រាជធានីភ្នំពេញ ៖ បន្ទាប់ពីជោគជ័យនៅក្នុងអាជីពបាល់ទាត់ ពេលនេះលោក ប្រាក់ មុន្នីឧត្តម និងភរិយា បានបើកអាជីវកម្មធំដុំមួយបន្ទាប់ពីរៀបការរួច ។ អាជីវកម្មនេះត្រូវបានប្រកាសថា ចំណាយអស់ជាង២ម៉ឺនដុល្លារ និងជាអាជីវកម្មទ្រង់ទ្រាយធំដែលធ្វើឱ្យកីឡាកររូបនេះកាន់តែទទួលបានការចាប់អារម្មណ៍ថែមទៀតបន្ថែមពីលើអាជីពបាល់ទាត់ ។
អ្នកនាងប្រាក់ ស្រីរ័ត្ន ភរិយាលោក ប្រាក់ មុន្នីឧត្តម បានអះអាងថា ដោយសារតែចង់ឱ្យជីវភាពមានលំនឹង អ្នកស្រី និងស្វាមី បានសម្រេចបើកហាងបោកអ៊ុតធំមួយដោយចំណាយអស់ជាង២ម៉ឺនដុល្លារ នៅផ្លូវចូលទៅផ្សារចាស់ ជិតស្ដុបមន្ទីរពេទ្យព្រះអង្គឌួង ។ អ្នកនាងថា អាជីវកម្មនេះមានយីហោថា «៧ឃ្លីន» ហើយហេតុផលដែលនាំឱ្យអ្នកនាងនិងស្វាមីសម្រេចចិត្តបោះទុនបើកមុខរបរនេះ គឺ ដោយសារតែមានបងស្រីជីដូនមួយផ្ដល់បទពិសោធន៍ និងម្យ៉ាងចង់ក្លាយជាម្ចាស់ហាងផ្ទាល់ខ្លួនផង ។ អ្នកនាងថា សប្បាយចិត្តដែលមានឱកាសបានបើកអាជីវកម្មផ្ទាល់ខ្លួន ប៉ុន្តែមិនទាន់ស្រឡះចិត្តនៅឡើយទេ ដោយសារតែភាពជាក់ស្ដែង គឺហាងមួយនេះនៅត្រូវការដើមទុនច្រើនដើម្បីឱ្យគ្រប់ស្ដង់ដារ ។ មកទល់ពេលនេះ ហាងរបស់អ្នកនាងដំឡើងម៉ាស៊ីនចំនួន១៥គ្រឿងហើយនិងមានគម្រោងពង្រីកបន្ថែមទៀត ប្រសិនបើមានតម្រូវការច្រើនឡើងពីសំណាក់អតិថិជន ។ ហាងមួយនេះបានបើកដំណើរការកាលពីថ្ងៃទី២៩ មីនា ដែលមកដល់ពេលនេះទើបតែបានប្រមាណមួយសប្ដាហ៍ប៉ុណ្ណោះ ប៉ុន្តែកត់សម្គាល់ឃើញថា មានភ្ញៀវចេញចូលបោកអ៊ុតច្រើនគួរសម ។
អ្នកនាងប្រាក់ ស្រីរ័ត្ន ថា បើទោះជាមានការមមាញឹកជាមួយនឹងការលេងបាល់ ប៉ុន្តែស្វាមីអ្នកនាងក៏បានជួយមើលការខុសត្រូវ និងជួយចាត់ចែងការងារនៅក្នុងហាងនេះយ៉ាងសកម្មផងដែរ ។ ស្វាមីរមែងចំណាយពេលច្រើនជាមួយអាជីវកម្មនេះ បើទោះជាហាងទាំងមូលមានអ្នកចាត់ចែង និងមានអ្នកនាងនៅមើលការខុសត្រូវក្ដី ។ អាជីវកម្មនេះមិនត្រូវការឱ្យស្វាមីជួយមើលខុសត្រូវក៏បានដែរ ដោយសារតែក្នុងហាងក៏មានក្រុមអ្នកបម្រើការដោយផ្នែកៗរួចស្រេចអស់ហើយដែរ ។
អ្នកនាងថា ហាងមួយនេះរំពឹងទទួលបានចំណូលច្រើន ដោយសារតែទីតាំងជួលបើកត្រូវចំប្លង់ដែលមានមនុស្សរស់នៅអ៊ូអរ ហើយការបោកអ៊ុតបានក្លាយជាចំណូលចិត្តរបស់អ្នកមានការងារច្រើនដែលចង់បានសម្លៀកបំពាក់ស្អាត ។
