក់ឆ្នាំនេះបានចំនួនតិចជាងឆ្នាំមុន ដែលមូលហេតុអាចបណ្តាលមកពីការដំឡើងពន្ធរថយន្តរបស់រាជរដ្ឋាភិបាល និងលក្ខខណ្ឌផ្តល់ឥណទានលំបាក ដោយធនាគារនានាបានទាមទារលក្ខខណ្ឌខ្ពស់ពីអ្នកខ្ចីប្រាក់ទិញរថយន្ត ។ លោកបន្តថា ធនាគារនានាបានតម្រូវឲ្យម្ចាស់រថយន្តបញ្ចាំអចលនទ្រព្យដទៃទៀត ក្រៅពីបញ្ចាំកាតគ្រីរថយន្តរបស់ពួកគេ ហើយអត្រាការប្រាក់ខ្ពស់ ក៏ជាមូលហេតុមួយដែរ ។
លោកបន្តថា ៖ « ការដំឡើងពន្ធលើ រថយន្តថ្មី និងលក្ខខណ្ឌស្មុគស្មាញផ្តល់ឥណទានពីធនាគារនានាធ្វើឲ្យមានឧបសគ្គក្នុងវិស័យនេះ ព្រោះធនាគារនានាបានតម្រូវឲ្យម្ចាស់រថយន្តដែលខ្ចីប្រាក់ពីធនាគារ ដាក់ទ្រព្យបញ្ចាំបន្ថែមក្រៅពីកាតសម្គាល់រថយន្តរបស់ពួកគេ » ។
លោកបន្ថែមថា ៖ « ធនាគារនានាគួរបន្ធូរបន្ថយលក្ខខណ្ឌដើម្បីផ្តល់ឲ្យអ្នកទិញរថយន្តទទួលបានការប្រាក់សមរម្យ និងមិនចាំបាច់មានទ្រព្យបញ្ចាំច្រើន » ។
លោក ចក់ សារិន ម្ចាស់ឃ្លាំងរថយន្តម៉ាកPruis នៅតាមបណ្តោយមហាវិថីម៉ៅ សេទុងដែលបាននាំចូលរថយន្តប្រភេទជជុះ ឲ្យដឹងដែរថា តម្លៃរថយន្តរបស់លោកមិនកើនឡើងទេ គឺនៅរក្សាតម្លៃដដែល ព្រោះរាជរដ្ឋាភិបាលដំឡើងពន្ធសម្រាប់តែរថយន្តថ្មីប៉ុណ្ណោះ ប៉ុន្តែទោះជាយ៉ាងណា ការលក់រថយន្តរបស់លោកមិនប្រសើរទេនៅឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន ។ លោកបន្តថា ៖ « ការលក់រថយន្តនៅឃ្លាំងរបស់ខ្ញុំ មុនពេលកៀកចូលឆ្នាំខ្មែរខាងមុខនេះមិនសូវល្អទេ បើធៀបនឹងដើមឆ្នាំនេះ » ។
លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងការពារការដំឡើងពន្ធលើរថយន្តថ្មី ដោយលោកមានប្រសាសន៍ថា ការដំឡើងពន្ធបែបនេះមិនប៉ះពាល់ដល់អ្នកក្រីក្រទេ ផ្ទុយទៅវិញ គឺប៉ះពាល់តិចតួចចំពោះក្រុមអ្នកមានប្រាក់ប៉ុណ្ណោះ ហើយរាជរដ្ឋាភិបាលមិនមែនដំឡើងពន្ធតែរថយន្តទេ ប៉ុន្តែក៏បាននិងកំពុងដំឡើងពន្ធលើស្រា និងបារី ដែលជាផលិតផលប៉ះពាល់សុខភាពប្រជាពលរដ្ឋផងដែរ ៕
ចែករំលែកព័តមាននេះ