អ្នកនាងថា មនុស្សច្រើនឡើងខ្ជិលនឹងការងារបោកអ៊ុតទើបខ្លួននិងស្វាមីសម្រេចបើកហាងបែបហ្នឹងដោយរំពឹងថានឹងមានអ្នកចូលបោកអ៊ុតច្រើន ។
អ្នកនាង ប្រាក់ ស្រីរ័ត្ន បញ្ជាក់ថា ផ្ទះដែលជួលបើកហាងនោះបានកុងត្រា៣ឆ្នាំ ហើយតម្លៃប្រចាំខែគឺរហូតដល់ជិត១ពាន់ដុល្លារ តែអ្នកនាងនៅតែរំពឹងប្រសិនបើហាងមួយនេះដំណើរការបន្តិចទៀតហើយមានអ្នកស្គាល់ច្រើន ។ អ្នកនាងនិយាយថា ៖«ផ្ទះហ្នឹងគ្រាន់តែថ្លៃឈ្នួលមួយខែ៩៥០ដុល្លារហើយ ប៉ុន្តែខ្ញុំថាទៅរួចប្រសិនបើហាងដើរបានបន្តិចទៀត»។ អ្នកនាងត្រៀមដើមខាតកន្លះឆ្នាំដំបូង ប៉ុន្តែបន្តបន្ទាប់មក គឺពិតជាចំណេញដោយសារតែបទពិសោធន៍បងប្អូនជីដូនមួយរបស់អ្នកនាងដែលបើកហាងបោកអ៊ុតទ្រង់ទ្រាយធំអ៊ីចឹងគឺមួយខែរកចំណូលបាន៤ពាន់ដុល្លារ ។ អ្នកនាងថា មុខរបរបោកអ៊ុតឱ្យតែបើកចំទីតាំងត្រូវ គឺនឹងមានចំណូលក្នុងរង្វង់ហ្នឹងទើបអ្នកនាងសម្រេចចិត្តបើកអាជីវកម្មនេះ ដោយសុខចិត្តចំណាយដើមជាង២ម៉ឺនដុល្លារ និងសុខចិត្តបោះបង់ការងារក្រុមហ៊ុនចោល បើទោះអ្នកនាងបានបញ្ចប់បរិញ្ញាបត្រផ្នែកហិរញ្ញវត្ថុក្ដី ។
អ្នកនាងថា ខ្លួនមិនចង់ធ្វើការក្រុមហ៊ុននោះទេ ម្យ៉ាងមកពីខ្លួនចង់ឱ្យជីវិតប្ដីប្រពន្ធមានភាពរឹងមាំផងទើបសម្រេចបើកហាងបោកអ៊ុត ដោយគ្រោងពង្រឹងអាជីវកម្មមួយនេះរហូតរឹងមាំ និងគ្មានគម្រោងពង្រីកហាងណាមួយនោះទេ ។ អ្នកនាងថា នឹងជំរុញឱ្យស្វាមីបន្តអាជីពបាល់ទាត់មិនឱ្យដកថយនោះទេ បើទោះជាខ្លួន និងស្វាមីត្រូវដកឃ្លាមកមើលខុសត្រូវមុខជំនួញបើកហាងនាពេលនេះក៏ដោយ ។ ក្នុងនោះខ្លួនក៏មិនទាន់មានគម្រោងយកកូននោះដែរ ដោយសារតែចង់ឱ្យទំនេរពោះដើម្បីមើលខុសត្រូវហាងបើកថ្មីឱ្យជោគជ័យសិន ។ ចាំមួយឆ្នាំពីរឆ្នាំឬចាំឱ្យមុខជំនួញរឹងមាំបន្តិចសិនចាំយកកូនក៏មិនទាន់ហួសពេលដែរ ដោយសារតែខ្លួនទើបតែមានអាយុ២៣ឆ្នាំ រីឯស្វាមីក៏មានអាយុមិនទាន់ដល់៣០ឆ្នាំនៅឡើយ ។ អ្នកនាងទទូចឱ្យគាំទ្រអាជីវកម្មបើកហាងបោកអ៊ុតរបស់ខ្លួន ដោយសន្យាថា នឹងធ្វើឱ្យអាជីវកម្មមួយនេះដើរទៅមុខឱ្យរលូន ដោយសារតែអ្នកមកជួយហាងអ្នកនាងសុទ្ធតែមានជំនាញច្រើនឆ្នាំក្នុងអាជីពបើកហាងបោកអ៊ុតនេះ ៕
ចែករំលែកព័តមាននេះ